ভাৰত আৰু থাইলেণ্ডৰ দীৰ্ঘদিনীয়া বন্ধুত্বত নতুন শক্তি আৰু গতি সংযোজন কৰি আজি বৃহস্পতিবাৰে বেংককৰ চৰকাৰী আৱাসত থাইলেণ্ডৰ প্ৰধানমন্ত্ৰী পেয়েতংটাৰ্ণ শ্বিনাৱাত্ৰাৰ সৈতে এক ফলপ্ৰসূ বৈঠকত মিলিত হয় প্ৰধানমন্ত্ৰী নৰেন্দ্ৰ মোদী।
এই বৈঠকৰ সময়ত দুয়োগৰাকী নেতাই দ্বিপাক্ষিক সহযোগিতাৰ বিভিন্ন ক্ষেত্ৰত বিতংভাৱে আলোচনা কৰি দুয়োখন দেশৰ মাজৰ সম্পৰ্কক ‘কৌশলগত অংশীদাৰিত্ব’ৰ পৰ্যায়লৈ উন্নীত কৰাৰ সিদ্ধান্ত গ্ৰহণ কৰে। এই ভ্ৰমণৰ সময়ত ভাৰত আৰু থাইলেণ্ডে বিভিন্ন ক্ষেত্ৰত কেইবাখনো বুজাবুজি চুক্তিত স্বাক্ষৰ কৰে, যাৰ ফলত দুয়োখন দেশৰ সম্পৰ্ক আৰু অধিক গভীৰ হ’ব।
মোডী আৰু শ্বিনাৱাত্ৰাৰ মাজত হোৱা বৈঠকৰ পিছত ভাৰত-থাইলেণ্ডৰ কৌশলগত অংশীদাৰিত্ব স্থাপনৰ বাবে এক যৌথ ঘোষণাত স্বাক্ষৰ কৰা হয়। ইয়াৰ উপৰিও ডিজিটেল প্ৰযুক্তি, সংস্কৃতি, ক্ষুদ্ৰ আৰু মজলীয়া উদ্যোগ (এম এছ এম ই) আৰু উত্তৰ-পূব ভাৰতৰ উন্নয়নৰ ক্ষেত্ৰত সহযোগিতাৰ বাবে কেইবাখনো বুজাবুজি চুক্তিৰ আদান-প্ৰদান কৰা হয়।
ডিজিটেল প্ৰযুক্তিৰ ক্ষেত্ৰত সহযোগিতাৰ বাবে থাইলেণ্ডৰ ডিজিটেল অৰ্থনীতি আৰু সমাজ মন্ত্ৰালয় আৰু ভাৰতৰ ইলেক্ট্ৰনিকছ আৰু তথ্য প্ৰযুক্তি মন্ত্ৰালয়ৰ মাজত বুজাবুজি চুক্তি স্বাক্ষৰিত হয়।
ভাৰতৰ জাহাজ, বন্দৰ আৰু জলপথ মন্ত্ৰালয়ৰ সাগৰমালা বিভাগ আৰু থাইলেণ্ডৰ সাংস্কৃতিক মন্ত্ৰালয়ৰ সুকুমাৰ কলা বিভাগে গুজৰাটৰ লোথালত ৰাষ্ট্ৰীয় সামুদ্ৰিক ঐতিহ্য কমপ্লেক্স (এন এম এইচ চি) উন্নয়নৰ বাবে বুজাবুজি চুক্তি স্বাক্ষৰ কৰে।
ইয়াৰ উপৰিও নেশ্যনেল ক্ষুদ্ৰ উদ্যোগ নিগম লিমিটেড (এন এছ আই চি) আৰু থাইলেণ্ডৰ ক্ষুদ্ৰ আৰু মজলীয়া উদ্যোগ প্ৰচাৰ কাৰ্যালয়ে (অ’ এছ এম ই পি)য়ে ক্ষুদ্ৰ আৰু মজলীয়া উদ্যোগত সহযোগিতাৰ বাবে চুক্তিত স্বাক্ষৰ কৰে। উত্তৰ-পূব ভাৰতৰ উন্নয়ন মন্ত্ৰালয় (ডনাৰ) আৰু থাইলেণ্ডৰ বৈদেশিক পৰিক্ৰমা মন্ত্ৰালয়ৰ মাজতো এক বুজাবুজি চুক্তি স্বাক্ষৰিত হয়। নৰ্থ-ইষ্ট হেণ্ডিক্ৰাফ্টছ এণ্ড হেণ্ডলুমছ ডেভেলপমেণ্ট কৰ্পৰেশ্যন লিমিটেড (এন ই এইচ এইচ ডি চি) আৰু থাইলেণ্ডৰ ক্ৰিয়েটিভ ইকনমি এজেন্সীয়ে (চি ই এ) সহযোগিতা চুক্তিত স্বাক্ষৰ কৰে।
বৃহস্পতিবাৰে পুৱা থাইলেণ্ডত উপস্থিত হোৱাৰ পিছত বেংককত আনুষ্ঠানিকভাৱে প্ৰধানমন্ত্ৰী নৰেন্দ্ৰ মোডীক আদৰণি জনোৱা হয়। বেংককত ভাৰতীয় সমাজে তেওঁক উষ্ম আদৰণি জনায়। মোদীয়ে এক্সত লিখিছে, “বেংককত ভাৰতীয় সম্প্ৰদায়ে আগবঢ়োৱা উষ্ম আদৰণিৰ বাবে কৃতজ্ঞ। ভাৰত আৰু থাইলেণ্ডৰ মাজত গভীৰ সাংস্কৃতিক বন্ধন আমাৰ জনসাধাৰণৰ জৰিয়তে স্পষ্ট হৈ পৰিছে। ইয়াত এই সংযোগ ইমান শক্তিশালীভাৱে প্ৰতিফলিত হোৱাটো উৎসাহজনক।”
মোদীয়ে তেওঁৰ বিদায়ী বিবৃতিত কয়, “মই বিমষ্টেক দেশসমূহৰ নেতাসকলক সাক্ষাৎ কৰি আমাৰ জনসাধাৰণৰ স্বাৰ্থত সহযোগিতা আৰু অধিক শক্তিশালী কৰাৰ বাবে উৎপাদনশীলভাৱে জড়িত হ’বলৈ আগ্ৰহী।” বৈঠকত প্ৰতিৰক্ষা, বাণিজ্য, সংযোগ, প্ৰযুক্তি, সংস্কৃতি আদি ক্ষেত্ৰত দুয়োখন দেশৰ মাজত সহযোগিতা বৃদ্ধিৰ উপায়ৰ বিষয়ে আলোচনা কৰা হয়।
ভাৰত আৰু থাইলেণ্ডৰ মাজত ঐতিহাসিকভাৱে উষ্ণ সম্পৰ্ক আছিল, বৌদ্ধ ধৰ্ম, ভাষা আৰু সংস্কৃতিৰ জৰিয়তে গভীৰভাৱে সংযুক্ত। এই ভ্ৰমণৰ জৰিয়তে দুয়োখন দেশৰ মাজত বাণিজ্য আৰু অধিক বৃদ্ধিৰ পৰিকল্পনা কৰা হৈছে, যিটো বৰ্তমান ১৫ বিলিয়ন ডলাৰৰ ওচৰ চাপিছে। ভাৰতৰ ‘এক্ট ইষ্ট’ নীতি আৰু ভাৰত-প্ৰশান্ত মহাসাগৰীয় দৃষ্টিভংগীত থাইলেণ্ড এক গুৰুত্বপূৰ্ণ অংশীদাৰ।
প্ৰধানমন্ত্ৰী মোদীয়ে ৪ এপ্ৰিলত বেংককত অনুষ্ঠিত হ’বলগীয়া ষষ্ঠ বিমষ্টেক (বে অৱ বেংগল ইনিচিয়েটিভ ফৰ মাল্টি-ছেক্টৰেল টেকনিকেল এণ্ড ইকনমিক ক’অপাৰেশ্যন) শীৰ্ষ সন্মিলনত অংশগ্ৰহণ কৰিব। এই সন্মিলনত ভাৰত, থাইলেণ্ড, বাংলাদেশ, শ্ৰীলংকা, নেপাল, ম্যানমাৰ আৰু ভূটানৰ নেতাসকলে অংশগ্ৰহণ কৰিব। সন্মিলনৰ বিষয়বস্তু হৈছে ‘বিমষ্টেক – সমৃদ্ধি, স্থিতিস্থাপক আৰু উন্মুক্ত’। এই সন্মিলনে সামুদ্ৰিক পৰিবহণ সহযোগিতা চুক্তি স্বাক্ষৰ কৰি ‘বেংকক ভিজন ২০৩০’ গ্ৰহণ কৰাৰ সম্ভাৱনা আছে।
থাইলেণ্ডৰ পৰা ৪-৬ এপ্ৰিললৈ দুদিনীয়া ভ্ৰমণসূচীৰে শ্ৰীলংকা ভ্ৰমণ কৰিব প্ৰধানমন্ত্ৰী মোদীয়ে। শ্ৰীলংকাৰ নতুন ৰাষ্ট্ৰপতি অনুৰা কুমাৰ দিশানায়েকৰ আমন্ত্ৰণত এই ৰাষ্ট্ৰীয় ভ্ৰমণ হ’ব। এই ভ্ৰমণৰ সময়ত মোদীয়ে শ্ৰীলংকাৰ নেতৃত্বৰ সৈতে দ্বিপাক্ষিক সম্পৰ্ক শক্তিশালী কৰাৰ বিষয়ে আলোচনা কৰাৰ লগতে ভাৰতৰ সহায়ত ৰূপায়িত প্ৰকল্পসমূহ উদ্বোধন কৰিব।
