এখন নিয়মৰক্ষাৰ মেচ। কিন্তু সেই খেলখনতো শেষ মুহূৰ্তলৈকে চলি থাকিল শিহৰণকাৰী যুঁজ। বাৰে বাৰে মেচৰ ৰং সলনি হৈ গ’ল। বেট আৰু বলৰ যুদ্ধই ছুপাৰ অভাৰ পোৱালেগৈ। দ্ৰুত ৰান সংগ্ৰহ কৰাৰ বাবে খেলপথাৰ এৰি ওলাই আহিল অধিনায়ক। তেওঁ নিজৰ যুৱ সতীৰ্থৰ ওপৰত ভৰসা ৰাখিলে।
কিন্তু এটা ছুপাৰ অভাৰতো মেচৰ নিষ্পত্তি নহ’ল। মুঠতে ক্ৰীড়াপ্ৰেমীসকলে সম্পূৰ্ণ ক্ৰিকেট উপভোগ কৰিলে। ভাৰতৰ মুখত শেষ হাঁহি বিৰিঙিল চিন্নাস্বামী ষ্টেডিয়ামত। কিন্তু দিনটোৰ শেষত জয়ী হ’ল ক্ৰিকেটেই। বিশ্বকাপৰ পূর্বে টী-২০ ছিৰিজত দলটোৰ প্রদর্শনে ভাৰতীয় ক্ৰিকেট অনুৰাগীক নিশ্চয় আশ্বস্ত কৰিব৷
আফগানিস্তানৰ বিৰুদ্ধে খেলখনৰ আৰম্ভণিতে বেটিং দুৰ্যোগৰ সন্মুখীন হ’বলগীয়া হয় ভাৰত। মাত্ৰ ২২ ৰানত চাৰিটা উইকেট হেৰুৱাই ভাৰতীয় ইনিংছ শলঠেকত পৰে। তাৰ পৰাই ভাৰতীয় অধিনায়কগৰাকীৰ ৰিংকু সিঙক লগত লৈ প্ৰত্যাৱৰ্তনৰ সংগ্ৰাম আৰম্ভ হ’ল।
ৰোহিতে মন্থৰ আৰম্ভণি কৰিছিল যদিও অৱশেষত ৬৯টা বলত ১২১ ৰান সংগ্ৰহ কৰে। টী-২০ আন্তঃৰাষ্ট্ৰীয় মেচত পাঁচটা শতক অৰ্জন কৰা একমাত্ৰ বেটছমেন হৈ পৰিল হিটমেন। ৰিংকুৱেও অধিনায়কৰ সৈতে ১৯০ ৰানৰ পাৰ্টনাৰশ্বিপ গঢ়ি তুলি এক নজিৰ সৃষ্টি কৰিলে। শেষত ভাৰতে ২১২ ৰানত ৰৈ যায়।
ৰহমানুল্লাহ গুৰবাজ আৰু ইব্ৰাহিম জাদ্ৰানে বিশাল ৰানৰ লক্ষ্য খেদিবলৈ আৰম্ভ কৰে। দুয়োজনে অৰ্দ্ধশতৰাণ কৰে। অৱশ্যে ১৩ অভাৰৰ অন্তত পুনৰ খেলখনলৈ উভতি আহে ভাৰত। একেৰাহে কেইবাটাও উইকেট হেৰুৱাই আফগান ব্ৰিগেড চাপত পৰে।
কিন্তু গুলবাদিন নাইবে শীতল মস্তিস্কৰে শেষ বলটোলৈকে যুঁজ দি থাকিল। মহম্মদ নবীয়েও যোগ্য সংগ দিয়ে। নিৰ্ধাৰিত ২০ অভাৰৰ শেষত আফগানিস্তানেও ২১২ ৰানত ৰৈ যায়। মেচখন ছুপাৰ অভাৰলৈ যায়।
প্ৰথম ছুপাৰ অভাৰত আফগানিস্তানে ১৬ ৰান সংগ্ৰহ কৰে। সেই ৰান অতিক্ৰম কৰিবলৈ ৰোহিতে দুটা ছয় মাৰিছিল। কিন্তু শেষৰ বলত দুটা ৰানৰ প্ৰয়োজন হোৱাত হিটমেনে খেলপথাৰ এৰি যায়। দৌৰিবলৈ সুবিধা হ’ব বুলি ভাবি ৰিংকুক নমোৱা হ’ল। কিন্তু ভাৰতেও ১৬ ৰানত আবদ্ধ হৈ পৰে।
দ্বিতীয় ছুপাৰ অভাৰত টীম ইণ্ডিয়াৰ যোদ্ধাসকলে নিশ্চিতভাৱে আধিপত্য বিস্তাৰ কৰিছিল। ১২ ৰান অতিক্ৰম কৰিবলৈ গৈ ৰবি বিষ্ণয়ৰ ঘূৰ্ণীত আৱদ্ধ হৈ পৰে আফগান বেটছমেনসকল। তিনিটা বলৰ ভিতৰতে হেৰুৱালে দুটা উইকেট। খেল সম্পূৰ্ণ হ’ল। মেচখনত জয়ী হৈ ভাৰতে শৃংখলাটো হোৱাইটৱাছ কৰিলে।
সংক্ষিপ্ত স্কোৰঃ
ভাৰতঃ ২১২/৪ (ৰোহিত ১২১*, ৰিংকু ৬৯*)
আফগানিস্তানঃ ২১২/৬ (গুলবাদিন ৫৫*, গুৰবাজ ৫০)
দুটা ছুপাৰ অভাৰৰ অন্তত ভাৰতৰ জয়লাভ।
