এডিলেইডত খেলা দিবা-নৈশ টেষ্ট মেচত ৮ উইকেইটত পৰাস্ত হোৱাৰ পিছত চাৰিখনীয়া টেষ্ট শৃংখলাত ভাৰতৰ বাবে প্ৰত্যাৱৰ্তন কৰাটো সহজ নহ’ব বুলি মন্তব্য কৰিছে অষ্ট্ৰেলিয়াৰ প্ৰাক্তন ক্ৰিকেটাৰ ব্ৰেড হেডিনে।
হেডিনে কয় যে অষ্ট্ৰেলিয়াৰ বিৰুদ্ধে খেলা প্ৰথম মেচখনত ভাৰতে জয়ী হোৱাৰ সুন্দৰ সুযোগ লাভ কৰিছিল।
উল্লেখ্য যে মেচখনত ভাৰতে দ্বিতীয় ইনিংছত মাত্ৰ ৩৬ ৰানতে অলআউট হয় আৰু অষ্ট্ৰেলিয়াই ৮ উইকেটত মেচখন জয়ী হৈ বৰ্ডাৰ-গাভাস্কাৰ ছিৰিজত ১-০ৰ অগ্ৰগতি লাভ কৰে।
হেডিনে এছইএন ৰেডিঅ’ক দিয়া এটা সাক্ষাতত কয়, ‘মই নাভাবো যে এই পৰাজয়ৰ পিছত আৰু প্ৰত্যাৱৰ্তন কৰিব পাৰিব’।
অষ্ট্ৰেলিয়াৰ হৈ ৬৬খন টেষ্ট মেচ খেলা ৪৩ বছৰীয়া হেডিনে লগতে কয় যে এডিলেইডত এনেকুৱা পৰিস্থিতি আছিল, য’ত ভাৰতীয় বলাৰসকলে পিটছৰ পৰা সহায় লাভ কৰিছিল।
তেওঁ কয়, ‘মই ভাবো যে টেষ্ট মেচত জয়ী হোৱাৰ বাবে তেওঁলোকৰ হাতত একমাত্ৰ সুযোগ আছিল এডিলেইড। তেওঁলোকৰ বলাৰসকলে ইয়াৰ পৰিস্থিতিৰ সৈতে খাপ খাইছিল। এতিয়া আৰু তেওঁলোকে প্ৰত্যাৱৰ্তন কৰিব পাৰিব বুলি মই নাভাবো’।
‘ব্ৰিছবেনত এখন টেষ্ট খেলিব আছে, য’ত অষ্ট্ৰেলিয়াক পৰাস্ত কৰাটো অত্যন্ত কঠিন। আগন্তুক দুখন টেষ্টত ভাৰতীয় দলক পিটছে সহায় কৰিব কিন্তু ইয়াৰ সুবিধা গ্ৰহণ কৰিব নোৱাৰিব’, হেডিনে এইদৰে কয়।
উল্লেখ্য যে ২০১৮-১৯ বৰ্ষত সুন্দৰ বলিং আক্ৰমণেৰে অষ্ট্ৰেলিয়াত টেষ্ট শৃংখলা জয়ী হৈ ইতিহাস ৰচিছিল, কিন্তু এইবাৰ অনুভৱী ঈশান্ত শৰ্মা অবিহনেই ভাৰতীয় দলে অষ্ট্ৰেলিয়ৰ বিৰুদ্ধে টেষ্ট শৃংখলাত অৱতীৰ্ণ হৈছে।
ইফালে মহম্মদ ছামীয়েও প্ৰথম টেষ্টখনত আঘাত হৈ শৃংখলাৰ বাকী থকা মেচ কেইখনৰ পৰা বাহিৰ হ’বলগীয়া হৈছে।
হেডিনে কয়, ‘যোৱা বছৰ ভাৰতীয় দলৰ বলিং লাইনআপ সুন্দৰ আছিল। এইবাৰ ছামীৰ আঘাত হোৱাত তেওঁলোকৰ হাতত বিকল্প নাই’।
