নাগৰিকত্বৰ প্ৰমাণ থাকা সত্ত্বেও অবৈধ বাংলাদেশী বুলি সন্দেহ কৰি মহাৰাষ্ট্ৰ আৰক্ষীয়ে পশ্চিম বংগৰ চাৰিজন লোকক আটক কৰি সীমান্ত সুৰক্ষা বাহিনী (BSF)-ৰ জৰিয়তে বাংলাদেশলৈ প্ৰেৰণ কৰিছিল। এই ঘটনাৰ পাছত পশ্চিম বংগ আৰক্ষীয়ে ১৬ জুন সোমবাৰে চাৰিওজন ব্যক্তিক ঘূৰাই আনিছে।
এই চাৰিজনৰ ভিতৰত মুৰ্শিদাবাদ জিলাৰ তিনিজন আৰু বৰধামনৰ এজন বাসিন্দা আছিল। সংবাদমাধ্যমৰ মতে, মহাৰাষ্ট্ৰ আৰক্ষীয়ে তেওঁলোকক সন্দেহৰ ভিত্তিত ধৰি সীমান্ত সুৰক্ষা বাহিনীৰ হাতত নিৰ্দেশনা অনুসৰি গতাই দিয়াৰ পিছত তেওঁলোকক বাংলাদেশ সীমান্ত পাৰ কৰি পঠিয়াই দিয়ে।
বাংলাদেশলৈ প্ৰেৰণ কৰা উক্ত চাৰিজন ক্ৰমে মেহবুব শ্বেখ, নাজিমুদ্দিন মণ্ডল, মিনাৰুল শ্বেখ আৰু মুস্তাফা কমল শ্বেখ বুলি সদৰী কৰিছে।
পশ্চিম বংগ আৰক্ষীয়ে দাবী কৰিছে যে এই স্থানান্তৰণৰ বিষয়ে তেওঁলোকক আগতীয়াকৈ অৱগত কৰা হোৱা নাছিল। মুৰ্শিদাবাদ আৰক্ষীয়ে স্থানীয় তদন্ত চলাই তেওঁলোকৰ নাগৰিকত্বৰ প্ৰমাণ সংগ্ৰহ কৰি বিএছএফৰ হাতত গতাই দিয়ে। তাৰ পিছত BSF আৰু Border Guard Bangladesh (BGB)-ৰ মাজত ফ্লেগ মিটিংৰ জড়িয়তে তেওঁলোকক ঘূৰাই আনে।
পশ্চিমবংগ প্ৰব্ৰজনকাৰী কল্যাণ ব’ৰ্ডৰ অধ্যক্ষ সমৰুল ইছলামে কয়, “মহাৰাষ্ট্ৰ আৰক্ষীয়ে পশ্চিমবংগ চৰকাৰক কোনো ধৰণৰ খবৰ নিদিয়াকৈ এই সিদ্ধান্ত লৈছিল বুলি জানিব পৰা গৈছে।
অন্যহাতে মহাৰাষ্ট্ৰ আৰক্ষীয়ে কৈছে, নাগৰিকত্ব প্ৰমাণ কৰিবলৈ মেহবুব শ্বেখ ব্যৰ্থ হৈছিল, আৰু আধাৰ বা পেন কাৰ্ডৰ ওপৰত নিৰ্ভৰ নকৰে বুলি তেওঁলোকে যুক্তি আগবঢ়ায়।
এই ঘটনা দেশজুৰি চলি থকা বিতাড়নৰ কৌশলৰ অংশ হিচাপে সন্দেহযুক্ত অবৈধ প্ৰব্ৰজনকাৰীক সীমান্ত পাৰ কৰাই পঠিয়োৱা হৈছে। বাংলাদেশৰ বৈদেশিক মন্ত্ৰালয়ে ৮ মে’ত ভাৰতক পত্ৰ দি এই ধৰণৰ আচৰণত গভীৰ উদ্বেগ প্ৰকাশ কৰি অধিকৃত বিতাড়ন প্ৰক্ৰিয়া অনুসৰণ কৰিবলৈ আহ্বান জনাইছিল।
