ইৰানৰ সৰ্বোচ্চ নেতা আয়াতুল্লাহ আলী খামেনেইৰ শেষকৃত্যত অংশগ্ৰহণ কৰাৰ বাবে ইৰানে ভাৰত চৰকাৰ আৰু দেশখনৰ জনসাধাৰণক ৰাজহুৱাভাৱে ধন্যবাদ জ্ঞাপন কৰিছে। ইৰানৰ এই কৃতজ্ঞতা প্ৰকাশৰ আঁৰত এক গুৰুত্বপূৰ্ণ কূটনৈতিক প্ৰেক্ষাপট আছে। খবৰ অনুসৰি, আমেৰিকা যুক্তৰাষ্ট্ৰৰ তীব্ৰ কূটনৈতিক চাপৰ বাবে বহু কেইখন দেশে খামেনেইৰ শেষকৃত্য অনুষ্ঠানৰ পৰা আঁতৰি আছিল বা নিজৰ প্ৰতিনিধিত্ব হ্ৰাস কৰিছিল। ইয়াৰ মাজতো ভাৰতে নিজৰ উপস্থিতি সাব্যস্ত কৰি দুই দেশৰ মাজৰ দীৰ্ঘদিনীয়া বন্ধুত্বপূৰ্ণ সম্পৰ্কক পুনৰ প্ৰতিষ্ঠা কৰে।
ইৰানৰ অৰ্ধ-চৰকাৰী তাচনিম সংবাদ প্ৰতিষ্ঠানে প্ৰকাশ কৰা এক প্ৰতিবেদন অনুসৰি, আমেৰিকাৰ হাৰাশাস্তি আৰু কূটনৈতিক হেঁচাৰ বাবে দুখন উপসাগৰীয় দেশসহ অন্ততঃ ১৩ খন দেশে খামেনেইৰ শেষকৃত্য অনুষ্ঠানত অংশ লোৱাৰ পৰা বিৰত থাকে বা প্ৰতিনিধি হ্ৰাস কৰে। আমেৰিকাৰ বৈদেশিক সচিব মাৰ্কো ৰুবিঅ’ই নিজেই অন্ততঃ পাঁচখন আৰব দেশৰ চৰকাৰৰ সৈতে যোগাযোগ কৰি তেওঁলোকক এই শেষকৃত্য সমদলত অংশ নল’বলৈ অনুৰোধ কৰিছিল। আমেৰিকাৰ দূতাবাসসমূহেও কেইবাখনো দেশক সতৰ্ক কৰি দিছিল যে খামেনেইৰ শেষকৃত্যত উপস্থিত থকাটো ৱাশ্বিংটনৰ প্ৰতি এক বন্ধুহীন আচৰণ বুলি গণ্য কৰা হ’ব আৰু ইয়াৰ বাবে উন্নয়নমূলক সাহায্য কৰ্তন কৰাকে ধৰি দ্বিপাক্ষিক সম্পৰ্কত নেতিবাচক প্ৰভাৱ পৰিব পাৰে।
এই সকলোবোৰ প্ৰত্যাহ্বানৰ মাজতো ভাৰত চৰকাৰে এটা চৰকাৰী প্ৰতিনিধি দল ইৰানলৈ প্ৰেৰণ কৰে। এই প্ৰতিনিধি দলটোত বৈদেশিক পৰিক্ৰমা ৰাজ্যিক মন্ত্ৰী পবিত্ৰ মাৰ্ঘেৰিটা আৰু বিহাৰৰ ৰাজ্যপাল তথা অৱসৰপ্ৰাপ্ত লেফটেনেণ্ট জেনেৰেল ছৈয়দ আতা হাছনাইন আছিল। ইয়াৰ উপৰিও জম্মু-কাশ্মীৰৰ প্ৰাক্তন মুখ্যমন্ত্ৰী মেহবুবা মুফ্টী, প্ৰাক্তন বৈদেশিক পৰিক্ৰমা মন্ত্ৰী চলমান খুৰ্ছিদ আৰু ভাৰতৰ বিভিন্ন ধৰ্মীয় পৰম্পৰাৰ ধৰ্মগুৰুসকল এই দলটোত চামিল আছিল। ভাৰতৰ এই পদক্ষেপ মধ্যপ্ৰাচ্যৰ ভূ-ৰাজনৈতিক প্ৰতিদ্বন্দিতাৰ মাজতো সকলো পক্ষৰ সৈতে সন্তুলিত সম্পৰ্ক ৰখাৰ এক দীৰ্ঘদিনীয়া নীতিৰ সৈতে সংগতিপূৰ্ণ।
ভাৰতত থকা ইৰানৰ দূতাবাসছে ছ’চিয়েল মিডিয়া প্লেটফৰ্ম এক্সৰ জৰিয়তে ভাৰতীয় প্ৰতিনিধি দলটোক আৰু দেশৰ জনসাধাৰণক আন্তৰিক ধন্যবাদ জ্ঞাপন কৰিছে। তেওঁলোকে কয় যে ভাৰতৰ এই উপস্থিতিয়ে দুই দেশৰ ঐতিহাসিক সম্পৰ্কক অধিক শক্তিশালী কৰিব আৰু ইৰানৰ জনসাধাৰণে ভাৰতৰ এই সহমৰ্মিতা আৰু সন্মানৰ ভাৱক কেতিয়াও পাহৰি নাযায়। ইফালে, উপসাগৰীয় দেশসমূহৰ ভিতৰত চৌদি আৰৱ, কাটাৰ আৰু ওমানে খামেনেইৰ শেষকৃত্যলৈ চৰকাৰী প্ৰতিনিধি প্ৰেৰণ কৰাৰ বিপৰীতে সংযুক্ত আৰৱ আমিৰাত, কুৱেইট আৰু বাহৰেইনে এই অনুষ্ঠানৰ পৰা বিৰত থাকে। ইৰানৰ এই কঠিন সময়ত ভাৰতে আগবঢ়োৱা সঁহাৰিয়ে বিশ্ব ৰাজনীতিৰ মঞ্চত এক বিশেষ তাৎপৰ্য বহন কৰিছে।
