বেটিং নে বলিং? চেম্পিয়নছ ট্ৰফীত ভাৰতৰ উদ্বোধনী মেচত কোনটো বিভাগে দৃষ্টি কাঢ়িলে? ৰোহিত শৰ্মাই সন্তুষ্টিৰ হাঁহি মাৰি ক’বই পাৰে, ইয়াকে কয় টীম গেম। য‘ত মহম্মদ ছামীয়ে প্ৰত্যাৱৰ্তনতে ৫ উইকেট দখল কৰি যশপ্ৰীত বুমৰাহৰ অনুপস্থিতিৰ অভাৱ ভালদৰে পূৰণ কৰে।
ইপিনে, শুভমান গিলে ৰোহিত আৰু কোহলীৰ ওপৰত নিৰ্ভৰশীলতাক অতিক্ৰম কৰি কঠিন পিটচত শীতল মস্তিষ্কৰে শতক অৰ্জন কৰি দেখুৱালে যে তেওঁ টিম ইণ্ডিয়াৰ উজ্জ্বল ভৱিষ্যত।
যোৱা পাঁচখন এদিনীয়া মেচলৈ চালে ভাৰতে বাংলাদেশৰ বিৰুদ্ধে দুখনত জয়লাভ কৰিছে৷ মুছফিকুৰৰ দলটোৱে তিনিখনতে জয়লাভ কৰে। অৱশ্যে সেই দল আৰু বৰ্তমান বাংলাদেশৰ দলটোৰ মাজত এক বৃহৎ পাৰ্থক্য আছে। দলটোত অভিজ্ঞ তাৰকাৰ অভাৱ স্পষ্ট। বাংলাদেশৰ ইনিংছৰ আৰম্ভণিতে সেই কথা যথেষ্ট স্পষ্ট হৈ পৰিছিল। পাৱাৰ প্লে’ত ইটোৰ পিছত সিটো উইকেট দখল কৰি ছামী আৰু হৰ্ষিতে টাইগাৰ্ছ বাহিনীৰ বেটিং লাইন আপক চাপত পেলাইছিল। অৱশ্যে চাপত পৰিও তৌহিদ হৃদয়ে চাপ চম্ভালি শতক অৰ্জন কৰিবলৈ সক্ষম হয়।
দুয়োটা ইনিংছত মুঠ ৯৬.৩ অভাৰ খেলা হয়। য’ত হৃদয়ৰ দলটোৱে নিৰ্ধাৰিত ৫০ অভাৰে খেলিছিল। তথাপিও এটা সময়ত এনে লাগিছিল যেন বাংলাদেশে ১০০ ৰান অতিক্ৰম কৰিব পাৰিব নে নাই। কিন্তু মিছ কৰা কেচৰ মূল্য ভৰিবলগীয়া হ’ল ভাৰতে। আৰু সেই সুযোগতে হৃদয়ে স্পিন আৰু ছুইঙৰ চাপ সহ্য কৰিবলৈ সক্ষম হৈ শতক অৰ্জন কৰে। জাকেৰ আলী হৈ পৰিল তেওঁৰ যোগ্য সংগী। অৱশ্যে চেম্পিয়নছ ট্ৰফীৰ আৰম্ভণিতে ছামীয়ে যিদৰে নিজকে তুলি ধৰিলে সেইটোৱে নিঃসন্দেহে ৰোহিত আৰু গম্ভীৰক সকাহ দিব।
মেচৰ পূৰ্বে ৰোহিতে কৈছিল যে সেইদিনা টছত জয়ী হ’লে বলিং কৰাৰ সিদ্ধান্ত ল’লেহেঁতেন। তাত বাংলাদেশৰ অধিনায়কগৰাকীৰ বেটিং কৰাৰ সিদ্ধান্তও বুমেৰাং হৈ পৰিল। ফলত বাংলাদেশে কেতিয়াও ভাৰতৰ ওপৰত চাপ প্ৰয়োগ কৰিব পৰা নাছিল। এদিনীয়া মেচত ২২৮ ৰান অতিক্ৰম কৰা এতিয়া কাৰ্যতঃ ভাতৰ লগত পানী খোৱাৰ দৰে হৈ পৰিছে। সেইটোও ৰেংকিঙৰ শীৰ্ষত থকা ভাৰতৰ হাতত। সেয়ে, ভাৰতে বেটিং কৰিবলৈ ওলোৱাৰ আগতে খেলখন কিছু একপক্ষীয় হৈ পৰিছিল। অৱশেষত ২১টা বল বাকী থকা অৱস্থাত ছয় মাৰি খেলখন সমাপ্ত কৰে কে এল ৰাহুলে।
হয়, এইটো সঁচা যে ডুবাইয়ে ইয়াত ৰোহিত বা বিৰাটৰ ডাঙৰ ইনিংছৰ সাক্ষী হ’ব নোৱাৰিলে। কিন্তু হতাশ হোৱাৰ কোনো প্ৰয়োজন নাছিল। শুভমন গিলে অনুৰাগীসকলক এক দৃষ্টিনন্দন শতক প্ৰদান কৰে। চেম্পিয়নছ ট্ৰফীত তেওঁৰ এইটোৱেই প্ৰথম শতক। আৰু এদিনীয়া ক্ৰিকেটত অষ্টমটো।
ডুবাইলৈ উৰাজাহাজেৰে যোৱাৰ আগতে প্ৰাক্তন খেলুৱৈসকলে বাৰে বাৰে ৰোহিতক এটাই উপদেশ দিছিল। কাৰোবাৰ ওপৰত নিৰ্ভৰশীল হোৱাটো বন্ধ কৰিব লাগিব। দলীয় খেল খেলিব লাগিব। বৃহস্পতিবাৰৰ দিনা যেন ছিনিয়ৰসকলৰ আদেশ পালন কৰিলে দলটোৱে। ভাৰত-পাকৰ সংঘৰ্ষৰ পূৰ্বে উৎকৃষ্ট ফৰ্মত আছে টিম ইণ্ডিয়া। ক্ৰিকেটাৰ আৰু অনুৰাগীৰ লগতে গৌতম গম্ভীৰ নিশ্চিতভাৱে সন্তুষ্ট এই প্ৰদৰ্শনত।
সংক্ষিপ্ত স্কোৰঃ
বাংলাদেশঃ ২২৮/১০ (হৃদয়-১০০, জাকেৰ-৬৮, ছামী-৫/৫৩, হৰ্ষিত-৩১/৩)
ভাৰতঃ ২৩১/৪ (ৰোহিত-৪১, গিল-১০১*, ৰাহুল-৪১*, ৰিশদ-২/৩৮)
ভাৰতে ৬ উইকেটত জয়লাভ কৰে।
