প্ৰায় পাঁচ বছৰীয়া বাণিজ্যিক স্থবিৰতাৰ অন্তত ভাৰতে এতিয়া চীনৰ সৈতে বাণিজ্যিক সম্পৰ্ক পুনৰুজ্জীৱিত কৰাৰ প্ৰস্তুতি চলাইছে। বজাৰত যাতে অত্যাৱশ্যকীয় সামগ্ৰীৰ অভাৱ নহয় আৰু স্থানীয় উৎপাদনক প্ৰসাৰিত কৰাৰ লক্ষ্যত উপনীত হ’ব পাৰি, তাৰ প্ৰতি লক্ষ্য ৰাখি কেন্দ্ৰীয় চৰকাৰে চীনৰ পৰা অহা সামগ্ৰীৰ অনুমোদন প্ৰক্ৰিয়া ক্ষিপ্ৰ কৰি তুলিছে। এই পদক্ষেপে উদ্যোগসমূহক সকাহ দিয়াৰ লগতে দুয়োখন দেশৰ অৰ্থনৈতিক সম্পৰ্কত নতুন দিশৰ সূচনা কৰিছে।
উল্লেখ্য যে ২০২০ চনৰ সীমান্ত সংঘৰ্ষৰ পিছত ভাৰতে চীনৰ বহু সামগ্ৰী, যেনে ইলেক্ট্ৰনিক পাৰ্টছ, ষ্টীল, জোতা আৰু ঘৰুৱা সামগ্ৰীৰ বিআইএছ (BIS) অনুমোদন কাৰ্যতঃ বন্ধ কৰি ৰাখিছিল। কিন্তু শেহতীয়াকৈ বেইজিঙৰ সৈতে সম্পৰ্ক কিছু সুস্থিৰ হোৱাৰ লগতে দেশত চাহিদা বৃদ্ধি পোৱাৰ বাবে এই পদক্ষেপ লোৱা হৈছে।
বিগত কেইমাহমানৰ ভিতৰত ভাৰত আৰু চীনৰ কূটনৈতিক সম্পৰ্ক উন্নত হৈছে। প্ৰধানমন্ত্ৰী নৰেন্দ্ৰ মোদীৰ চীন ভ্ৰমণ আৰু চীনৰ ৰাষ্ট্ৰপতি ছি জিনপিঙৰ সৈতে হোৱা বৈঠকৰ পিছত পোনপটীয়া বিমান সেৱা পুনৰ আৰম্ভ হয় আৰু ব্যৱসায়িক ভিছা প্ৰদান আৰম্ভ হয়।
কেন্দ্ৰীয় চৰকাৰে এতিয়া ভাৰতীয় বজাৰৰ বাবে অপৰিহাৰ্য সামগ্ৰী উৎপাদন কৰা বিদেশী কোম্পানীসমূহৰ বাবে বাট মুকলি কৰি দিছে। শেহতীয়াকৈ উদ্যোগ আৰু আভ্যন্তৰীণ বাণিজ্য প্ৰসাৰ বিভাগে (DPIIT) বিদেশী উদ্যোগৰ, বিশেষকৈ চীনৰ উদ্যোগৰ অনুমোদন পলম হৈ থকা সকলো গোচৰৰ সন্দৰ্ভত তথ্য বিচাৰিছে। চৰকাৰে এতিয়া এই বাকী থকা সমস্যাসমূহ শীঘ্ৰে সমাধানৰ বাবে প্ৰস্তুতি চলাইছে।
শেহতীয়াকৈ জি এছ টি হ্ৰাস পোৱাৰ পিছতে বহু সামগ্ৰীৰ বিক্ৰী দ্ৰুতগতিত বৃদ্ধি পাইছে। টেলিভিছন, ৱাশ্বিং মেচিন, ফ্ৰীজ, ডিচৱাছাৰ আদি প্ৰিমিয়াম ইলেক্ট্ৰনিকছৰ চাহিদা ইমানেই বৃদ্ধি পাইছে যে বহু মডেলৰ বাবে অপেক্ষাৰ তালিকা গঠন হৈছে। কোম্পানীসমূহে জনাইছে যে তেওঁলোকৰ ষ্টক শেষ হৈ গৈছে আৰু যোগান শৃংখলৰ ওপৰত যথেষ্ট হেঁচা পৰিছে।
এনে পৰিস্থিতিত চৰকাৰে বিআইএছৰ (ব্যুৰ’ অৱ ইণ্ডিয়ান ষ্টেণ্ডাৰ্ডছ) অনুমোদন প্ৰক্ৰিয়া ক্ষিপ্ৰতাৰে কৰিব বিচাৰিছে যাতে বিদেশী যোগানকাৰীৰ পৰা সামগ্ৰী সোনকালে আহিব পাৰে আৰু বজাৰত কোনো অভাৱ নহয়।
উল্লেখনীয় যে ভাৰতত যিকোনো সামগ্ৰী বিক্ৰী কৰিবলৈ বিআইএছৰ অনুমোদনৰ প্ৰয়োজন, যি গুণগত মানদণ্ডৰ বিপৰীতে সংশ্লিষ্ট উৎপাদন ইউনিটটোক পৰীক্ষা কৰাৰ পিছতহে প্ৰদান কৰা হয়। বিদেশী কাৰখানাৰ বাবে এই প্ৰক্ৰিয়া দীঘলীয়া, কিয়নো বিআইএছৰ বিষয়াসকলে পৰিদৰ্শনৰ বাবে সেই দেশলৈ যাবলগীয়া হয়।
২০২০ চনৰ পিছত চীনৰ উদ্যোগসমূহৰ বাবে এই অনুমোদন কাৰ্যতঃ বন্ধ হৈ যোৱাৰ ফলত ভাৰতৰ যোগান শৃংখলত প্ৰভাৱ পৰিছিল। এতিয়া চৰকাৰে এই বিষয়সমূহৰ মাজত ভাৰসাম্য ৰক্ষাৰ চেষ্টা কৰিছে। এই ক্ষেত্ৰত স্থানীয়কৰণৰ প্ৰসাৰ অব্যাহত থাকিব, কিন্তু বিদেশী অনুমোদনত অপ্ৰয়োজনীয়ভাৱে পলম নহ’ব।
শেহতীয়াকৈ বেইজিঙে ভাৰতলৈ আপুৰুগীয়া চুম্বক (Rare Earth Magnets) ৰপ্তানি পুনৰ আৰম্ভ কৰাটোৱে ভাৰত-চীনৰ বাণিজ্যিক সম্পৰ্ক উন্নত হোৱাৰ স্পষ্ট লক্ষণ। এই চুম্বকসমূহ বৈদ্যুতিক বাহন, নবীকৰণযোগ্য শক্তি আৰু ইলেক্ট্ৰনিক সামগ্ৰীৰ বাবে অতি গুৰুত্বপূৰ্ণ।
