ব্ৰিটেইনৰ নতুন প্ৰধানমন্ত্ৰী হিচাপে নিৰ্বাচিত হোৱা লিজ ট্ৰাছে মঙলবাৰে এগৰাকী ভাৰতীয় বংশোদ্ভূত মহিলাক দেশখনৰ এক শীৰ্ষ পদত নিযুক্তি দিছে। ট্ৰাছে দেশখনৰ নতুন গৃহ সচিব হিচাপে নিযুক্তি দিছে ভাৰতীয় মূলৰ চুৱেলা ব্ৰেভাৰমেনক।
ব্ৰেভাৰমেন আন এগৰাকী ভাৰতীয় বংশোদ্ভূত মহিলা প্ৰীতি পেটেলৰ স্থানত এই পদত অধিষ্ঠিত হ’ব। কনজাৰ্ভেটিভ পাৰ্টিৰ সদস্য ৪২ বৰ্ষীয় চুৱেলা ব্ৰেভাৰমেন দক্ষিণ-পূব ইংলেণ্ডৰ ফাৰেহামৰ পৰা ২০১৫ চনত সাংসদ হিচাপে নিৰ্বাচিত হৈছিল।
উল্লেখ্য যে ব্ৰেভাৰমেনে বৰিছ জনছন নেতৃত্বাধীন চৰকাৰত এটৰ্নি জেনেৰেল হিচাপে কাৰ্যনিৰ্বাহ কৰিছিল। প্ৰাক্তন প্ৰধানমন্ত্ৰী থেৰেছা মেৰ ব্ৰেক্সিট চুক্তি সন্দৰ্ভত সংসদত তিনিবাৰকৈ হোৱা ভোট গ্ৰহণত সমৰ্থন আগবঢ়াবলৈ অস্বীকাৰ কৰা ২৮ গৰাকী “স্পাৰ্টান” টৰী সাংসদৰ ভিতৰত অন্যতম আছিল চুৱেলা ব্ৰেভাৰমেন।
১৯৮০ চনৰ ৩ এপ্ৰিলত জন্মগ্ৰহণ কৰা চুৱেলা ব্ৰেভাৰমেনৰ মাতৃ উমা এগৰাকী তামিল আৰু পিতৃ ক্ৰিষ্টি ফাৰ্ণাণ্ডেজ গোৱান বংশোদ্ভূত।
প্ৰাৰম্ভিক ভোটদানৰ দ্বিতীয় ৰাউণ্ডত দৌৰৰ পৰা বাহিৰ হোৱাৰ পিছত চুৱেলা ব্ৰেভাৰমেনে লিজ ট্ৰাছলৈ সমৰ্থন আগবঢ়াইছিল। এই সমৰ্থনৰ পাছতে মঙ্গবাৰে ট্ৰাছে ব্ৰেভাৰমেনক ব্ৰিটিছ চৰকাৰৰ অন্যতম উচ্চ পদেৰে পুৰস্কৃত কৰিছে।
