ডিজিটেল এৰেষ্ট। শেহতীয়া সময়ত চাইবাৰ অপৰাধৰ এই নতুন ধাৰাটোৰ প্ৰতি আশংকা বাঢ়িছে। এই পৰিস্থিতিৰ সৈতে মোকাবিলা কৰিবলৈ ইণ্ডিয়ান চাইবাৰক্ৰাইম কোঅৰ্ডিনেশ্যন চেন্টাৰে বৃহৎ পদক্ষেপ গ্ৰহণ কৰিছে। সমগ্ৰ দেশতে ১৭০০ ‘সন্দেহজনক’ স্কাইপ আইডি আৰু ৫৯ হাজাৰ হোৱাটছএপ একাউণ্ট ব্লক কৰা হৈছে। ইয়াৰ সমান্তৰালকৈ জনসাধাৰণৰ মাজত ‘ডিজিটেল এৰেষ্ট’ সম্পৰ্কে সজাগতা সৃষ্টিৰ বাবে এক কাৰ্যসূচীৰো পৰিকল্পনা কৰা হৈছে।
বুধবাৰে লিখিত প্ৰশ্নৰ উত্তৰত গৃহ পৰিক্ৰমা মন্ত্ৰালয়ে জনাইছে যে ডিজিটেল এৰেষ্ট ৰোধৰ বাবে কেন্দ্ৰই অভিযান চলাব। বাতৰি কাকতত বিজ্ঞাপন দিয়াৰ উপৰিও দিল্লী মেট্ৰ’ত ঘোষণাৰ দৰে বিভিন্ন পৰিকল্পনা কৰা হৈছে।
উল্লেখ্য যে কেন্দ্ৰীয় তদন্তকাৰী সংস্থা ইডিয়ে চলিত মাহতে ডিজিটেল এৰেষ্টৰ সন্দৰ্ভত এক বিস্ফোৰক প্ৰতিবেদন প্ৰকাশ কৰে। এই প্ৰৱঞ্চনাৰ বলি হৈ যোৱা ১০ মাহত সাধাৰণ লোকে ২১৪০ কোটি টকা হেৰুৱাইছে বুলি দাবী কৰা হৈছে।
এই ডিজিটেল জালিয়াতি ভাৰতত থাইলেণ্ড, হংকং, লাওছৰ দৰে কেইবাখনো দেশৰ পৰা চলি আছে। আৰু এই প্ৰৱঞ্চনামূলক ধন দেশৰ লগতে বহিঃৰাষ্ট্ৰৰ বেংকতো জমা হৈ আছে। এই গোচৰৰ তদন্তত ইডিয়ে প্ৰায় ১৫৯ কোটি টকা উদ্ধাৰ কৰিছে। এই সকলোবোৰ ডিজিটেল এৰেষ্টৰ জৰিয়তে উলিয়াই নিয়া হৈছিল। গ্ৰেপ্তাৰ কৰা প্ৰক্ৰিয়াও আৰম্ভ হৈছে। এই ধৰণৰ চাইবাৰ অপৰাধৰ সৈতে মোকাবিলা কৰিবলৈ কেন্দ্ৰ তৎ পৰ হৈ পৰিছে।
প্ৰধানমন্ত্ৰী নৰেন্দ্ৰ মোদীয়ে অক্টোবৰৰ অন্তিম দেওবাৰে ১১৫ সংখ্যক ‘মন কি বাত’ ৰেডিঅ’ অনুষ্ঠানতো ইয়াকে লৈ উদ্বেগ প্ৰকাশ কৰিছিল। ডিজিটেল এৰেষ্টৰ জৰিয়তে মানুহৰ কষ্টোপাৰ্জিত ধন যি ধৰণে লৈ যোৱা হৈছে সেয়া বিপজ্জনক বুলিও তেওঁ কৈছিল।
তেওঁৰ ভাষাত “প্ৰৱঞ্চনাকাৰীসকলে ফোনত এনে এক পৰিবেশ সৃষ্টি কৰিছে যে মানুহ ভয় খাইছে। কোৱা হৈছে, তৎক্ষণাত এইটো কৰক, নহ’লে গ্ৰেপ্তাৰ কৰা হ’ব। আচলতে গোটেইটো এক প্ৰৱঞ্চনা।” এনে ঘটনাৰ প্ৰতি অযথা ভয় নকৰাকৈ শীতল মস্তিষ্কৰে ফোন কল ৰেকৰ্ড কৰিবলৈ পৰামৰ্শ দিয়ে মোদীয়ে।
তেওঁ কয়, কোনো চৰকাৰী তদন্তকাৰী সংস্থাই অনলাইনত কাকো সকীয়নি বা ভাবুকি নিদিয়ে। লগতে কোৱা হৈছে যে এনে ফোন আহিলে নেশ্যনেল চাইবাৰ হেল্পলাইনত ফোন কৰিব লাগে। ইয়াৰ পিছতে এই প্ৰৱঞ্চনা ৰোধৰ বাবে গৃহ মন্ত্ৰালয়ৰ দ্বাৰা এখন উচ্চ পৰ্যায়ৰ সমিতি গঠন কৰা হয়।
