নৱবৰ্ষৰ দিনা নিৰুদ্দেশ হৈছিল যুৱতীগৰাকী। আমেৰিকাৰ মেৰিলেণ্ডৰ প্ৰেমিকৰ ফ্লেটৰ পৰা উদ্ধাৰ হৈছে এগৰাকী ভাৰতীয় মহিলাৰ ৰক্তাক্ত মৃতদেহ। আৰক্ষীয়ে দাবী কৰিছে যে সেই ফ্লেটতে নিকিতা গোডিছালা (২৭)ক হত্যা কৰা হৈছিল।
ঘটনাৰ মূল অভিযুক্ত হৈছে তেওঁৰ প্ৰাক্তন প্ৰেমিক অৰ্জুন শৰ্মা। ইতিমধ্যে প্ৰথম ডিগ্ৰী আৰু দ্বিতীয় ডিগ্ৰী হত্যাৰ অভিযোগত তেওঁৰ বিৰুদ্ধে গ্ৰেপ্তাৰী পৰোৱানা জাৰি কৰা হৈছে। অৱশ্যে অভিযুক্তই দেশ এৰি পলায়ন কৰাৰ বাবে এতিয়ালৈকে তেওঁক ধৰিব পৰা নাই।
আৰক্ষীয়ে জনোৱা মতে নিকিতা গোডিছালা পেছাত এগৰাকী ডাটা এণ্ড ষ্ট্ৰেটেজি এনালাইষ্ট। হাৱাৰ্ড কাউন্টিৰ এলিকট চিটিত বাস কৰিছিল। নৱবৰ্ষৰ আগনিশা ৩১ ডিচেম্বৰত নিৰুদ্দেশ হৈছিল নিকিতা।
ঘটনাৰ পিছতে তেওঁৰ প্ৰাক্তন প্ৰেমিক অৰ্জুন শৰ্মাই ২ জানুৱাৰীত স্থানীয় আৰক্ষীত নিৰুদ্দেশৰ ৰিপোৰ্ট দাখিল কৰে। তেওঁ আৰক্ষীক জনাইছিল যে তেওঁ শেষবাৰৰ বাবে ৩১ ডিচেম্বৰত নিকিতাক নিজৰ এপাৰ্টমেণ্টত দেখা পাইছিল। তেতিয়াৰ পৰা নিকিতাক বিচাৰি পোৱা নাই।
কিন্তু তদন্ত আগবাঢ়ি যোৱাৰ লগে লগে ভয়ংকৰ তথ্য পোহৰলৈ আহিল। ৩ জানুৱাৰীত আৰক্ষীয়ে অৰ্জুন শৰ্মাৰ এপাৰ্টমেণ্টত তালাচী চলায়। তাৰ পৰাই নিকিতাৰ মৃতদেহ উদ্ধাৰ কৰা হয়।
আৰক্ষীৰ প্ৰাৰম্ভিক তদন্তত প্ৰকাশ পাইছে যে নিকিতাক ঘপিয়াই হত্যা কৰা হৈছে। তদন্তকাৰীয়ে অনুমান কৰিছে যে ৩১ ডিচেম্বৰৰ সন্ধিয়া ৭ বজাৰ কিছু সময়ৰ পিছতে এই হত্যাকাণ্ড সংঘটিত হৈছিল।
তদন্তৰ সময়ত আৰু অধিক চাঞ্চল্যকৰ তথ্য পোহৰলৈ আহে। আৰক্ষীয়ে জনোৱা মতে, নিৰুদ্দেশ হোৱা ব্যক্তিজনৰ ৰিপৰ্ট দাখিল কৰা দিনটোতে অৰ্জুন শৰ্মাই আমেৰিকা যুক্তৰাষ্ট্ৰৰ পৰা ভাৰতলৈ পলায়ন কৰে। ইয়াৰ ফলত সন্দেহ গভীৰ হৈ পৰিল। তদন্তকাৰীয়ে ধাৰণা কৰে যে হত্যাকাণ্ডৰ পিছত তেওঁ প্ৰমাণ ধ্বংস কৰাৰ চেষ্টাতে দেশ এৰি গৈছে।
হাৱাৰ্ড কাউন্টি আৰক্ষীয়ে জনোৱা মতে, এই হত্যাকাণ্ডৰ কোনো নিৰ্দিষ্ট উদ্দেশ্য এতিয়ালৈকে জানিব পৰা হোৱা নাই। তদন্ত অব্যাহত আছে আৰু তেওঁলোকে অভিযুক্তক বিচাৰি উলিয়াবলৈ ফেডাৰেল আইন প্ৰয়োগকাৰী সংস্থাৰ সৈতে সমন্বয় ৰক্ষা কৰি কাম কৰি আছে।
ইপিনে, ভাৰতীয় দূতাবাসে এই ঘটনাৰ পৰিপ্ৰেক্ষিতত এক বিবৃতি প্ৰকাশ কৰিছে। নিকিতাৰ পৰিয়ালৰ সৈতে নিয়মীয়াকৈ যোগাযোগ কৰি সকলো ধৰণৰ দূতাবাসৰ সাহায্য আগবঢ়াই থকা বুলি জনোৱা হৈছে। তদুপৰি দূতাবাসে স্থানীয় প্ৰশাসনৰ সৈতেও এই বিষয়ত নিয়মীয়াকৈ কথা পাতিছে।
উল্লেখ্য যে ভাৰত আৰু আমেৰিকাৰ মাজত প্ৰত্যাৰ্পণ চুক্তি আছে। কিন্তু এনে গুৰুতৰ অপৰাধৰ বাবে অভিযুক্তক দেশলৈ ঘূৰাই অনাটো আইনী আৰু কূটনৈতিক দৃষ্টিকোণৰ পৰা সময়সাপেক্ষ বুলিয়েই ভাৱে বিশেষজ্ঞসকলে। আদালতৰ একাধিক পৰ্যায়ৰ মাজেৰে যোৱাৰ পিছতহে এই প্ৰক্ৰিয়া সম্পূৰ্ণ হয়।
নৱবৰ্ষৰ আনন্দ যে ইমান নিষ্ঠুৰ পৰিণতিৰে অন্ত পৰিব পাৰে সেয়া নিকিতাৰ পৰিয়াল আৰু বন্ধু-বান্ধৱীয়ে কল্পনাই কৰিব পৰা নাই। এই হত্যাকাণ্ডই প্ৰবাসী ভাৰতীয়সকলৰ মাজতো তীব্ৰ উদ্বেগ আৰু ক্ষোভৰ সৃষ্টি কৰিছে।
