ৰে’লৰ ভাড়া বৃদ্ধিৰ কথা ঘোষণা কৰিছে ভাৰতীয় ৰে’লৱেই। সোমবাৰে ভাৰতীয় ৰে’ল মন্ত্ৰালয়ে প্ৰকাশ কৰা এক বিবৃতিত কয় যে ১ জুলাই মঙলবাৰৰ পৰা নন-এচি মেইল আৰু এক্সপ্ৰেছ ৰে’লৰ ভাড়া প্ৰতি কিলোমিটাৰত এক পইচা বৃদ্ধি কৰাৰ লগতে এচি ক্লাছৰ ভাড়া প্ৰতি কিলোমিটাৰত দুপইচা বৃদ্ধি কৰা হৈছে।
ইয়াৰ পূৰ্বে মন্ত্ৰালয়ৰ এজন বিষয়াই ২৪ জুনত প্ৰস্তাৱিত ভাড়া পুনৰীক্ষণৰ ইংগিত দিছিল। সোমবাৰে ৰে’ল আৰু শ্ৰেণী অনুসৰি ভাড়া তালিকাৰ সৈতে চৰকাৰী অধিসূচনা প্ৰকাশ কৰা হয়।
দৈনিক যাত্ৰীৰ সুবিধাৰ্থে উপনগৰীয়া ৰে’লৰ ভাড়া আৰু মাহেকীয়া ছিজন টিকটৰ ভাড়া অপৰিৱৰ্তিত ৰখা হৈছে। ৫০০ কিলোমিটাৰ পৰ্যন্ত সাধাৰণ দ্বিতীয় শ্ৰেণীৰ ভাড়া বৃদ্ধি কৰা হোৱা নাই। ইয়াৰ ওপৰৰ দূৰত্বৰ বাবে প্ৰতি কিলোমিটাৰত আধা পইচা টিকটৰ মূল্য বৃদ্ধি কৰা হৈছে।
অৰ্থাৎ ৫০১ৰ পৰা ১৫০০ কিলোমিটাৰ দূৰত্বৰ বাবে ৫ টকা, ১৫০১ৰ পৰা ২৫০০ কিলোমিটাৰ দূৰত্বৰ বাবে ১০ টকা আৰু ২৫০১ৰ পৰা ৩০০০ কিলোমিটাৰ দূৰত্বৰ বাবে ১৫ টকা বৃদ্ধি পাব।
একেদৰে শ্লিপাৰ ক্লাছ আৰু ফাৰ্ষ্ট ক্লাছ (জেনেৰেল)ৰ ভাড়াও প্ৰতি কিলোমিটাৰত আধা পইচা বৃদ্ধি কৰা হ’ব। নন-এচি মেইল আৰু এক্সপ্ৰেছ ৰে’লৰ ছেকেণ্ড ক্লাছ, শ্লিপাৰ ক্লাছ আৰু ফাৰ্ষ্ট ক্লাছৰ ভাড়া প্ৰতি কিলোমিটাৰত এক পইচা বৃদ্ধি কৰা হ’ব। এচি চেয়াৰ কাৰ, এচি থ্ৰী-টাইয়াৰ, এচি টু-টাইয়াৰ আৰু এচি ফাৰ্ষ্ট ক্লাছ (এক্সিকিউটিভিটি ক্লাছ আৰু ইএকে ধৰি)কে ধৰি এচি ক্লাছৰ ভাড়া প্ৰতি কিলোমিটাৰত দুপইচা বৃদ্ধি কৰা হ’ব।
এই সংশোধিত ভাড়াৰ গাঁথনি তেজস ৰাজধানী, ৰাজধানী, শতাব্দী, দুৰন্ত, বন্দে ভাৰত, হামছফৰ, অমৃত ভাৰত, মহামনা, গতিমান, অন্ত্যোদয়, গৰিব ৰথ, জন শতাবদী, যুৱ এক্সপ্ৰেছকে ধৰি প্ৰিমিয়াম আৰু ছেমি প্ৰিমিয়াম ৰেল সেৱাৰ ক্ষেত্ৰত প্ৰযোজ্য হ’ব।
ৰিজাৰ্ভেশ্যন চাৰ্জ, ছুপাৰফাষ্ট চাৰচাৰ্জ বা অন্যান্য আকস্মিক মাচুলৰ কোনো পৰিৱৰ্তন নহ’ব। যিবোৰ প্ৰযোজ্য অনুসৰি পৃথকে পৃথকে আৰোপ কৰা হ’ব। পুৰণি নিৰ্দেশনা অনুসৰি সামগ্ৰী আৰু সেৱা কৰ (জি এছ টি) অব্যাহত থাকিব।
যিসকলে নিয়মিতভাৱে কাৰ্যালয় বা বিদ্যালয়লৈ যাবলৈ এম এছ টি ব্যৱহাৰ কৰে তেওঁলোকৰ বাবে ১ জুলাইৰ পিছতো ভাড়া অপৰিৱৰ্তিত থাকিব। এয়া লাখ লাখ যাত্ৰীৰ বাবে এক বৃহৎ সকাহ।
ভাড়া বৃদ্ধিৰ সমান্তৰালকৈ ৰে’লৱেই তৎকাল টিকট বুকিংৰ নিয়মো কটকটীয়া কৰি তুলিছে। ১ জুলাইৰ পৰা আই আৰ চি টি চিৰ ৱেবছাইট বা মোবাইল এপৰ জৰিয়তে কেৱল আধাৰ পৰীক্ষিত যাত্ৰীসকলেহে তৎকাল টিকট বুকিং কৰিব পাৰিব। ১৫ জুলাইৰ পৰা তৎকাল বুকিং প্ৰক্ৰিয়াৰ সময়ত অ’টিপি ভিত্তিক আধাৰ পৰীক্ষণ বাধ্যতামূলক হ’ব। এই পদক্ষেপৰ লক্ষ্য হৈছে স্বচ্ছতা বৃদ্ধি আৰু প্ৰৱঞ্চনামূলক বুকিং হ্ৰাস কৰা।
ৰে’লৱে যাত্ৰাৰ আঠ ঘণ্টা পূৰ্বে চূড়ান্ত ৰিজাৰ্ভেশ্যন চাৰ্ট তৈয়াৰ কৰাৰ কামো কৰি আছে, যিটো ৰে’ল যাত্ৰাৰ চাৰি ঘণ্টা পূৰ্বে আছিল। ইয়াৰ দ্বাৰা অপেক্ষাৰ তালিকাত থকা যাত্ৰীসকলে লাভৱান হ’ব বুলি আশা কৰা হৈছে কাৰণ ইয়াৰ দ্বাৰা তেওঁলোকৰ টিকট অনিশ্চিত হ’লে বিকল্প পৰিকল্পনা কৰিবলৈ অতিৰিক্ত সময় পাব।
