পাকিস্তান ভূগোলৰ অংশ হৈ থাকিব নে ইতিহাসৰ অংগ হ’ব সেয়া ইছলামবাদৰ ওপৰত নিৰ্ভৰশীল বুলি ভাৰতীয় সেনা প্ৰধান জেনেৰেল উপেন্দ্ৰ দ্বিবেদীয়ে কঠোৰ ভাষাত সকীয়াই দিছে।
শনিবাৰে নতুন দিল্লীৰ মানেক্সা চেণ্টাৰত অনুষ্ঠিত ‘ইউনিফৰ্ম আনভেইলড’ অনুষ্ঠানত তেওঁক সোধা হৈছিল যে যোৱা বছৰ যি পৰিস্থিতিত ‘অপাৰেচন সিন্দুৰ’ চলোৱা হৈছিল, তাৰ যদি পুনৰাবৃত্তি হয়, তেন্তে ভাৰতীয় সেনাই কেনে প্ৰতিক্ৰিয়া প্ৰকাশ কৰিব?
সেই প্ৰশ্নৰ উত্তৰত ভাৰতীয় সেনা প্ৰধানগৰাকীয়ে অতি শক্তিশালী ভাষাত কয়, ‘যদি আপুনি মোৰ কথা আগতে শুনিছে, মই যি কৈছো… সেয়া হ’ল যে যদি পাকিস্তানে সন্ত্ৰাসবাদীক আশ্ৰয় দি ভাৰত বিৰোধী কাৰ্যকলাপ অব্যাহত ৰাখে, তেন্তে তেওঁলোকে সিদ্ধান্ত ল’ব লাগিব যে তেওঁলোকে ভূগোলৰ অংশ হ’ব বিচাৰে নে ইতিহাসৰ অংশ হ’ব বিচাৰে।’
আৰু অপাৰেচন সিন্দুৰৰ বাৰ্ষিকীৰ কিছুদিন পিছতে ভাৰতীয় সেনাধ্যক্ষই সেই বাৰ্তা দিছিল। সেইদিনাও ভাৰতে নিজৰ স্থিতি স্পষ্ট কৰি দিছিল যে সন্ত্ৰাসবাদ আৰু সন্ত্ৰাসবাদীৰ বিৰুদ্ধে যুঁজ অব্যাহত থাকিব। আজিও সেই বাৰ্তাই দিলে ভাৰতীয় সেনা প্ৰধানে।
অপাৰেচন সিন্দুৰৰ বৰ্ষপূৰ্তিত ভাৰতীয় সেনাই এখন ছবি পোষ্ট কৰে। তাত লিখা আছিল, ‘কিছুমান সীমা কেতিয়াও পাৰ হ’ব নালাগে। ভাৰতে পাহৰি নাযায়। মানৱতাৰ সীমা অতিক্ৰম কৰিলে উপযুক্ত উত্তৰ দিয়া হয়। ন্যায় বিচাৰ কৰা হয়। ভাৰত ঐক্যবদ্ধ।’ একেদৰে ভাৰতীয় বায়ুসেনা আৰু ভাৰতীয় নৌসেনাইও স্পষ্ট বাৰ্তা দিয়ে।
পুনৰ এপ্ৰিল মাহত ভাৰতীয় সেনা প্ৰধানগৰাকীয়ে কৈছিল, ‘অপাৰেচন সিন্দুৰ বিভিন্ন ক্ষেত্ৰত সমন্বিত পদক্ষেপৰ দিশত ভাৰতৰ অগ্ৰগতিৰ আটাইতকৈ শক্তিশালী আহিলা আছিল। কিন্তু আমি বিভিন্ন ক্ষেত্ৰৰ সংহতি আৰু সমন্বয়ৰ লক্ষ্যত উপনীত হ’ব লাগিব।’
‘অপাৰেচন সিন্দুৰ’ৰ পিছত গঠিত যুদ্ধ তথ্য সংস্থা আৰু মনোবৈজ্ঞানিক প্ৰতিৰক্ষা বিভাগৰ বিষয়েও সেনা প্ৰধানগৰাকীয়ে কয়। তেওঁ কয়, ‘আমাৰ ১৫ শতাংশ প্ৰচেষ্টা অপপ্ৰচাৰ অভিযান প্ৰতিহত কৰাত কেন্দ্ৰীভূত আছিল।’
