এইচডিএফচি বেংক লিমিটেডে দেশৰ ৭৪সংখ্যক স্বাধীনতা দিৱসৰ দিনা সশস্ত্ৰ বাহিনীৰ লোকসকলৰ বাবে এক নতুন কাৰ্ড মুকলি কৰে৷
‘শৌৰ্য কেজিচি কাৰ্ড’ শীৰ্ষক এই অনন্য কাৰ্ডখন আমাৰ দেশৰ ৪৫ লক্ষাধিক ভাৰতীয় সশস্ত্ৰ বাহিনীৰ বাবে বিশেষ বৈশিষ্ট্য অন্তৰ্ভুক্ত কৰি সজ্জিত কৰা হৈছে৷
এই কাৰ্ডখন চৰকাৰৰ দ্বাৰা কিষাণ ক্ৰেডিট কাৰ্ডৰ নিৰ্দেশনাৱলীৰ অধীনত সামৰি লোৱা হৈছে৷
শৌৰ্য কেজিচি কাৰ্ডখনে সশস্ত্ৰ বাহিনীৰ লোকসকলক কৃষিজাত সামগ্ৰীৰ প্ৰয়োজনীয়তাসমূহ যেনে– শস্যৰ উৎপাদন, শস্য চপোৱাৰ পিছত প্ৰতিপালন আৰু ব্যয়ৰ আৱশ্যকতাসমূহৰ সুবিধা প্ৰদান কৰিব৷
তেওঁলোকে কৃষি কাৰ্যৰ যন্ত্ৰাদি, জলসিঞ্চনৰ সামগ্ৰী অথবা ভঁৰাল নিৰ্মাণ ইত্যাদিৰ বাবেও বিত্তপোষণৰ সুবিধা লাভ কৰিব৷
কাৰ্ডখনৰ প্ৰধান বৈশিষ্ট্য হ’ল– ২লাখ টকাৰ এখন গড় কাৰ্ডৰ বাবে ১০ লাখ টকাৰ লাইফ ক’ভাৰ; সৰল আৰু সহজ নথি-পত্ৰৰ ব্যৱস্থা য’ত ব্যক্তিৰ কায়িক উপস্থিতিৰ প্ৰয়োজন নহয়৷
এইচডিএফচি বেংকৰ গ্ৰামীণ বেংকিং গোটৰ ব্যৱসায়িক মুৰব্বী ৰাজিন্দৰ বাব্বৰৰ উপস্থিতিত বেংকটোৰ পৰিচালন সঞ্চালক আদিত্য পুৰীয়ে এই নতুন কাৰ্ডখন মুকলি কৰে৷
মুকলি অনুষ্ঠানত অংশগ্ৰহণ কৰি পুৰীয়ে কয়, ‘‘এই কাৰ্ডখনৰ জৰিয়তে আমাৰ সশস্ত্ৰ বাহিনী তথা তেওঁলোকৰ পৰিয়াললৈ উপযুক্ত সন্মান প্ৰদৰ্শন কৰা হৈছে৷ মই নিজে বায়ু সেনা বিভাগৰ পৰিয়ালৰ পৰা অহা হেতুকে তেওঁলোকে নিজৰ কৰ্তব্য সমাপনৰ খাতিৰত কৰা ত্যাগ আৰু কঠোৰ পৰিশ্ৰমসমূহ স্বচক্ষে প্ৰত্যক্ষ কৰিছো৷ তেওঁলোকৰ বাবে কিবা এটা কৰিবলৈ পাই মই মোৰ কেৰিয়াৰ সম্পূৰ্ণ হোৱা বুলি অনুভৱ কৰিছো৷ ইয়াৰ জৰিয়তে কৃষকসকলৰ লগতে সেনাবাহিনীসকললৈও আমি সম পৰ্যায়ৰ সামগ্ৰী মুকলি কৰাৰ অৱকাশ লাভ কৰিছো৷ এয়া আমাৰ ৰক্ষকসকলৰ প্ৰতি স্বাধীনতা দিৱসৰ উপহাৰ৷ জয় জোৱান, জয় কিষাণ, জয় হিন্দ৷’’
দেশৰ গ্ৰামাঞ্চল তথা বেংকৰ সুবিধাৰ আওতাৰ বাহিৰত থকা লোকসকললৈ বেংকিঙৰ সুবিধা প্ৰদানৰ বাবে এইচডিএফচিৰ ‘হৰ গাওঁ হামাৰা’ শীৰ্ষক পদক্ষেপৰ অধীনত এই কাৰ্ডখন মুকলি কৰা হৈছে৷
বেংকটোৱে ইতিমধ্যেই সমগ্ৰ ভাৰততে পাঁচ লক্ষাধিক কৃষি ঋণ প্ৰদান কৰাৰ লগতে ১২টা কৃষি ধন বিকাশ কেন্দ্ৰও স্থাপন কৰিছে৷
ইয়াৰ জৰিয়তে কৃষকসকলে ভূমি পৰীক্ষণ তথা কৃষিৰ বাবে উপযুক্ত শ্ৰেষ্ঠতম তথ্য আহৰণৰ সুবিধা লাভ কৰিছে৷
সশস্ত্ৰ বাহিনীসকলৰ বিত্তীয় প্ৰয়োজনীয়তাৰ প্ৰতি লক্ষ্য ৰাখি ঋণৰ সুবিধা নিম্নোক্ত ধৰণে সজ্জিত কৰা হৈছে—
১. এইচডিএফচি বেংকৰ শাখা পৰিদৰ্শন
২. শেহতীয়াকৈ মুকলি কৰা এইচডিএফচি বেংক ই-কিষাণধন এপৰ জৰিয়তে ঋণৰ আবেদন
৩. টোল ফ্ৰী নম্বৰ ১৮০০ ১২০ ৯৬৫৫ আইভিআৰলৈ ডায়েল কৰি।
