লাডাখৰ ভাৰত-চীন সীমান্তৰ গালৱান উপত্যকাত সংঘটিত দুই দেশৰ মাজৰ ৰক্তক্ষয়ী সংঘৰ্ষত চীনে বন্দী কৰা ১০ গৰাকী ভাৰতীয় সেনা জোৱানৰ মুকলিৰ ক্ষেত্ৰত মস্কোৰ হাত আছে।
কূটনৈতিক মহলে কৰিছে এই দাবী।
ৰাছিয়াৰ দুই মিত্ৰ দেশ ভাৰত আৰু চীনৰ মাজত উৎপত্তি হোৱা সংঘাত নিৰশনৰ বাবে ৰাছিয়াই মধ্যস্ততাকাৰী ভূমিকা গ্ৰহণ নকৰিলেও কূটনৈতিকভাৱে অতি সক্ৰিয়তা প্ৰদৰ্শন কৰি আহিছে।
মস্কোৱে একাধিক বিবৃতিত প্ৰকাশ কৰিছে যে ভাৰত আৰু চীনৰ মাজত শান্তি স্থাপন হোৱাটো ৰাছিয়াই বিচাৰে।
ইয়াৰ বাবে দুই দেশৰ মাজত ৰাছিয়াই সঘন যোগাযোগ ৰক্ষা কৰি আহিছে বুলি কূটনৈতিক সূত্ৰত প্ৰকাশ।
কূটনৈতিক সূত্ৰৰ মতে যোৱা ২৪ জুনত ৰাছিয়াৰ সৈতে ভাৰত চীনৰ(ৰিক গোষ্ঠী) বিদেশমন্ত্ৰীসকলৰ ভিডিঅ’ কনফাৰেন্সিঙৰ সভাত চীনে ভাৰতৰ ১০ গৰাকী সৈন্যক বন্দী কৰি ৰখা প্ৰসঙ্গটো উত্থাপন কৰিছিল।
ইয়াৰ পিছতে ৰাছিয়াই বিষয়টোক গুৰুত্বসহকাৰে লৈ চীনক কৈছিল যে ভাৰতৰ বন্দী সৈন্যসকলক মুকলি কৰি নিদিলে পৰিস্থিতি অধিক অশান্ত হৈ পৰিব।
কূটনৈতিক সূত্ৰৰ মতে ইয়াৰ পিছতে চীনে ভাৰতৰ বন্দী সৈন্যকেইজনক মুকলি কৰি দিয়ে।
