ভাৰতীয় মূলৰ ডেম’ক্ৰেটিক নেতা জোহৰাণ মামদানীয়ে নিউয়ৰ্ক চহৰৰ ১১২ সংখ্যক মেয়ৰ হিচাপে শপত গ্ৰহণ কৰি এক নতুন ইতিহাস ৰচনা কৰিছে। বৃহস্পতিবাৰে মাজনিশা মানহাটানৰ এটা পৰিত্যক্ত ছাবমেট্ৰ’ ষ্টেচনত পবিত্ৰ কোৰআনক সাক্ষী কৰি তেওঁ এই পদৰ বাবে শপত লয়। নিউয়ৰ্কৰ এটৰ্নী জেনেৰেল লেটিচিয়া জেমছে তেওঁক শপত বাক্য পাঠ কৰোৱায়। শপত গ্ৰহণৰ সময়ত জোহৰাণৰ পত্নী ৰামা দুয়াজীয়ে হাতত কোৰআন লৈ তেওঁৰ কাষত থিয় হৈ আছিল। শপত লোৱাৰ পিছত দিয়া তেওঁৰ প্ৰথম বাৰ্তাত তেওঁ এই সুযোগক জীৱনৰ আটাইতকৈ ডাঙৰ সন্মান বুলি অভিহিত কৰে আৰু কয় যে চহৰখনৰ পৰম্পৰা ৰক্ষা কৰি তেওঁ নিউয়ৰ্কবাসীৰ সেৱাত ব্ৰতী হ’ব।
মামদানীয়ে শপত ল’বলৈ বাছনি কৰা এই পৰিত্যক্ত ছাবমেট্ৰ’ ষ্টেচনটোৰ এক বিশেষ গুৰুত্ব আছে। ১৯০৪ চনত নিউয়ৰ্কত মেট্ৰ’ সেৱা আৰম্ভ হোৱাৰ সময়ত যিবোৰ ১৮টা মূল ষ্টেচন নিৰ্মাণ কৰা হৈছিল, এই চিটি হল ষ্টেচনটো তাৰ ভিতৰৰে অন্যতম আছিল। পৰৱৰ্তী সময়ত প্ৰযুক্তিৰ পৰিৱৰ্তন আৰু জনসংখ্যা বৃদ্ধিৰ বাবে এই ষ্টেচনটো বন্ধ কৰি দিয়া হৈছিল যদিও আজিও ই চহৰখনৰ ঐতিহ্যৰ প্ৰতীক হিচাপে বিবেচিত হয়। মামদানীৰ মতে, এই ষ্টেচনটোৱে নিউয়ৰ্কৰ শ্ৰমজীৱী মানুহৰ পৰিশ্ৰম আৰু চহৰখনৰ ইতিহাসক প্ৰতিফলিত কৰে, সেয়েহে ইয়াৰ অৱদানক সন্মান জনাই তেওঁ এই ঐতিহাসিক স্থানত শপত লোৱাৰ সিদ্ধান্ত লয়।
নিউয়ৰ্কৰ ইতিহাসত যোৱা ১০০ বছৰৰ ভিতৰত মামদানীয়েই হৈছে আটাইতকৈ কম বয়সীয়া মেয়ৰ। মাত্ৰ ৩৪ বছৰ বয়সতে এই গুৰুত্বপূৰ্ণ দায়িত্ব লাভ কৰা তেওঁ হ’ল নিউয়ৰ্কৰ প্ৰথমজন মুছলমান মেয়ৰ। নিৰ্বাচনৰ পূৰ্বে ড’নাল্ড ট্ৰাম্পৰ দৰে শক্তিশালী নেতাৰ তীব্ৰ বিৰোধিতা আৰু উপহাসৰ সন্মুখীন হৈছিল যদিও নিউয়ৰ্কৰ জনসাধাৰণে তেওঁৰ ওপৰত আস্থা প্ৰকাশ কৰে। নিৰ্বাচনত জয়ী হোৱাৰ পিছত অৱশ্যে মামদানীয়ে ট্ৰাম্পৰ সৈতে সাক্ষাৎ কৰি এক সৌজন্যমূলক সম্পৰ্কৰ ইংগিত দিছে, যিটোৱে বৰ্তমান সকলোৰে দৃষ্টি আকৰ্ষণ কৰিছে।
উগাণ্ডাৰ কাম্পালাত জন্মগ্ৰহণ কৰা মামদানীৰ শিপা ভাৰতৰ সৈতে গভীৰভাৱে জড়িত। তেওঁৰ পিতৃ মাহমুদ মামদানী এগৰাকী বিখ্যাত সাহিত্যিক আৰু মাতৃ হ’ল বিশ্ববিখ্যাত চলচ্চিত্ৰ পৰিচালক মীৰা নাইৰ। বৰ্তমান কুইন্সৰ বাসিন্দা জোহৰাণে তাত বসবাস কৰা বাংলাদেশীসকলৰ সৈতে মিলি বাংলা ভাষাও আয়ত্ত কৰিছে। নিৰ্বাচনী প্ৰচাৰৰ সময়ত তেওঁক বাংলা ভাষাত কথা কোৱা দেখা গৈছিল আৰু তেওঁ বিশেষকৈ সস্তীয়া খাদ্য, কাপোৰ আৰু বাসগৃহৰ দৰে মৌলিক সা-সুবিধাৰ প্ৰতিশ্ৰুতিৰে জনসাধাৰণৰ মন জয় কৰিবলৈ সক্ষম হৈছে।
