ভাৰতত ১০ সপ্তাহত ওলাব পাৰে কৰ’নাভাইৰাছৰ দৰৱ

ভাৰতত ছয়ৰ পৰা দহ সপ্তাহৰ ভিতৰত কৰ’নাভাইৰাছৰ দৰৱ ওলাব পাৰে।

পৃথিৱীৰ বিভিন্ন দেশৰ লগতে ভাৰততো কৰ’নাভাইৰাছৰ প্ৰতিষেধক বা দৰৱ উলিওৱাৰ কাৰণে গৱেষকসকলে ব্যাপক প্ৰচেষ্টা চলাই আছে।

চি এছ আই আৰ—ইণ্ডিয়ান ইনষ্টিটিউট অৱ কেমিকেল টেকনলজিয়ে দৰৱ কোম্পানি চিপলাৰ সৈতে মিলি কৰ’নাভাইৰাছ প্ৰতিৰোধী এণ্টি-ভাইৰেল দৰৱ প্ৰস্তুত কৰাৰ চেষ্টা কৰি আছে।

চিপলাই গৱেষণা প্ৰতিষ্ঠানটোৰ পৰা তিনিবিধ উপাদান বিচাৰিছে– Favipiravir, Remiesivir আৰু Bolaxivir(।)

“Favipiravir আৰু Remiesivirৰ ক্লিনিকেল ট্ৰায়েল হৈ গৈছে। সেইবোৰ বনাবলৈ প্ৰায় ৬-১০ সপ্তাহৰ প্ৰয়োজন হ’ব, কিন্তু আমি এতিয়া Bolaxavir বনাবলৈ আৰম্ভ কৰিম,” প্ৰকাশিত বাতৰিত আই আই চি টিৰ সঞ্চালক এছ চন্দ্ৰশেখৰৰ উদ্ধৃতি।

চিপলাই দৰৱৰ পৰীক্ষা, অনুমোদন আৰু উৎপাদন চোৱাচিতা কৰিব।

পুনেৰ নেচনেল ইনষ্টিটিউট অৱ ভাইৰ’লজিয়ে কৰ’নাভাইৰাছৰ ১১টা বীজাণু সংৰক্ষণ কৰিবলৈ সক্ষম হৈছে।

ভাইৰাছ সম্পৰ্কীয় গৱেষণাৰ বাবে অত্যাৱশ্যকীয় এই কাম কৰিবলৈ সক্ষম হোৱা ভাৰত পৃথিৱীৰ পঞ্চমখন দেশ।

আমেৰিকাত ইতিমধ্যে কৰ’নাভাইৰাছৰ দৰৱৰ মানৱ সম্পৰীক্ষা আৰম্ভ হৈছে।

পূৰ্বে ভাৰতীয় চিকিৎসা গৱেষণা পৰিষদে (ICMR) কৈছিল যে ভাৰতত কৰ’নাভাইৰাছৰ দৰৱ উলিয়াবলৈ কমেও ডেৰৰ পৰা দুই বছৰৰ প্ৰয়োজন হ’ব।