আজিৰ পৰা মেঘালয়ৰ উমৰৈত ভাৰত আৰু বাংলাদেশৰ মাজত “সম্প্ৰীতি” শীৰ্ষক ১৪ দিনীয়া যুটীয়া সামৰিক অনুশীলন আৰম্ভ হৈছে। দেশ দুখনৰ মাজত হোৱা যুটীয়া সামৰিক অনুশীলনটোৰ ই নৱম সংস্কৰণ।
এই সামৰিক অনুশীলনৰ প্ৰধান গুৰুত্ব হ’ব পাহাৰীয়া আৰু অৰণ্য অঞ্চলত সন্ত্ৰাসবাদৰ সৈতে মোকাবিলা কৰা।
যুটীয়া অভিযানবোৰত আন্তঃঅভিযান-সক্ষমতাত উপনীত হ’বলৈ এটা কমাণ্ড পোষ্ট এক্সাৰছাইজ (CPX) আৰু ফিল্ড ট্ৰেইনিং এক্সাৰছাইজ (FTX) সমান্তৰালভাৱে সম্পন্ন কৰা হ’ব বুলি তেজপুৰস্থিত সামৰিক ঘাটিৰ পৰা প্ৰেৰিত এটা বিবৃতিত জনাইছে।
যুটীয়া অনুশীলনটোত বাংলাদেশ সেনাৰ ৩১জন বিষয়া আৰু ১৩৮জন অন্যান্য জোৱান আৰু ভাৰতীয় সেনাৰ এটা কোম্পানি গ্ৰুপে অংশগ্ৰহণ কৰিব।
অনুশীলনৰ সময়ত দুয়োখন দেশৰ সেনাই পৰস্পৰক বিভিন্ন কৌশলৰ ড্ৰিল আৰু প্ৰচিডিউৰবোৰ দেখুৱাব আৰু পিছত যুটীয়াভাৱে কৰ্ডন আৰু ছাৰ্চ, ৰেইড আৰু হাউছ ক্লিয়েৰেন্স ড্ৰিলত অংশ ল’ব।
বাংলাদেশৰ দলটোক নেতৃত্ব দিছে ব্ৰিগেডিয়াৰ জেনেৰেল মহম্মদ শফিউল আজামে।
অহা ১৬ ফেব্ৰুৱাৰিত যুটীয়া অনুশীলনটোৰ সামৰণি পৰিব।