পাকিস্তানৰ খোদ সংসদ ভৱনৰ ভিতৰত স্বাধীন বালুচিস্তানৰ ধ্বনি উচ্চাৰিত হোৱাত স্বাভাৱিকতে অস্বস্তিত পৰিছে পাক প্ৰধানমন্ত্ৰী ইমৰাণ খান।
পাকিস্তানৰ সংসদত সেই সময়ত ভাষণ দি আছিল দেশ খনৰ বিদেশ মন্ত্ৰী শ্বাহ মেহমুদ কুৰেছিয়ে।
ইছলামৰ বিৰুদ্ধে ফ্ৰান্সৰ চৰকাৰে গ্ৰহণ কৰা স্থিতিৰ বিৰোধিতা কৰিবলৈ পাকিস্তানৰ সংসদত এক প্ৰস্তাৱ গ্ৰহণৰ যো-জা চলিছিল।
বিদেশ মন্ত্ৰী কুৰেছিয়ে ফ্ৰান্সৰ চৰকাৰ ক্ষুৰধাৰ সমালোচনা কৰাৰ মাজতে প্ৰসংগ টানি আনিছিল বালুচিস্তানৰ।
কুৰেছিয়ে তেওঁৰ ভাষণত বালুচিস্তানৰ একাংশ লোকে স্বাধীনতাৰ কথা কৈ অহাৰ বিপক্ষে ক’বলৈ আৰম্ভ কৰিছিল।
এনে সময়তে সংসদ ভৱনত উপস্থিত থকা বালুচিস্তানৰ সাংসদসকলে কুৰেছিৰ বক্তব্যৰ বিৰোধিতা কৰাৰ লগতে বালুচিস্তানৰ স্বতন্ত্ৰতাৰ হকে ধ্বনি দিবলৈ আৰম্ভ কৰে।
ঘটনাৰ আকস্মিকতাত হতভম্ব হৈ পৰা বিদেশ মন্ত্ৰী কুৰেছিয়ে তেওঁৰ ভাষণ আধাতে সামৰে ইয়াৰ বাবে বালুচিস্তানৰ সাংসদসকলক সমালোচনা কৰে।
কুৰেছিয়ে কয় যে বালুচিস্তানক অশান্ত কৰি তুলিবলৈ ভাৰতে ষড়যন্ত্ৰ ৰচনা কৰিছে।
বালুচিস্তানৰ একাংশ লোকে ভাৰতৰ ষড়যন্ত্ৰত ভৰি দিয়া বুলিও তেওঁ অভিযোগ কৰে।
ইপিনে খোদ সংসদ ভৱনতে স্বাধীন বালুচিস্তানৰ ধ্বনি উচ্চাৰিত হোৱাত সেই সময়ত সংসদত উপস্থিত থকা পাকিস্তানৰ প্ৰধানমন্ত্ৰী ইমৰাণ খান যথেষ্ট বিব্ৰত হৈ পৰা দেখা যায়।