যোৱা তিনি দিন ধৰি নিশাৰ ভাগত বগীবিল দলঙৰ ওপৰেদি চালানবিহীন অবৈধ শিল, বালি কঢ়িওৱা ট্রাক চলাচলক কেন্দ্র কৰি টি এম পি কে আৰু ঠিকাদাৰৰ মাজত সংঘাত চলি আছে। বগীবিল দলঙৰ নির্মাণৰ দায়িত্বত থকা এইচ চি চিয়ে এমাহ পূর্বে শিল, বালিৰ কাম সম্পূর্ণ কৰাৰ পাছত শিল, বালি কঢ়িয়াই নিয়াৰ কাম বন্ধ কৰে। কিন্তু ইয়াৰ পাছত আৰ ৱাই চি নির্মাণকাৰী সংস্থাই বিগত তিনি দিন ধৰি বগীবিল দলঙৰ ওপৰেদি নিশাৰ ভাগত ট্রাক পাৰ কৰাৰ ফলত নির্মাণকার্য স্তব্ধ হৈ পৰিছে।
জানিব পৰা মতে, এইচ চি চিৰ বাহনৰ বাহিৰে কোনো ধৰণৰ বাহন দলঙৰ ওপৰেদি পাৰ হ’ব নোৱাৰে বুলি ৰে’ল বিভাগে নির্দেশনা থকাৰ পাছতো নিশাৰ ভাগত আৰ ৱাই চিৰ বাহন বন বিভাগৰ আশীর্বাদত গোপনে চিলাপথাৰ হৈ ডিব্রুগড়লৈ পাৰ হোৱাক কেন্দ্র কৰি টি এম পি কেই সোমবাৰে ২০খন ট্রাক জব্দ কৰে ৷
ৰে’ল বিভাগৰ একাংশ বিষয়া, বন বিভাগৰ সহযোগত নিশাৰ ভাগত গোপনে বগীবিল দলং হৈ শিল, বালি কঢ়িয়াই নিয়া ট্রাক পাৰ হোৱা বুলি টি এম পি কেই প্রতিবাদ সাৱ্যস্ত কৰিছে ৷ নিশাৰ ভাগত চলা এই ট্ৰাকসমূহ অবৈধ বুলি দাবী কৰিছে সংগঠনটোৱে ৷
আনহাতে, চৰকাৰীভাৱে মুকলি কৰাৰ পূর্বেই ছিণ্ডিকেট চক্রই বগীবিল দলং মুকলি কৰাৰ অভিযোগ উঠিছে। বগীবিল দলঙৰ ওপৰেদি বিগত ৫ দিন ধৰি শ শ অবৈধ শিল, বালি কঢ়িওৱা ট্রাক নিশাৰ ভাগত পাৰ হোৱাক কেন্দ্র কৰি দেওবাৰে মাজনিশা উত্তপ্ত পৰিস্থিতিৰ সৃষ্টি হোৱাৰ পাছতে আৰক্ষী, অৰ্দ্ধ সামৰিক বাহিনী, আৰপিএফে কটকটীয়া নিৰাপত্তা বেষ্টনী গঢ়ি তোলে যদিও তাৰ পাছতো ট্রাকৰ চলাচল অব্যাহত থাকে৷
ইপিনে বগীবিল দলঙৰ নির্মাণকাৰী সংস্থা এইচ চি চিৰ তত্ত্বাৱধায়ক, দক্ষিণপাৰৰ দায়িত্বত থকা উপ মুখ্য অভিযন্তা আৰু সহকাৰী অভিযন্তাৰ ছত্ৰছায়াতে ছিণ্ডিকেট চলাৰ অভিযোগ তুলিছে টি এম পি কেই।