ধৰ্মীয় পৰিচয়ৰ আঁৰত ভয়, বিশ্বাস আৰু অন্ধ বিশ্বাসক আহিলা হিচাপে ব্যৱহাৰ কৰি এটা ভয়ংকৰ অপৰাধ চক্ৰ চলি আছিল। পূব লণ্ডনৰ এজন ইমামক তেওঁৰ ‘অলৌকিক শক্তি’ৰ কাহিনী কৈ বছৰ বছৰ ধৰি মহিলা আৰু কিশোৰীক ফান্দত পেলাই যৌন নিৰ্যাতন চলোৱাৰ চাঞ্চল্যকৰ অভিযোগত যাৱজ্জীৱন কাৰাদণ্ডৰ শাস্তি প্ৰদান কৰা হৈছে। মুঠ সাতগৰাকী ভুক্তভোগীৰ এই দীৰ্ঘদিনীয়া নিৰ্যাতনে ভয়, প্ৰতাৰণা আৰু ক্ষমতাৰ ভয়ানক অপব্যৱহাৰৰ এক নিৰ্মম ছবি উন্মোচন কৰিছে।
বৃহস্পতিবাৰে লণ্ডনৰ স্নেয়াৰ্ছব্ৰুক ক্রাউন ক’ৰ্টত এই গোচৰৰ চূড়ান্ত ৰায় ঘোষণা কৰা হয়। ন্যায়াধীশ লেছলি কাথবাৰ্টে অভিযুক্তৰ এই আচৰণক ক্ষমতাৰ নিষ্ঠুৰ আৰু বিকৃত অপব্যৱহাৰ বুলি অভিহিত কৰে। তেওঁ কয় যে ধৰ্মীয় সাজ-পোছাক আৰু এজন সন্মানীয় ইমামৰ পৰিচয় ব্যৱহাৰ কৰি ৫৪ বছৰীয়া আব্দুল হালিম খানে তেওঁৰ ওপৰত আস্থা ৰখা মহিলাক লক্ষ্য কৰি লৈছিল।
আদালতৰ তথ্য অনুসৰি খানে মূলতঃ বাংলাদেশী মূলৰ মুছলমান সম্প্ৰদায়ৰ মহিলাসকলক লক্ষ্য কৰি লৈছিল। তেওঁ তেওঁলোকক বিশ্বাস কৰোৱাইছিল যে তেওঁৰ ভিতৰত জিনৰ শক্তি আছে আৰু সেই শক্তিৰ দ্বাৰা তেওঁ তেওঁলোকৰ শৰীৰৰ পৰা দুষ্ট আত্মাক আঁতৰাই পেলাব পাৰে। এই ভয় আৰু ধৰ্মীয় বিশ্বাসৰ অপব্যৱহাৰ কৰি তেওঁ মহিলাসকলক নিৰ্জন ঠাইলৈ লৈ গৈছিল আৰু তাত যৌন নিৰ্যাতন চলাইছিল।
কিছুমান ক্ষেত্ৰত তেওঁ তেওঁলোকক ভাবুকি দিছিল যে যদি তেওঁলোকে তেওঁৰ কথা নুশুনে বা কাৰোবাক ঘটনাৰ কথা কয় তেন্তে তেওঁলোকৰ বা তেওঁলোকৰ পৰিয়ালৰ ওপৰত ‘ক’লা যাদু’ বা ক্ষতিকৰ পৰিণতি আহিব। ফলত দীৰ্ঘদিন ধৰি নিমাত হৈ ভুক্তভোগীয়ে কাকো ক’বলৈ সাহস নকৰিলে। বিচাৰৰ সময়ত আদালতে শুনানি গ্ৰহণ কৰি কয় যে সেই সময়ত ভুক্তভোগী তিনিগৰাকী কিশোৰী আছিল, যেতিয়া নিৰ্যাতন সংঘটিত হৈছিল ইয়াৰে এগৰাকীৰ বয়স আছিল মাত্ৰ ১৩ বছৰ।
এগৰাকী ভুক্তভোগীয়ে আদালতত কয় যে তেওঁ সঁচাকৈয়ে বিশ্বাস কৰিছিল যে ইমামৰ বিশেষ ক্ষমতা আছে। আনহাতে আন এগৰাকীয়ে কয় যে তাই মাত মাতিলে পৰিয়াল বিপদত পৰিব বুলি ভাবুকি দিয়া হৈছিল।
বিচাৰ বিভাগে কয় যে খানে নিজৰ ধৰ্মীয় অৱস্থানৰ সহায় লৈ নিজৰ ভুক্তভোগীৰ আস্থা ভংগ কৰি মানসিকভাৱে নিয়ন্ত্ৰণত ৰাখিছিল। এজন অধিবক্তাই আদালতত কয় যে তেওঁ নিজকে মহিলাৰ আগত পৱিত্ৰ আৰু বিশ্বাসযোগ্য বুলি উপস্থাপন কৰে যদিও বাস্তৱত তেওঁ সেই বিশ্বাসৰ গুৰুতৰ অপব্যৱহাৰ কৰিছিল।
ৰায় ঘোষণা কৰাৰ সময়ত ন্যায়াধীশগৰাকীয়ে কয় যে অভিযুক্তজন বাহিৰৰ পৰা ধৰ্মীয় আৰু সন্মানীয় বুলি জনা যায় যদিও ভিতৰৰ পৰা তেওঁ এজন ভয়ংকৰ অপৰাধী। তেওঁক কমেও ২০ বছৰৰ যাৱজ্জীৱন কাৰাদণ্ডৰ শাস্তি প্ৰদান কৰা হয়। আদালতৰ এই ৰায়দানৰ ফলত ভয়, প্ৰতাৰণা আৰু নিৰ্যাতনৰ এক দীঘলীয়া আৰু ভয়ানক অধ্যায়ৰ অন্ত পৰিল।
