প্ৰধানমন্ত্ৰী নৰেন্দ্ৰ মোদীয়ে তেওঁৰ লোকসভা সমষ্টি বাৰাণসীত ৩৮৮০ কোটি টকাৰ প্ৰকল্পৰ আধাৰশিলা স্থাপন কৰি উদ্বোধন কৰে। বাৰাণসীত ভৰি দি মোডীয়ে শেহতীয়াকৈ নাবালিকাক দলৱদ্ধ ধৰ্ষণ কৰাৰ ঘটনাত ক্ষোভ প্ৰকাশ কৰি দোষীৰ কঠোৰতম শাস্তি দাবী কৰে। বাৰাণসী বিমানবন্দৰত অৱতৰণ কৰাৰ লগে লগে আৰক্ষী বিষয়াসকলে প্ৰধানমন্ত্ৰীক মহানগৰীৰ এই জঘন্য ঘটনাৰ বিষয়ে বিতংভাৱে অৱগত কৰে।
কঠোৰ ব্যৱস্থাৰ নিৰ্দেশ দিয়াৰ উপৰিও বাৰাণসীত যাতে পুনৰ এনে ঘটনা সংঘটিত নহয় তাৰ বাবেও আৰক্ষী বিষয়াসকলক সকীয়াই দিয়ে প্ৰধানমন্ত্ৰী মোদীয়ে। উত্তৰ প্ৰদেশৰ মুখ্যমন্ত্ৰী যোগী আদিত্যনাথ আৰু ৰাজ্যপাল আনন্দীবেন পেটেলৰ উপস্থিতিত শিৱ বন্দনাৰ সৈতে প্ৰধানমন্ত্ৰী মোদীয়ে ভাষণ আৰম্ভ কৰে। তেওঁ স্থানীয় ভোজপুৰী ভাষাত উপস্থিত ৰাইজক সম্বোধন কৰি কয়, “মই কাশীৰ, কাশী মোৰ।” উন্নয়নৰ ক্ষেত্রত কাশী এতিয়া দেশৰ বাবে আদৰ্শ হৈ পৰিছে৷ কাশী এতিয়া কেৱল এখন প্ৰাচীন চহৰ নহয়, ইয়াত আধুনিকতাৰ স্পৰ্শও আছে।
সমাজবাদী পাৰ্টি আৰু কংগ্ৰেছৰ নাম নোলোৱাকৈয়ে মোদীয়ে কয় যে যিসকল কেৱল নিজৰ পাৰিবাৰিক স্বাৰ্থ বজাই ৰাখিবলৈ আৰু নিজৰ ধন-সম্পত্তি বৃদ্ধিৰ বাবে ক্ষমতাৰ প্ৰতি আগ্ৰহী তেওঁলোকে কেতিয়াও দেশৰ উন্নয়ন কৰিব নোৱাৰে। ১৯ শতিকাৰ সংস্কাৰবাদী মহাত্মা জ্যোতিবা ফুলেৰ জন্ম বাৰ্ষিকীত মোদীয়ে কয় যে চৰকাৰে মহিলা সবলীকৰণৰ বাবে বহু কাম কৰিছে। লগতে তেওঁ কয় যে ভাৰত চৰকাৰে ২০৩৬ চনৰ অলিম্পিক ভাৰতলৈ অনাৰ চেষ্টা চলাইছে।
