ক্ৰমাৎ সুস্থ হৈ উঠিছে কাৰাৰুদ্ধ অখিল গগৈ। আজি তেওঁক স্বাস্থ্য পৰীক্ষাৰ বাবে GMCH লৈ অনা হয়। সংবাদ মাধ্যমৰ আগত নিজৰ স্বাস্থ্য প্ৰসংগত প্ৰতিক্ৰিয়া প্ৰকাশ কৰি তেওঁ কয়, ‘কালিৰে পৰা গা-মন ভাল লাগি আছে।‘
একমাত্ৰ আদালতৰ নিৰ্দেশ তথা অসমৰ ৰাইজ আৰু সংবাদমাধ্যমৰ হেঁচাৰ বাবেহে তেওঁক চিকিৎসাৰ ব্যৱস্থা কৰা হৈছে বুলিও কৃষক নেতাগৰাকীয়ে মন্তব্য কৰে।
তাৎপৰ্যপূৰ্ণভাৱে জেইলৰ ভিতৰৰ খাদ্য আৰু চিকিৎসা ব্যৱস্থা অত্যন্ত বেয়া বুলি তেওঁ কেমেৰাৰ সন্মুখত উল্লেখ কৰি অনুন্নত খাদ্য আৰু চিকিৎসা ব্যৱস্থাৰ উন্নত সুবিধা নথকাৰ বাবেই ইতিমধ্যে বহুজন কয়দীয়ে জেইলৰ ভিতৰতে মৃত্যুক সাৱটি লোৱা বুলিও গুৰুতৰ অভিযোগ তোলে।
আনহাতে ৰাজ্যসভালৈ ‘কা’ বিৰোধী প্ৰাৰ্থী প্ৰক্ষেপ কৰিবলৈ আহ্বান কৰাৰ লগতে তেওঁ অসমবাসী ৰাইজক ‘কা’ৰ বিৰুদ্ধে ঐক্যবদ্ধ সংগ্ৰাম গঢ়ি তুলিবলৈ আহ্বান জনায়।
ইপিনে আজি GMCHৰ চৌহদত অখিল গগৈৰ লগতে কৃষক মুক্তি সংগ্ৰাম সমিতিৰ অন্যান্য নেতা-কৰ্মীসকলক কাৰাগাৰৰ পৰা মুক্তিৰ দাবীত সংগঠনটোৰ বহুকেইগৰাকী সদস্যই প্ৰতিবাদ সাব্যস্ত কৰে।
উল্লেখযোগ্য যে কিছুদিন পূৰ্বে কৃষক মুক্তি সংগ্ৰাম সমিতিয়ে অখিল গগৈৰ খাদ্য নলীৰ কেইবা ঠাইতো ঘাঁ লগা, কিডনিত পাথৰ হোৱা আৰু গেষ্ট্ৰিক আলছাৰত ভুগি থকা বুলি কৈছিল।
