নেতিবাচক বহু খৱৰৰ মাজতে মোদী চৰকাৰৰ বাবে এটা ভাল খৱৰ আহিল। ভাৰত বিশ্বৰ পঞ্চমখন বৃহৎ অৰ্থনীতিৰ দেশ হৈ পৰিল।
২.৯৪ ট্ৰিলিয়ন ডলাৰ অৰ্থনীতিৰে সৈতে ভাৰতে ২০১৯ত ব্ৰিটেইন আৰু ফ্ৰান্সকো পাছ পেলাইছে।
প্ৰধান মন্ত্ৰী মোদীয়ে আগন্তুক পাঁচ বছৰৰ ভিতৰত ভাৰতক ৫ ত্ৰিলিয়ন ডলাৰৰ অৰ্থনীতিৰ দেশ কৰি গঢ়ি তোলাৰ লক্ষ্য লৈছে।
আমেৰিকাৰ গৱেষণামূলক সংস্থা ৱৰ্ল্ড পপুলেশ্যন ৰিভিউয়ে তেওঁলোকৰ প্ৰতিবেদনত কৈছে যে আত্মনিৰ্ভৰশীল কৰি তোলাৰ পূৰ্বৰ নীতিৰে ভাৰত এতিয়া আগবাঢ়ি এক মুক্ত বজাৰ অৰ্থনীতিৰ ৰূপত বিকশিত হ’বলৈ ধৰিছে।
প্ৰতিবেদনত কোৱা হৈছে যে ‘সকলো ঘৰুৱা উৎপাদন (জিডিপি)ৰ ক্ষেত্ৰত ভাৰত ২.৯৪ লাখ কোটি (ট্ৰিলিয়ন) ডলাৰৰ সৈতে বিশ্বৰ বিশ্বৰ পঞ্চমখন বৃহৎ অৰ্থনীতিৰ দেশ হৈ পৰিছে। এইক্ষেত্ৰত ই ২০১৯ত ব্ৰিটেইন আৰু ফ্ৰান্সকো পাছ পেলাইছে।‘
ব্ৰিটেইনৰ অৰ্থনীতিৰ পৰিসৰ বৰ্তমান ২.৮৩ ট্ৰিলিয়ন ডলাৰ আৰু ফ্ৰান্সৰ ২.৭ ট্ৰিলিয়ন ডলাৰ।
ক্ৰয় শক্তি সমতাৰ আধাৰত ভাৰত জিডিপি ১০.৫১ ট্ৰিলিয়ন ডলাৰ আৰু এইটো জাপান তথা জাৰ্মানীতকৈ আগবঢ়া।
অৱশ্যে, অধিক জনসংখ্যাৰ ভাৰতত প্ৰতিজন ব্যক্তিৰ জিডিপি মাত্ৰ ২১৭০ ডলাৰ। আমেৰিকাত প্ৰতিজন ব্যক্তিৰ জিডিপি হৈছে ৬২,৭৯৪ডলাৰ।
প্ৰতিবেদনত কংগ্ৰেছৰ শাসনকালত আৰম্ভ কৰা উদাৰীকৰণৰো প্ৰশংসা কৰা হৈছে। প্ৰতিবেদনত কোৱা হৈছে যে ভাৰতত অৰ্থনৈতিক উদাৰীকৰণ ১৯৯০ৰ দশকত আৰম্ভ কৰা হৈছিল।
উদ্যোগক নিয়ন্ত্ৰণ মুক্ত কৰাৰ লগতে বৈদেশিক বাণিজ্য আৰু বিনিয়োগত নিয়ন্ত্ৰণ সীমিত কৰা হয়। ইয়াৰ লগতে চৰকাৰী কোম্পানীসমূহক ব্যক্তিগতকৰণ কৰা হয়।
এই ধৰণেৰে ভাৰতে আৰ্থিক বিকাশ ক্ষিপ্ৰ কৰি তোলাত সহায় কৰে। এই প্ৰতিবেদন প্ৰস্তুত কৰা আমেৰিকাৰ ৱৰ্ল্ড পপুলেশ্যন ৰিভিউ এটা স্বতন্ত্ৰ সংস্থা।