ডুবাই এয়াৰ শ্ব’ৰ সময়ত তেজছ যুদ্ধবিমানৰ ভয়ংকৰ দুৰ্ঘটনাত ভাৰতীয় বায়ুসেনাৰ উইং কমাণ্ডাৰ নমাংশ ছায়ালৰ মৃত্যু হয়। হিমাচল প্ৰদেশৰ মুখ্যমন্ত্ৰী সুখৱিন্দৰ সিং চুখুৱে তেওঁৰ অকাল মৃত্যুত শোক প্ৰকাশ কৰিছে।
উইং কমাণ্ডাৰ নমাংশ ছায়াল হিমাচল প্ৰদেশৰ কাংৰা জিলাৰ এজন বীৰ সন্তান আছিল। মুখ্যমন্ত্ৰী সুখৱিন্দৰ সিং চুখুৱে শোক প্ৰকাশ কৰি কয়, “তেওঁৰ মৃত্যু অতি দুখজনক আৰু হৃদয়বিদাৰক। দেশে এজন বীৰ, কৰ্তব্যপৰায়ণ আৰু সাহসী পাইলট হেৰুৱাইছে। শোকসন্তপ্ত পৰিয়াললৈ মোৰ গভীৰ সমবেদনা জ্ঞাপন কৰিছো।”
নমাংশ ছায়ালৰ মৃত্যুৰ খবৰ পোহৰলৈ অহাৰ কিছু সময়ৰ পাছতেই ডুবাই এয়াৰ শ্ব’ৰ সময়ৰ তেওঁৰ ভিডিঅ’ ভাইৰেল হৈ পৰে, য’ত তেওঁক ভাৰতীয় প্ৰতিনিধিৰ সৈতে হাঁহি হাঁহি ফটো তোলা দেখা যায়। আৰু সেই এয়াৰ শ্ব’ৰ শেষৰ দিনটোত সকলো শেষ হৈ গ’ল।
লাইট কম্বেট এয়াৰক্ৰাফ্ট (এল চি এ) তেজছ ভাৰতৰ প্ৰতিৰক্ষা ব্যৱস্থাৰ বাবে এক অতি গুৰুত্বপূৰ্ণ আৰু গৌৰৱৰ বিষয়। ই ৪.৫ প্ৰজন্মৰ মাল্টিৰোল যুঁজাৰু বিমান, যাক বিশেষজ্ঞসকলে ইয়াৰ শ্ৰেণীৰ আটাইতকৈ সৰু আৰু লঘু বিমান বুলি গণ্য কৰে।
তেজছে (এটা ইঞ্জিন আৰু এজন পাইলটৰ সৈতে) সৰ্বোচ্চ ৪,০০০ কিলোগ্ৰাম অস্ত্ৰ-শস্ত্ৰ কঢ়িয়াব পাৰে আৰু ইয়াৰ সৰ্বোচ্চ টেক অফ ওজন ১৩,৩০০ কিলোগ্ৰাম হ’ব পাৰে। ১৯৮৩-৮৪ চনত এই থলুৱা যুদ্ধ বিমানখন নিৰ্মাণৰ সপোন আৰম্ভ হৈছিল আৰু ২০০৩ চনত আনুষ্ঠানিকভাৱে ইয়াৰ নাম ‘তেজছ’ ৰখা হৈছিল। যদিও ১৯৯৮ চনত পাৰমাণৱিক পৰীক্ষাৰ পিছত আমেৰিকা আঁতৰি গ’লেও ভাৰতে অকলেই এই বিমানখন নিৰ্মাণ কৰি দেশৰ গৌৰৱৰ বিষয় কৰি তুলিছিল।
বৰ্তমান তেজছৰ তিনিটা ভেৰিয়েন্ট আছে—মাৰ্ক ১, মাৰ্ক ১এ আৰু মাৰ্ক ২। ২০১৬ চনত ইয়াক প্ৰথমবাৰৰ বাবে ভাৰতীয় বায়ুসেনাৰ ৪৫ নং স্কোয়াড্ৰন (ফ্লাইং ড্ৰেগাৰ্ছ)ত অন্তৰ্ভুক্ত কৰা হৈছিল আৰু বৰ্তমান ইয়াক বায়ুসেনাৰ দুটা স্কোয়াড্ৰনে ব্যৱহাৰ কৰি আছে। চলিত বৰ্ষৰ আগষ্ট মাহতে ভাৰত চৰকাৰেও ৯৭খন তেজছ মাৰ্ক ১এ যুদ্ধ বিমান ক্ৰয় কৰাৰ সিদ্ধান্ত গ্ৰহণ কৰিছিল।
