দেশত যোৱা কেইদিনৰ পৰা সাংঘাতিকভাৱে বৃদ্ধি পাবলৈ ধৰিছে ক’ৰ’নাৰ সংক্ৰমণ। ২৪ ঘণ্টাৰ অন্তৰালত স্বাস্থ্য মন্ত্ৰ্যালয়ে জাৰি কৰি থকা তথ্যই ভয়ংকৰ ভৱিষ্যতৰ ইংগিত প্ৰদান কৰিছে।
স্বাস্থ্য মন্ত্ৰ্যালয়ে জানিব দিয়া মতে, বিগত ২৪ ঘন্টাত ভাৰতত মুঠ ৮৬,৪৩২গৰাকী লোক নতুনকৈ কৰ’নাত আক্ৰান্ত হৈছে।
উল্লেখ্য যে ভাৰতে যোৱা ২৪ ঘন্টাত সৰ্বাধিক আক্ৰান্ত হোৱাৰ ইয়াৰ পূৰ্বৰ অভিলেখ ভংগ কৰিছে।
তদুপৰি, এয়া বিশ্বৰ ভিতৰতে এদিন সৰ্বাধিক আক্ৰান্ত হোৱাৰো অভিলেখ।
সেইদৰে, দেশত এতিয়া ক’ৰ’না আক্ৰান্ত ৰোগীৰ সংখ্যা ৪০,২৩,১৭৯ গৰাকী অতিক্ৰম কৰাৰ বিপৰীতে মৃত্যুমুখত পৰিছে ৬৯,৫৬১ গৰাকী।
আনহাতে, যোৱা ২৪ ঘণ্টাত মৃত্যু হৈছে ১০৮৯ গৰাকী ৰোগী।
উল্লেখ্য যে দেশত এতিয়া ৩১,০৭,২২৩ গৰাকী ৰোগী ক’ৰ’না মুক্ত হৈছে আৰোগ্য লাভ কৰিছে। দেশত আৰোগ্যৰ হাৰ হৈছে ৭৭.১৫ শতাংশ।
আনহাতে, বৰ্তমান দেশত সক্ৰিয় আক্ৰান্ত ৰোগীৰ সংখ্যা হৈছে ৮,৪৬,৩৯৫গৰাকী।
ক’ৰ’নাৰ সংহাৰ হ্ৰাস নাপালেও ভাৰতৰ বাবে এটাই সুখবৰ যে ক’ৰ’নাৰ চিকিৎসা চলি থকা ৰোগীৰ সংখ্যাতকৈ ক’ৰ’না মুক্তৰ সংখ্যা অধিক।
কেন্দ্ৰীয় স্বাস্থ্য মন্ত্ৰী হৰ্ষ বৰ্দ্ধনে জানিবলৈ দিয়ে যে দেশৰ মুঠ সক্ৰিয় ৰোগীৰ ভিতৰত ০.৫শতাংশতকৈয়ো কম ৰোগী ভেন্টিলেটৰত আছে। সেইদৰে, ২শতাংশ ৰোগী আইচিয়ুত আৰু ৩.৫শতাংশতকৈ কম ৰোগীয়ে অক্সিজেন ছাপোৰ্টত আছে।