ড’নাল্ড ট্ৰাম্পৰ কঠোৰ অনুপ্ৰৱেশ নীতিৰ ফলত আমেৰিকাৰ নাগৰিকত্ব লাভ কৰা বিদেশীসকলৰ বাবে কাৰ্যতঃ অসম্ভৱ হৈ পৰিছে। এই পৰিস্থিতিত কিছু ভাৰতীয় দম্পতীয়ে আমেৰিকাৰ সীমান্তত নিজৰ নাবালক সন্তানক পৰিত্যাগ কৰাৰ মৰ্মান্তিক পথ বাছি লৈছে বুলি জানিব পৰা গৈছে। বহু পৰিয়ালে নিজৰ শিশুৰ জৰিয়তে গ্ৰীণ কাৰ্ড লাভৰ সহজ পথ হিচাপে এই কৌশল গ্ৰহণ কৰিছে বুলি তথ্য প্ৰকাশ পাইছে। ২০২৪ চনৰ অক্টোবৰৰ পৰা আমেৰিকাৰ সীমান্ত টহলদাৰীয়ে এনে ৭৭টা শিশুক আটক কৰিছে। ৫৩টা শিশু মেক্সিকান সীমান্ত আৰু ২২টা শিশু কানাডাৰ সীমান্তৰ পৰা উদ্ধাৰ কৰা হৈছে। এই শিশুসকলৰ ওচৰত পিতৃ-মাতৃৰ নাম লিখা কাগজো উদ্ধাৰ হৈছে বুলি প্ৰকাশ। এনে কাৰ্যৰ জৰিয়তে পৰিয়ালসমূহে শিশুৰ গ্ৰীণ কাৰ্ড লাভৰ পিছত নিজেও নাগৰিকত্ব লাভৰ চেষ্টা কৰিছে।
সংবাদ মাধ্যমত প্ৰকাশিত তথ্য অনুসৰি, গুজৰাটৰ কেইবাটাও পৰিয়ালে এই বিপজ্জনক পদ্ধতি গ্ৰহণ কৰা বুলি স্বীকাৰ কৰিছে। উদাহৰণস্বৰূপ, কৰ’না মহামাৰীৰ সময়ত মেহছানাৰ এগৰাকী অধিবক্তা আৰু তেওঁৰ পত্নীয়ে অবৈধভাৱে আমেৰিকাত প্ৰৱেশ কৰি দুবছৰীয়া সন্তানক ভাৰতত এৰি থৈ গৈছিল। তিনি বছৰৰ পিছত তেওঁলোকৰ পৰিয়ালৰ আন এজন সদস্যই শিশুটিক লৈ আমেৰিকাত প্ৰৱেশ কৰি টেক্সাছৰ সীমান্তত এৰি গৈছিল। শিশুটিৰ সৈতে পিতৃ-মাতৃৰ যোগাযোগৰ তথ্য লিখা এখন টোকা উদ্ধাৰ হৈছিল, যাৰ উদ্দেশ্য আছিল শিশুটিক গ্ৰীণ কাৰ্ড লাভৰ মাধ্যম হিচাপে ব্যৱহাৰ কৰা।
উল্লেক্য যে এনে ক্ষেত্ৰত আদালতে মানৱীয় কাৰণত ৬ৰ পৰা ৮ মাহৰ ভিতৰত শিশুক গ্ৰীণ কাৰ্ড প্ৰদান কৰে, আৰু পৰিয়ালে এই সুযোগ ব্যৱহাৰ কৰি নিজৰ নাগৰিকত্বৰ পথ সুগম কৰে। ২০২৪ চনত এনে ৫১৭টা শিশু আটক হৈছিল, আৰু ২০২৩ চনত এই সংখ্যা ৭৩০ৰ সৰ্বাধিক আছিল।
এই ঘটনা পোহৰলৈ অহাৰ পিছত আমেৰিকাৰ প্ৰশাসনে এনে অবৈধ অনুপ্ৰৱেশৰ প্ৰথা বন্ধ কৰাৰ বাবে কঠোৰ পদক্ষেপ গ্ৰহণ কৰিছে। আমেৰিকাৰ ইমিগ্ৰেচন এণ্ড কাষ্টমছ এনফৰ্চমেণ্টে (আইচিই) এই শিশুসকলক বিচাৰি উলিয়াবলৈ তৎপৰতা দেখুৱাইছে আৰু তেওঁলোকৰ পিতৃ-মাতৃৰ বিৰুদ্ধে ব্যৱস্থা গ্ৰহণৰ প্ৰস্তুতি চলাইছে। ট্ৰাম্প প্ৰশাসনে এই শিশুসকলৰ আইনী পৰামৰ্শৰ বাবে চৰকাৰী পুঁজি হ্ৰাস কৰাৰ লগতে সীমান্তত শিশু পৰিত্যাগৰ ঘটনাৰ বিৰুদ্ধে কঠোৰ আইন প্ৰণয়নৰ কাম আৰম্ভ কৰিছে বুলি সদৰী কৰিছে। শেহতীয়াকৈ এজন আমেৰিকান নাগৰিকক হণ্ডুৰাছলৈ বিতাড়িত কৰা হৈছে, কিন্তু তেওঁৰ দুবছৰীয়া সন্তানক উভতাই পঠোৱাৰ কোনো উদ্যোগ লোৱা নাই। এই পৰিস্থিতিয়ে আমেৰিকাৰ অনুপ্ৰৱেশ নীতিৰ জটিলতা আৰু শিশুসকলৰ নিৰাপত্তাৰ প্ৰতি উদ্বেগ সৃষ্টি কৰিছে।
