ভাৰতৰ পশ্চিম উপকূলীয় ৰাজ্য গুজৰাটৰ আহমেদাবাদ আৰক্ষীৰ ক্ৰাইম ব্ৰাঞ্চে তাত গ্ৰেপ্তাৰ হোৱা ১৫ জন বাংলাদেশী প্ৰব্ৰজনকাৰীক ঘূৰাই পঠিয়াইছে। তদুপৰি অহা মাৰ্চ মাহৰ ভিতৰত আৰু কমেও ৩৫ জন বাংলাদেশীক ঘূৰাই পঠোৱাৰ প্ৰক্ৰিয়া আৰম্ভ কৰিছে আৰক্ষীয়ে। এই তথ্য বুধবাৰে প্ৰদান কৰে আহমেদাবাদ আৰক্ষীৰ সহকাৰী আয়ুক্ত ভাৰত পেটেলে।
আহমেদাবাদ আৰক্ষী বিষয়াগৰাকীয়ে জনোৱা মতে, যোৱা বছৰ আহমেদাবাদৰ চাডোলা হ্ৰদৰ সমীপৰ এটা অঞ্চলত আৰক্ষীৰ অপৰাধ শাখাই যৌথ অভিযান চলাইছিল। এই অভিযানত প্ৰায় ৫০ জন অবৈধ বাংলাদেশী অনুপ্ৰৱেশকাৰীক গ্ৰেপ্তাৰ কৰা হয়। তাৰ মাজতে এগৰাকী ছোৱালী কেঁচুৱাও আছিল।
ধৃত প্ৰব্ৰজনকাৰীসকলৰ পৰা ভুৱা আধাৰ কাৰ্ডকে ধৰি ভুৱা ভাৰতীয় নথি-পত্ৰ উদ্ধাৰ কৰা হৈছে। পাছত আৰক্ষীৰ তদন্তত বাংলাদেশী মহিলা আৰু নাবালক ছোৱালীৰ জৰিয়তে আহমেদাবাদত দেহ ব্যৱসায়ৰ লগত জড়িত এটা চক্ৰ উন্মোচিত হয়।
এই চক্ৰৰ সদস্যসকলে বাংলাদেশৰ পৰা অহা মহিলা আৰু কণমানি ছোৱালীক সৰবৰাহ কৰি তাত জোৰকৈ বেশ্যা ব্যৱসায় চলাইছিল। পাছত আহমেদাবাদ আৰক্ষীয়ে উদ্ধাৰ কৰা লোকসকলক বাংলাদেশী নাগৰিকত্বৰ প্ৰমাণ লাভ কৰি উভতাই পঠোৱাৰ প্ৰক্ৰিয়া আৰম্ভ কৰে।
দেশৰ সংবাদ সংস্থা এএনআইৰ এক প্ৰতিবেদন অনুসৰি যোৱা ১ ফেব্ৰুৱাৰীত বাংলাদেশৰ দূতাবাসৰ জৰিয়তে এগৰাকী নাবালক ছোৱালীকে ধৰি ১৫ জন বাংলাদেশী প্ৰব্ৰজনকাৰীক সফলতাৰে ঘূৰাই পঠোৱা হৈছিল। আশা কৰা হৈছে যে মাৰ্চ মাহৰ মাজভাগলৈ আৰু ৩৫ জন বাংলাদেশী ভাৰতৰ পৰা ঘূৰাই পঠিয়াব।
আহমেদাবাদ আৰক্ষীৰ সহকাৰী আয়ুক্ত ভাৰত পেটেলে কয় যে বেশ্যা ব্যৱসায়ৰ লগত জড়িত মহিলাসকলক এই কামত জোৰ-জবৰদস্তি কৰা হৈছিল। তাৰ পৰা পোৱা ধন ব্যৱসায় আৰু বাণিজ্যৰ বাবে বাংলাদেশলৈ প্ৰেৰণ কৰা হৈছিল।
মানৱ সৰবৰাহৰ চক্ৰৰ নেটৱৰ্ক আৰু বাংলাদেশলৈ প্ৰেৰণ কৰা ধনৰ সন্দৰ্ভত বিতং তদন্ত চলাই আছে বুলি কৰ্তৃপক্ষই জানিবলৈ দিয়ে। ইফালে দিল্লীৰ দ্বাৰকা জিলা আৰক্ষীয়ে ভাৰতত অবৈধভাৱে বসবাস কৰাৰ অভিযোগত ১৬ জন প্ৰব্ৰজনকাৰীক গ্ৰেপ্তাৰ কৰিছে। দিল্লী আৰক্ষীৰ মতে ইয়াৰে কমেও পাঁচজন বাংলাদেশী নাগৰিক।
