ৰাছিয়াই ইউক্ৰেইন আক্ৰমণ কৰাৰ ছবিয়ে মানুহক ভীতিগ্ৰস্ত কৰি ৰখাৰ মাজতে ভাৰতে মাৰি পঠিওৱা এটা ছুপাৰ চনিক মিছাইলে পাকিস্তানৰ চহৰত আঘাত হনাৰ কথাই প্ৰতিক্ৰিয়াৰ সৃষ্টি কৰিছে।
ঘটনাটো ঘটিছে ৯ মাৰ্চৰ সন্ধিয়া। ৯ মাৰ্চৰ সন্ধিয়া ৬:৪৩ বজাত ভাৰতৰ ‘চুৰাটগড়’ৰ পৰা মাৰি পঠিওৱা হৈছিল এটা মিছাইল। মিছাইলটোৱে পোনে পোনে গৈ পাকিস্তানৰ মিয়ান চুন্নু চহৰত আঘাত হানে। এই ঘটনাৰ পিছতে ভাৰতৰ প্ৰতিৰক্ষা দপ্তৰে আজি ঘটনাটো সন্দৰ্ভত এক বিবৃতি প্ৰকাশ কৰে।
বিবৃতিটোত ভাৰতে ঘটনাটোক “দুখজনক” বুলিও অভিহিত কৰিছে। প্ৰতিৰক্ষা মন্ত্ৰালয়ে কৈছে যে “কাৰিকৰী বিজুতি”ৰ বাবে এই ঘটনা সংঘটিত হৈছে। ২০২২ চনৰ ৯ মাৰ্চৰ দিনা নিয়মীয়া অনুশীলনৰ সময়ত কাৰিকৰী বিজুতিৰ ফলত দুৰ্ঘটনাক্ৰমে পাকিস্তানলৈ ভাৰতে মিছাইল নিক্ষেপ কৰে।
মিছাইল নিক্ষেপৰ ঘটনাটোৰ উচ্চ পৰ্যায়ৰ তদন্তৰ নিৰ্দেশ দিয়া হৈছে বুলিও ভাৰতে আজি প্ৰকাশ কৰে।
প্ৰতিৰক্ষা মন্ত্ৰালয়ৰ মতে মিছাইলৰ আঘাতত কোনো ধন-জনৰ হানি হোৱাৰ তথ্য পোৱা হোৱা নাই।
এই ঘটনাৰ পিছতে ইছলামাবাদত থকা ভাৰতৰ উচ্চ পদস্থ বিষয়াক পাক চৰকাৰে মাতি পঠিয়াইছে।
ভাৰতে পাকিস্তানৰ আকাশসীমা উলংঘন কৰি ‘চুপাৰ-চনিক ফ্লাইং অবজেক্ট’ মাৰি পঠিয়াইছে বুলি পাকিস্তানে অভিযোগ কৰে। ইছলামাবাদে এই ঘটনাৰ এক তদন্তও বিচাৰিছে।
উল্লেখ্য ভাৰতে মাৰি পঠিওৱা মিছাইলটোৱে সন্ধিয়া ৬:৫০ বজাত মিয়ান চুন্নু চহৰৰ ওচৰত আঘাত হানিছিল।
পাকিস্তান সেনাৰ মুখপাত্ৰ মেজৰ জেনেৰেল বাবৰ ইফতিখাৰে প্ৰকাশ কৰা মতে ভাৰতৰ মিছাইলটোৱে তিনি মিনিট ৪৪ ছেকেণ্ডৰ ভিতৰত পাকিস্তানৰ অঞ্চলটোত আঘাত হানিছিল।