ভাৰতৰ কফি উৎপাদনকাৰী অঞ্চলসমূহৰ বাবে এক উদ্বেগজনক খবৰ পোহৰলৈ আহিছে। জলবায়ু পৰিৱৰ্তন আৰু ইয়াৰ প্ৰভাৱৰ ওপৰত গৱেষণা কৰা বিজ্ঞানী আৰু যোগাযোগকাৰীৰ এটা স্বতন্ত্ৰ গোট ‘ক্লাইমেট চেণ্ট্ৰেল‘ৰ নতুন তথ্য অনুসৰি, শেহতীয়া বছৰকেইটাত দেশৰ কফি উৎপাদন হোৱা অঞ্চলবোৰত গৰমৰ মাত্ৰা অস্বাভাৱিকভাৱে বৃদ্ধি পাইছে। ২০২১ চনৰ পৰা ২০২৫ চনৰ ভিতৰত কৰা এক বিশ্লেষণত দেখা গৈছে যে জলবায়ু পৰিৱৰ্তনৰ বাবে ভাৰতৰ কফি বেল্টত বছৰি গড়ে ৩০ দিন অতিৰিক্ত বিপজ্জনক উষ্ণতা যোগ হৈছে। এই অতিৰিক্ত গৰমে কফি গছৰ স্বাভাৱিক বৃদ্ধি আৰু উৎপাদনত বিৰূপ প্ৰভাৱ পেলাইছে।
সাধাৰণতে কফি খেতিৰ বাবে এক নিৰ্দিষ্ট উষ্ণতাৰ প্ৰয়োজন হয়। কিন্তু পৰিসংখ্যা অনুসৰি, ভাৰতত বছৰি প্ৰায় ১১৮ দিন উষ্ণতা ৩০ ডিগ্ৰী চেলছিয়াছৰ ওপৰত থাকে। উল্লেখ্য যে ৩০ ডিগ্ৰী চেলছিয়াছৰ ওপৰৰ উষ্ণতাই কফি গছৰ ব্যাপক ক্ষতি কৰে। বিজ্ঞানীসকলে জনোৱা মতে, কাৰ্বন প্ৰদূষণ নথকা এখন পৃথিৱীত এই দিনবোৰৰ সংখ্যা বহুত কম হ’লহেঁতেন। কিন্তু মানৱসৃষ্ট কাৰ্বন প্ৰদূষণৰ ফলত হোৱা গোলকীয় উষ্ণতা বৃদ্ধিৰ বাবেই আজি কফি খেতিয়কসকলে এই অতিৰিক্ত ৩০ দিনৰ গৰমৰ প্ৰত্যাহ্বানৰ সন্মুখীন হবলগীয়া হৈছে।
বিশ্বৰ কফি উৎপাদনৰ মুঠ ৩.৫ শতাংশ ভাৰতৰ পৰা আহে আৰু দেশৰ বিভিন্ন ৰাজ্যত ইয়াৰ প্ৰভাৱ বেলেগ বেলেগ হোৱা দেখা গৈছে। ৰাজ্যিক পৰ্যায়ৰ তথ্যলৈ চালে দেখা যায় যে কেৰালাত জলবায়ু পৰিৱৰ্তনৰ ফলত বছৰি গড়ে ৬৫ দিন অতিৰিক্ত চৰম গৰমৰ সৃষ্টি হৈছে। তামিলনাডুত এনে দিনৰ সংখ্যা ৪৩ দিন আৰু ভাৰতৰ সৰ্ববৃহৎ কফি উৎপাদনকাৰী ৰাজ্য কৰ্ণাটকত বছৰি ৩২ দিন অতিৰিক্ত ক্ষতিকাৰক গৰম ৰেকৰ্ড কৰা হৈছে। কেৱল দক্ষিণ ভাৰতেই নহয়, উত্তৰ-পূব ভাৰতৰ ত্ৰিপুৰা আৰু দক্ষিণৰ তেলেংগানাতো গৰমৰ মাত্ৰা যথেষ্ট বৃদ্ধি পোৱা পৰিলক্ষিত হৈছে।
বিশেষজ্ঞসকলৰ মতে, ৩০ ডিগ্ৰী চেলছিয়াছৰ ওপৰৰ উষ্ণতাই কেৱল উৎপাদন হ্ৰাস কৰাই নহয়, বীনৰ গুণগত মানো নষ্ট কৰে। বিশেষকৈ আৰবিকা নামৰ কফিৰ জাতটো ৰবাষ্টাতকৈ অধিক তাপ সংবেদনশীল হোৱাৰ বাবে ইয়াৰ ওপৰত প্ৰভাৱ বেছিকৈ পৰে। ভাৰতৰ পশ্চিম ঘাট পৰ্বতমালাত মূলতঃ ৰবাষ্টা কফিৰ খেতি বেছিকৈ কৰা হয় যদিও বৃদ্ধি পোৱা উষ্ণতাই এতিয়া সকলো প্ৰকাৰৰ কফি খেতিৰে অনিষ্ট সাধন কৰিছে। কফি খেতিয়কসকলে ইতিমধ্যে এই পৰিৱৰ্তনৰ অভিজ্ঞতা লাভ কৰিছে আৰু তেওঁলোকে জনোৱা মতে, গৰম বৃদ্ধিৰ লগতে অনিয়মীয়া বৰষুণে গছৰ ফুল ফুলাৰ সময় সলনি কৰি দিছে।
ভাৰতৰ এই পৰিস্থিতিয়ে এক বিশাল গোলকীয় সংকটৰ ইংগিত দিছে। ক্লাইমেট চেণ্ট্ৰেলে বিশ্বৰ ২৫খন প্ৰধান কফি উৎপাদনকাৰী দেশৰ তথ্য বিশ্লেষণ কৰি পাইছে যে সকলো দেশেই জলবায়ু পৰিৱৰ্তনৰ বাবে অতিৰিক্ত গৰম দিনৰ সন্মুখীন হৈছে। বিশ্বৰ শীৰ্ষ পাঁচটা কফি উৎপাদনকাৰী দেশ ক্ৰমে ব্ৰাজিল, ভিয়েটনাম, কলম্বিয়া, ইণ্ডোনেছিয়া আৰু ইথিওপিয়াত বছৰি গড়ে ৫৭ দিন এনে ক্ষতিকাৰক গৰমৰ সৃষ্টি হৈছে। বিজ্ঞানীসকলে সকীয়াই দিছে যে যদিহে উষ্ণতা বৃদ্ধি আৰু বৰষুণৰ ধৰণ এনেদৰেই সলনি হৈ থাকে, তেন্তে আগন্তুক দশকবোৰত কফি খেতিৰ বাবে উপযুক্ত মাটি বিচাৰি পোৱাটো কঠিন হৈ পৰিব পাৰে।
