ম্যানমাৰত চলি থকা গৃহযুদ্ধৰ সময়ত সেনাৰ বিমান আক্ৰমণ আৰু হিংসাৰ পৰা ৰক্ষা পাবলৈ এই শৰণাৰ্থীসকলে ভাৰতত আশ্ৰয় লৈছিল। শেহতীয়াকৈ ম্যানমাৰৰ পৰিস্থিতি উন্নত হোৱা বুলি কৈ ভাৰত চৰকাৰে নতুন শৰণাৰ্থীক প্ৰৱেশৰ অনুমতি দিয়া বন্ধ কৰি দিছে। এই সিদ্ধান্তক বিশ্বৰ মানৱীয় সংগঠনসমূহে সমালোচনা কৰিছে, যিয়ে যুক্তি দিছে যে ইয়াৰ ফলত শৰণাৰ্থীসকল বিপদত পৰে। ২০২৪ চনৰ মে’ মাহত আন্তঃৰাষ্ট্ৰীয় ন্যায়িক আয়োগে মণিপুৰৰ পৰা ৭৭ জন ম্যানমাৰৰ শৰণাৰ্থীক বিতাড়িত কৰাৰ ফলত মানুহক বিপদজনক স্থানলৈ ঘূৰাই পঠোৱাৰ বিৰুদ্ধে আন্তঃৰাষ্ট্ৰীয় নিয়ম উলংঘা কৰা বুলি প্ৰকাশ কৰিছিল।
২০২৪ চনৰ জুন মাহত ম্যানমাৰৰ পৰা প্ৰায় ৫৪০০ লোকে কামজোঙত বাস কৰিছিল, য’ত বেছিভাগেই টাংখুল নগা সম্প্ৰদায়ৰ লোকে বসবাস কৰে। গণতন্ত্ৰ সমৰ্থক গোটৰ সৈতে যুঁজি থকা ম্যানমাৰ সেনাৰ বোমা বিস্ফোৰণ আৰু আক্ৰমণৰ পৰা হাত সাৰিবলৈ সীমান্ত অতিক্ৰম কৰিছিল। সেনাৰ এই কাৰ্যত সাধাৰণ নাগৰিকৰ মাজত যথেষ্ট ক্ষতিসাধন হৈছে।
সম্প্ৰতি কামজোঙৰ বিভিন্ন নগা গাঁও, যেনে- নামলি, ৱাংগলী, কে আছাং খুল্লেন, চোৰো, পিললং, ফাইকোক, হুইমিন থানা আৰু চাংকালোকত এতিয়াও প্ৰায় ৭ হাজাৰ শৰণাৰ্থী আছে। ভাৰতীয় কৰ্তৃপক্ষই পাঁচ বছৰৰ তলৰ শিশু বাদ দি ইয়াৰে ৬ হাজাৰৰ বায়’মেট্ৰিক তথ্য সংগ্ৰহ কৰি স্থানীয় লোকৰ পৰা পৃথকে পৰিচয় পত্ৰ প্ৰদান কৰিছে।
মণিপুৰৰ এখন স্থানীয় বাতৰি কাকত প্ৰকাশিত তথ্য অনুসৰি কামজং জিলাত আশ্ৰয় লৈ থকা ৫ হাজাৰতকৈ অধিক ম্যানমাৰৰ শৰণাৰ্থী নিজৰ দেশলৈ ঘূৰি গৈছে। প্ৰতিবেদন অনুসৰি কিছু শৰণাৰ্থী দিনৰ ভাগত খেতি বা অন্যান্য কামৰ বাবে ম্যানমাৰৰ নিজৰ গাঁৱলৈ উভতি যায় আৰু সন্ধিয়া কামজংলৈ উভতি যায়। স্থানীয় প্ৰশাসনে অসম ৰাইফলছ আৰু মণিপুৰ চৰকাৰৰ সহযোগত তেওঁলোকক খাদ্য আৰু অত্যাৱশ্যকীয় সামগ্ৰী যেনে বাচন-বৰ্তন, বাল্টি, তিৰপাল, টিনৰ চাদৰ যোগান ধৰিছে।
ম্যানমাৰৰ শৰণাৰ্থীৰ আগমনৰ ফলত মণিপুৰত বিশেষকৈ ২০২৩ চনৰ মে’ মাহৰ পৰা কুকি সম্প্ৰদায়ৰ সৈতে সংঘাতত লিপ্ত হোৱা মেইটেই সম্প্ৰদায়ৰ মাজত উত্তেজনাৰ সৃষ্টি হৈছে। ভাৰতে শৰণাৰ্থীসকলক উভতাই পঠোৱাৰ সিদ্ধান্তক সমালোচনা কৰিছে মানৱীয় সংগঠনে, ম্যানমাৰৰ হিংসাৰ পৰা পলায়ন কৰা লোকসকলক সুৰক্ষা দিবলৈ চৰকাৰক আহ্বান জনাইছে।
