কালি কেপ টাউন টেষ্টত জয়েৰে দক্ষিণ আফ্ৰিকা ভ্ৰমণ সামৰিলে ভাৰতীয় দলে। নিৰ্ধাৰিত সময়তকৈ পূৰ্বেই শৃংখলা সমাপ্তিৰ সূত্ৰে ভাৰতীয় দল শীঘ্ৰে স্বদেশত উপস্থিত হ’ব। ইয়াৰ পিছতে অহা ১১ জানুৱাৰীৰ পৰা আফগানিস্তানৰ বিৰুদ্ধে তিনিখনীয়া মেচৰ এক টি-২০ শৃংখলাত অৱতীৰ্ণ হ’ব ভাৰতীয় দল।
এই ঘৰুৱা শৃংখলাটোৰ বাবে আজি ভাৰতীয় ক্ৰিকেট নিয়ন্ত্ৰণ ব’ৰ্ডৰ বাছনি সমিতিয়ে দল ঘোষণা কৰাৰ সম্ভাৱনা আছে। এবছৰতকৈও অধিক সময় ধৰি টি-২০ ফৰ্মেটৰ পৰা আঁতৰি থকা দুই অভিজ্ঞ তাৰকা অধিনায়ক ৰোহিত শৰ্মা আৰু বিৰাট কোহলীয়ে এই শৃংখলাত টি-২০লৈ প্ৰত্যাৱৰ্তন ঘটাব পাৰে বুলি চৰ্চা চলিছে।
সূত্ৰ অনুসৰি, আগন্তুক টি-২০ বিশ্বকাপৰ প্ৰতি লক্ষ্য ৰাখি এই দুই অভিজ্ঞ তাৰকাক দললৈ ঘূৰাই অনা হ’ব পাৰে। দুয়া টি-২০ ফৰ্মেটত শেষবাৰৰ বাবে অংশ লৈছিল ২০২২ৰ টি-২০ বিশ্বকাপতে। তাৰ পিছত কেৱল টেষ্ট আৰু এদিনীয়া ফৰ্মেটতহে দেখা গৈছে ৰোহিত শৰ্মা আৰু বিৰাট কোহলীক।
ইফালে সদ্য সমাপ্ত দক্ষিণ আফ্ৰিকা ভ্ৰমণত উজ্জীৱিত প্ৰদৰ্শন দাঙি ধৰা দুই পেচাৰ মহম্মদ চিৰাজ আৰু জছপ্ৰিত বুমৰাহক এই শৃংখলাত জিৰণি দিয়াৰ সম্ভাৱনা আছে। আনহাতে আঘাতৰ বাবে দক্ষিণ আফ্ৰিকা শৃংখলাৰ পৰা বাদ পৰা আনগৰাকী অভিজ্ঞ পেচাৰ মহম্মদ ছামিৰ উপস্থিতিও সন্দেহৰ আৱৰ্তত।
তদুপৰি আঘাতৰ পৰা এইপৰ্যন্ত সুস্থ হৈ নুঠা হাৰ্দিক পাণ্ডিয়া আৰু সূৰ্যকুমাৰ যাদৱো এই শৃংখলাত উপলব্ধ নহ’ব। শেহতীয়া এদিনীয়া বিশ্বকাপত আঘাতৰ পিছত পাণ্ডিয়া দলৰ বাহিৰত থকাৰ বিপৰীতে দক্ষিণ আফ্ৰিকা ভ্ৰমণৰ সময়ত আঘাতপ্ৰাপ্ত হৈছিল সূৰ্যকুমাৰ যাদৱ।
আফগানিস্তান শৃংখলাৰ বাবে দলৰ বাহিৰেও বিচিচিআইয়ে ভাৰত আৰু ইংলেণ্ডৰ মাজত অনুষ্ঠিত হ’বলগীয়া প্ৰথম দুখন টেষ্টৰ বাবেও দল ঘোষণা কৰাৰ সম্ভাৱনা আছে বুলি সূত্ৰই প্ৰকাশ কৰিছে।
