আমেৰিকাৰ কেলিফৰ্ণিয়াত এখন ৰেষ্টুৰেণ্টৰ বাহিৰত ভাৰতীয় মূলৰ এগৰাকী যুৱতীক গুলীয়াই হত্যা কৰে। গুলীচালনাৰ পিছতে অভিযুক্তজনে পলায়ন কৰে যদিও কিছু সময়ৰ পিছতে আৰক্ষীয়ে তেওঁক বিচাৰি উলিয়ায়। আৰক্ষীৰ সৈতে মুখামুখি হোৱাৰ সময়ত তেওঁ নিজকে গুলীয়াই দিয়াৰ অভিযোগ উত্থাপন হৈছে, যাৰ ফলত তেওঁৰ ঠাইতে মৃত্যু হয়। অভিযুক্তই মহিলাগৰাকীক বিয়া কৰাব বিচাৰিছিল আৰু প্ৰায় এবছৰ ধৰি তেওঁক অনুসৰণ কৰিছিল।
বাতৰি অনুসৰি কেলিফৰ্ণিয়াৰ চেক্ৰেমেণ্টোত সংঘটিত হৈছে এই ঘটনা। ৮ ছেপ্টেম্বৰত চহৰখনৰ আৰ্ডেন-আৰ্কেড অঞ্চলৰ পনেৰা ব্ৰেড নামৰ এখন ৰেষ্টুৰেণ্টৰ বাহিৰত সংঘটিত হয় এই আক্ৰমণ। মৃতা যুৱতীগৰাকীক শালিনী ঠাকুৰ (৩৮) বুলি চিনাক্ত কৰা হৈছে।
অভিযুক্তও ভাৰতীয় মূলৰে ২২ বছৰীয়া ৰোহিত নামৰ এজন যুৱক। তেওঁ ২০২৩ চনত আমেৰিকালৈ প্ৰব্ৰজন কৰিছিল। আমেৰিকাৰ গৃহ নিৰাপত্তা বিভাগৰ তথ্য অনুসৰি তেওঁ তাত নথি-পত্ৰবিহীন অনুপ্ৰৱেশকাৰী আছিল।
আৰক্ষীৰ মতে, শালিনীয়ে ৰোহিতক তেওঁৰ কৰ্মস্থলী ড’ৰডেচ পিকআপৰ জৰিয়তে চিনি পাইছিল, য’ত তেওঁ ওৱেট্ৰেছ হিচাপে কাম কৰিছিল। কৰ্তৃপক্ষই জনোৱা মতে, আক্ৰমণৰ সময়ত শালিনীয়ে পলাবলৈ চেষ্টা কৰিছিল যদিও ৰোহিতে তেওঁক খেদি খেদি কেইবাজনো লোকৰ সন্মুখতে একাধিক গুলী চলায়।
শালিনী পৰি যোৱাৰ পিছত ৰোহিতে ওচৰৰ পৰা তেওঁৰ মূৰত আৰু এটা গুলী চলায়। খবৰ লাভ কৰি উপস্থিত হোৱা বিষয়াসকলে শালিনীক ৰেষ্টুৰেণ্টৰ বাহিৰত অচেতন অৱস্থাত উদ্ধাৰ কৰে। চিকিৎসা কৰ্মীয়ে ঘটনাস্থলীতে তেওঁক মৃত বুলি ঘোষণা কৰে।
চেক্ৰেমেণ্টো কাউন্টি শ্বেৰিফৰ কাৰ্যালয়ৰ সহকাৰী মুখপাত্ৰ লেফটেনেণ্ট অমৰ গান্ধীৰ মতে, প্ৰত্যক্ষদৰ্শীৰ জৰিয়তে ক্ষন্তেকতে সন্দেহজনক লোকজনৰ বাহনখনৰ সন্ধান উলিয়ায়। কেই মিনিটমানৰ পাছতে ইষ্ট বাউণ্ড ৫০ নং ঘাইপথত গাড়ীখন ধৰা পৰে। আৰক্ষীয়ে ততালিকে ঘটনাস্থলীত উপস্থিত হয়।
তেওঁ জনোৱা মতে, যেতিয়া বিষয়াসকলে গাড়ীখন ৰখাবলৈ চেষ্টা কৰিছিল, তেতিয়া ৰোহিতে তীব্ৰভাৱে ব্ৰেক লগোৱাৰ ফলত গাড়ীখন ঘাইপথত ৰৈ যায়। আৰক্ষীৰ এক বিবৃতি অনুসৰি চালকৰ আসনত অচেতন অৱস্থাত উদ্ধাৰ হয় ৰোহিত। তেওঁক মৃত বুলি ঘোষণা কৰা হয়। আৰক্ষীয়ে জনোৱা মতে, তেওঁ নিজকে গুলীয়াই আত্মহত্যা কৰা বুলি সন্দেহ কৰে।
চেক্ৰেমেণ্টোৰ আগশাৰীৰ নিউজ চেনেল কেচিআৰএ ৩ৰ মতে শালিনী ঠাকুৰৰ মাতৃ সুদেশ কুমাৰীয়ে প্ৰায় এবছৰ ধৰি ৰোহিতে শালিনীক অনুসৰণ কৰিছিল আৰু হাৰাশাস্তি কৰি আহিছে বুলি প্ৰকাশ কৰিছে। ৰোহিতে তেওঁৰ জীয়েকক বিয়া কৰাব বিচাৰিছিল যদিও তেওঁলোকৰ বয়সৰ পাৰ্থক্যৰ বাবে শালিনীয়ে নাকচ কৰিছিল বুলিও কয়। ৮ ছেপ্টেম্বৰত, গুলীচালনাৰ প্ৰায় এঘণ্টা আগতে ১:৫৮ বজাত দুয়োৱে ফোনত কথা পাতিছিল।
শালিনীয়ে মাকক ১৫ মিনিটৰ পিছত ফোন কৰিম বুলি কৈছিল যদিও সেই ফোনটো কেতিয়াও নাহিল। দুবছৰ আগতে শালিনীৰ পিতৃৰ মৃত্যু হৈছিল। সুদেশে কেইবাটাও ফোন আৰু মেছেজ দেখুৱাইছিল যিবোৰৰ উত্তৰ পোৱা নাছিল। ইয়াৰ ভিতৰত আছিল “প্লিজ মোক ফোন কৰা” আৰু “মই তোমাৰ বাবে চিন্তিত” আদি বাৰ্তা।
আদালতৰ নথি-পত্ৰই ইংগিত দিয়ে যে ২০২৫ চনৰ ছেপ্টেম্বৰৰ আশে-পাশে ৰোহিতৰ এই পিছ লোৱা আৰম্ভ হৈছিল। ক্ৰমান্বয়ে ৰোহিতৰ আচৰণ বেয়া হৈ আহিছিল। সি ঘণ্টাৰ পিছত ঘণ্টা ধৰি শালিনীৰ ঘৰৰ বাহিৰত ৰৈ আছিল, তেওঁৰ গাড়ীৰ টায়াৰৰ হাৱা এৰি দিছিল আৰু অনুসৰণ কৰিবলৈ গাড়ীৰ তলত এপল এয়াৰটেগ লগাই দিছিল।
তেওঁৰ এই কাৰ্যত হতাশ হৈ শালিনী ঠাকুৰে আৰক্ষীৰ অনুৰোধত ৰেষ্ট্ৰেইনিং অৰ্ডাৰ লাভ কৰে। এই আদেশৰ অধীনত অভিযুক্তই তেওঁৰ পিছ লোৱাত বাধা আৰোপ কৰিছিল। অৱশ্যে ৰোহিতে সেয়া উলংঘা কৰিলে। সি শালিনীক বিয়া কৰাবলৈ হেঁচা দি আছিল আৰু তেওঁৰ পিছ লৈছিল।
