উচ্চতম ন্যায়ালয়ৰ নিৰ্দেশক উলংঘা কৰি হিমন্ত বিশ্ব শৰ্মাৰ আমোলত এতিয়া চলি আছে নিষিদ্ধ ৰেট হ’ল কয়লা খনন। আৰক্ষী সঞ্চালক প্ৰধান জিপি সিঙৰ ঘোষণাৰ পাছতো ৰাজ্যত বন্ধ হোৱা নাই অবৈধ কয়লা খননৰ ছিণ্ডিকেট। উমৰাংছ’ৰ কয়লা খনিৰ ট্ৰেজেডীৰ পিছতে ৰাজ্যত অবৈধ ৰেট হ’ল কয়লা খনন বন্ধ কৰা হ’ব বুলি ঘোষণা কৰিছে ৰাজ্য বিদায়ী আৰক্ষী সঞ্চালক প্ৰধান জিপি সিঙে।
জিপি সিঙৰ এই নিৰ্দেশৰ পাছতে তিনিচুকীয়াৰ কেবাটাও অবৈধ ৰেট হল কয়লা খনি ধ্বংস কৰিছিল প্ৰশাসনে। কিন্তু আৰক্ষী সঞ্চালক প্ৰধান জিপি সিঙৰ এই ঘোষণাও যেন অসাৰ হৈ পৰিছে। এক শক্তিশালী চক্ৰৰ ছত্ৰছায়াত এতিয়াও ৰাজ্যত অবৈধ কয়লা খনন চলি আছে।
অসমক ছিণ্ডিকেট শূন্য বুলি দাবী কৰি অহা মুখ্যমন্ত্ৰী ডঃ হিমন্ত বিশ্ব শৰ্মাৰ আমোলতে এতিয়াও চলি আছে উচ্চতম ন্যায়ালয়ে নিষিদ্ধ কৰা কয়লা খনন। অৰ্থাৎ ন্যায়ালয়ৰ নিৰ্দেশক বৃদ্ধাংগুষ্ঠ প্ৰদৰ্শন কৰি ৰাজ্য চলাই থকা হৈছে অবৈধ কয়লা খনন। উমাৰংছ’ৰ কয়লা খনিৰ ট্ৰেজেডীৰ পিছতে পোৰহলৈ আহিছে কাৰ্বি আংলং জিলাৰ বিভিন্ন ঠাইত অব্যাহত থকা নিষিদ্ধ কয়লা খননৰ তথ্য।
উচ্চতম ন্যায়ালয়ৰ নিৰ্দেশ অৱমাননাৰে কাৰ্বি আংলঙৰ ডিলাই থানাৰ অন্তৰ্গত কয়লাজান, বকলিয়া থানাৰ অন্তৰ্গত ডিছ’বাইৰ ওচৰৰ চাইনিলাংছ’, লাংমিলি আৰু ত ক্লুৰডুংত ব্যাপক হাৰত ৰেট হোল মাইনিং চলি আহিছে। কয়লাজান, লাংমিলি, পাট্ৰাদিছা, ডিছ’বাই, ছাইনিলাংছ’, কুৰদোং, কয়লামাটি আদি অঞ্চলত ছিণ্ডিকেট চক্ৰই বন বিভাগ আৰু আৰক্ষী-প্ৰশাসনৰ চকুৰ আগতে বাধাহীনভাৱে চলাই থকা নিষিদ্ধ ৰেট হোল মাইনিঙৰ ভিডিঅ’ আৰু ছবি সংগ্ৰহ কৰাৰ পিচতেই ছিণ্ডিকেটৰ ভয়ানক তথ্য পোহৰলৈ আনিছে।
কাৰ্বি আংলং জিলাৰ এই অবৈধ কয়লা খনিসমূহো যিকোনো মুহূৰ্ততে উমৰাংছ’ৰ দৰে অভিশপ্ত হৈ পৰিব পাৰে। এই ভিডিঅ’সমূহে হিমন্ত বিশ্ব শৰ্মাৰ আমোলৰ ছিণ্ডিকেটশূন্য অসমৰ প্ৰকৃত ছবিখন উন্মুক্ত কৰি দিছে বুলিও এতিয়া চৰ্চা চলিছে। ডিলাই থানাৰ কয়লাজানত উমৰাংচুতকৈও অতি বিপজ্জনকভাৱে ৰেট হোল মাইনিঙৰ জৰিয়তে শ্রমিকে অবাধ হাৰত কয়লা খান্দি ওপৰলৈ তুলি থকা দৃশ্য পোহৰলৈ আহিছে। নিষিদ্ধ সুৰংগকেইটাত ৩০-৪০ জনৰো অধিক শ্রমিক নিয়োজিত হৈ থকাৰ কথা জানিব পৰা গৈছে। প্ৰায় এশ-দুশ ফুট গভীৰৰ পৰা এটা বাঁহৰ খাঙত প্রতিবাৰে ৬০০ টকাৰ বিনিময়ত এবোজা কয়লা কঢ়িয়াই আনে শ্ৰমিকসকলে।
কাৰ্বি আংলং জিলা বিজেপি নেতাসকলে জিলাখনত কোনো কয়লা খনন হোৱা নাই বুলি দাবী কৰাৰ লগতে অসম চৰকাৰেও কাৰ্বি আংলঙত কয়লাৰ ৰেট হোল মাইনিং নাই বুলি দাবী কৰি আহিছে। কিন্তু এই দাবীৰ বিপৰীতে জিলাখনত যে অবৈধ কলয়া খননৰ ছিণ্ডিকেট চলি আছে এই কথা প্ৰমাণ হৈ পৰিছে। অসমৰ আৰক্ষী সঞ্চালকপ্রধান জি পি সিঙে অসমৰ সকলো ৰেট হোল মাইনিং বন্ধ কৰিবলৈ সকলো জিলাৰ আৰক্ষী অধীক্ষকলৈ কঠোৰ নিৰ্দেশ প্রদান কৰিছিল। ইয়াৰ পিচতো কাৰ্বি আংলং জিলাৰ কয়লাজানকে ধৰি চিলনীজান, ডিছ’বাই, লাংমিলি, নামবৰ হাবিৰ সমীপত কিদৰে অবাধ হাৰত মুক্তভাৱে কয়লা খনন চলি আছে, সেইটো ৰহস্যজনক হৈ পৰিছে। হিমন্ত বিশ্ব শৰ্মাৰ চৰকাৰৰ আশীৰ্বাদপুষ্ট নহ’লে এইদৰে কয়লা খননৰ ছিণ্ডিকেট চলি থকাটো সম্ভৱপৰ নহয়। প্ৰশ্ন উঠিছে আৰক্ষী সঞ্চালক প্ৰধানৰ কঠোৰতাৰ বিপৰীতে হিমন্ত বিশ্ব শৰ্মাৰ চৰকাৰৰ কোনো শক্তিশালী চক্ৰৰ কৃপাতে এই ছিণ্ডিকেট চলি আছে নেকি?কাৰ্বি আংলং জিলাৰ এই অবৈধ কয়লা খনিসমূহো যিকোনো মুহূৰ্ততে উমৰাংছ’ৰ দৰে অভিশপ্ত হৈ পৰিব পাৰে।
