ইউক্ৰেইনৰ সৈতে চলি থকা যুদ্ধত ৰাছিয়াৰ সেনাবাহিনীৰ হৈ যুঁজি প্ৰাণ হেৰুওৱা ১০ জন ভাৰতীয় যুৱকৰ মৃত্যুৰ খবৰ নিশ্চিত কৰা হৈছে। নিহতসকলৰ ভিতৰত তিনিজন পঞ্জাৱৰ আৰু বাকী সাতজন উত্তৰ প্ৰদেশ তথা জম্মু-কাশ্মীৰকে ধৰি অন্যান্য ৰাজ্যৰ বাসিন্দা বুলি জানিব পৰা গৈছে।
উল্লেখ্য যে, সন্ধানহীন যুৱকসকলৰ বিচাৰত ৰাছিয়ালৈ গৈছিল পঞ্জাৱৰ জগদীপ সিং। তেওঁ মস্কোসহ বিভিন্ন স্থানত অনুসন্ধান চলাইছিল যদিও প্ৰথম অৱস্থাত কোনো নিশ্চিত তথ্য লাভ কৰা নাছিল। ভাৰতলৈ উভতি অহাৰ পিছত তেওঁ ৰাজ্যসভাৰ সাংসদ সন্ত বলবীৰ সিং ছিচেৱালৰ কাৰ্যালয়ত উপস্থিত হৈ ৰাছিয়াৰ সেনাই যুৱকসকলৰ মৃত্যুৰ কথা নিশ্চিত কৰা নথি-পত্ৰ দাখিল কৰে।
জগদীপ সিঙে অভিযোগ কৰে যে, বহু ভাৰতীয় যুৱকক বিদেশত কৰ্মসংস্থাপনৰ লোভ দেখুৱাই প্ৰতাৰণা কৰি বলপূৰ্বকভাৱে ৰাছিয়াৰ সেনাবাহিনীত ভৰ্তি কৰোৱা হৈছে। তেওঁৰ ভাষ্য অনুসৰি, সেনাত যোগদানৰ সন্মতি নিদিলে গ্ৰেপ্তাৰ কৰাৰ লগতে মানসিক আৰু শাৰীৰিক নিৰ্যাতন চলাই বলপূৰ্বকভাৱে যুদ্ধক্ষেত্ৰলৈ প্ৰেৰণ কৰা হয়।
জগদীপে জনোৱা মতে, নিহত ১০ জনৰ ভিতৰত অমৃতসৰৰ তেজপাল সিং, লক্ষ্ণৌৰ অৰবিন্দ কুমাৰ, উত্তৰ প্ৰদেশৰ ধীৰেন্দ্ৰ কুমাৰ, বিনোদ যাদৱ আৰু যোগেন্দ্ৰ যাদৱ অন্যতম। ইফালে, দীপক, যোগেশ্বৰ প্ৰসাদ, আজহাৰউদ্দিন খান আৰু ৰামচন্দ্ৰ নামৰ আন চাৰিজন ভাৰতীয় এতিয়াও সন্ধানহীন হৈ আছে।
তেওঁৰ মতে, বৰ্তমানো নিহত ১০ ভাৰতীয়ৰ মৃতদেহ ৰাছিয়াতেই আছে আৰু সেইসমূহ স্বদেশলৈ ঘূৰাই অনাৰ বাবে কূটনৈতিক প্ৰচেষ্টা অব্যাহত আছে।
