ভাৰতৰ দ্বাৰা সিন্ধু জল সন্ধি স্থগিত ৰখাৰ সিদ্ধান্তৰ ফলত ২৪ কোটি পাকিস্তানী নাগৰিক মানৱীয় বিপৰ্যয়ৰ সন্মুখীন হোৱাৰ আশংকা প্ৰকাশ কৰিছে ইছলামবাদে। এই সন্দৰ্ভত পাকিস্তানে ৰাষ্ট্ৰসংঘত আনুষ্ঠানিক অভিযোগ দাখিল কৰি বিশ্ব ৰাষ্ট্ৰগোষ্ঠীক আহ্বান জনাইছে যাতে এই বিষয়টো পৰ্যবেক্ষণ কৰি প্ৰয়োজনীয় পদক্ষেপ গ্ৰহণ কৰা হয়।
শুকুৰবাৰে ৰাষ্ট্ৰসংঘৰ বৈঠকত পাকিস্তানৰ প্ৰতিনিধি উছমান জাদুনে ভাৰতৰ সিদ্ধান্তক আন্তঃৰাষ্ট্ৰীয় আইনৰ সম্পূৰ্ণ উলংঘন বুলি আখ্যা দিয়ে। তেওঁ কয়, “সিন্ধু নদীৰ পানী পাকিস্তানৰ ২৪ কোটি নাগৰিকৰ জীৱনধাৰাৰ সৈতে জড়িত। ভাৰতে যদি এই পানীৰ প্ৰবাহ বন্ধ কৰে বা নদীৰ দিশ সলনি কৰে, তেন্তে পাকিস্তানত ভয়ংকৰ মানৱীয় দুৰ্যোগ ঘটিব।
উল্লেখযোগ্য যে, ১৯৬০ চনত সম্পাদিত সিন্ধু জল সন্ধিৰ অধীনত সিন্ধু নদী আৰু ইয়াৰ পাঁচখন উপনৈৰ পানীৰ অধিকাৰ ভাৰত আৰু পাকিস্তানৰ মাজত বিভক্ত কৰা হৈছিল। কিন্তু পেহেলগামত পৰ্যটকৰ ওপৰত হোৱা সন্ত্ৰাসবাদী আক্ৰমণৰ পিছত ভাৰতে এই সন্ধি স্থগিত ৰখাৰ সিদ্ধান্ত লয়। পাকিস্তানে অভিযোগ কৰিছে যে এই সিদ্ধান্তৰ ফলত পানীৰ বণ্টন, মথাউৰি নিৰ্মাণ আদিত চুক্তিৰ চৰ্তসমূহ ভঙ হৈছে।
ভাৰতৰ ৰাষ্ট্ৰসংঘৰ স্থায়ী প্ৰতিনিধি পাৰ্বথানী হৰিশে পাকিস্তানৰ অভিযোগ খণ্ডন কৰি কয়, পাকিস্তানৰ সন্ত্ৰাসবাদৰ ইতিহাস বাবে নতুন নহয়। বিগত চাৰিটা দশকত ২০ হাজাৰ ভাৰতীয় নাগৰিক এই সন্ত্ৰাসবাদৰ বলি হৈছে। পাকিস্তানে এই চুক্তিক সদিচ্ছাৰ ভিত্তিত মানি চলাৰ পৰিৱৰ্তে, সদায় বিশ্বাসঘাতকতা কৰিছে বুলি উল্লেখ কৰে।
তেওঁ লগতে কয় যে অপাৰেচন সিন্দূৰৰ সময়ত ভাৰতৰ লক্ষ্য কেবল সন্ত্ৰাসবাদী শিবিৰ আছিল। কোনো সাধাৰণ পাকিস্তানী নাগৰিকৰ ওপৰত আক্ৰমণ কৰা হোৱা নাই। কিন্তু পাকিস্তানে সীমান্তৱৰ্তী গাঁওসমূহত আক্ৰমণ চলাইছিল।
ইছলামবাদে শেহতীয়াকৈ ভাৰতলৈ এক পত্ৰ প্ৰেৰণ কৰি ভিক্ষাৰ সুৰত অনুৰোধ জনাইছে যাতে চুক্তিখন বাতিল কৰা নহয়। পাকিস্তানৰ সংবাদ মাধ্যম অনুসৰি, চুক্তি স্থগিত ৰখাৰ ফলত দেশত পানীৰ তীব্ৰ অভাৱ, ক্ৰমান্বয়ে বৃদ্ধি হোৱা বানপানী আৰু খাদ্য সংকটৰ সৃষ্টি হৈছে। বহু অঞ্চলত অনাহাৰে মৃত্যু হোৱাৰ অৱস্থা হৈছে।
অৱশ্যে ভাৰতীয় বিদেশ মন্ত্ৰী এছ. জয়শংকৰে ইতিমধ্যেই স্পষ্টকৈ কৈছে যে, “সিন্ধু জল সন্ধি স্থগিত থাকিব। পাকিস্তানে সন্ত্ৰাসবাদৰ পথ ত্যাগ নকৰালৈকে এই সন্ধি পুনৰ বাহাল কৰা নহ’ব।”
এই মুহূর্তত আন্তর্জাতিক মহলৰ দৃষ্টি ভাৰত-পাকিস্তান জল সম্পদ বিতৰ্কলৈ কেন্দ্ৰিত হৈছে আৰু আগন্তুক দিনত এই বিষয়টোৱে আৰু ৰাজনৈতিক আৰু কূটনৈতিক ক্ষেত্ৰত গভীৰ ৰেখাপাত কৰিব বুলি অনুমান কৰা হৈছে।
