ইথানল মিশ্ৰিত ই-২০ পেট্ৰ’লক লৈ ভাৰতৰ প্ৰথমখন বৃহৎ আইনী যুঁজত সকাহ পাইছে এগৰাকী গাড়ীৰ মালিকে। ই-২০ পেট্ৰ’লৰ ব্যৱহাৰৰ বাবে গাড়ীৰ ইঞ্জিনত গুৰুতৰ সমস্যাৰ সৃষ্টি হোৱাৰ পিছতে তেওঁ অভিযোগ দাখিল কৰে। সেই গোচৰৰ পৰিপ্ৰেক্ষিতত ছত্তীশগড়ৰ ৰায়পুৰ জিলা গ্ৰাহক বিবাদ নিৰাময় আয়োগে (কনজিউমাৰ ডিছপিউটছ ৰিড্ৰেছাল কমিছন) গাড়ীৰ মালিকৰ সপক্ষে ৰায় দিয়ে।
ৰাষ্ট্ৰীয় সংবাদ মাধ্যমত প্ৰকাশিত প্ৰতিবেদন অনুসৰি আয়োগে সংশ্লিষ্ট গাড়ী নিৰ্মাতা আৰু বিক্ৰেতাক গাড়ীখন মেৰামতিৰ খৰচ ঘূৰাই দিয়াৰ লগতে মানসিক যন্ত্ৰণা আৰু গোচৰৰ খৰচৰ বাবদো ক্ষতিপূৰণ দিবলৈ নিৰ্দেশ দিছে।
অভিযোগকাৰী গাড়ীৰ মালিকে কয় যে তেওঁৰ গাড়ীত ই-২০ পেট্ৰ’ল ভৰোৱাৰ পিছত তেওঁৰ গাড়ীখনত যান্ত্ৰিক সমস্যাৰ সৃষ্টি হ’বলৈ ধৰে। গাড়ীৰ পাৰফৰমেন্স হ্ৰাস পোৱা, ইঞ্জিনৰ বাৰে বাৰে মিছফায়াৰ হোৱা আৰু ক্ৰমান্বয়ে মাইলেজ হ্ৰাস পোৱাৰ দৰে সমস্যাৰ সৃষ্টি হৈছিল। তেওঁ কেইবাবাৰো গাড়ীখন কোম্পানীৰ অনুমোদিত চাৰ্ভিচ চেণ্টাৰলৈ লৈ গৈছিল। বাৰে বাৰে মেৰামতি কৰা হৈছিল। কিন্তু সমস্যাটো একেই থাকিল। শেষত ইঞ্জিন সম্পৰ্কীয় বৃহৎ খৰচৰ সন্মুখীন হ’বলগীয়া হ’ল।
এই ক্ষেত্ৰত মূল প্ৰশ্ন আছিল গাড়ীখনৰ যান্ত্ৰিক সমস্যাৰ বাবে ই-২০ পেট্ৰ’ল দায়ী নেকি? কিন্তু গাড়ী নিৰ্মাতা আৰু ডিলাৰ এই অভিযোগ মানি ল’বলৈ সন্মত নহ’ল। তেওঁলোকে দাবী কৰিছিল যে সংশ্লিষ্ট গাড়ীখন ই-২০ পেট্ৰ’লৰ সৈতে সম্পূৰ্ণৰূপে সামঞ্জস্যপূৰ্ণ। তেওঁলোকৰ মতে ইঞ্জিনৰ সমস্যা স্বাভাৱিক ক্ষয়-ক্ষতি, ৰক্ষণাবেক্ষণৰ ত্ৰুটি বা আন কোনো যান্ত্ৰিক কাৰণত হ’ব পাৰে। ইয়াৰ লগত ই-২০ পেট্ৰ’লৰ কোনো সম্পৰ্ক নাই।
কিন্তু গাড়ী নিৰ্মাতা আৰু ডিলাৰৰ এই যুক্তি আয়োগে মানি লোৱা নাই। ৰায়দানত কোৱা হৈছে যে গাড়ীৰ মালিকে গাড়ীখন বাৰে বাৰে অনুমোদিত ৱৰ্কশ্বপলৈ লৈ গৈছিল আৰু মেৰামতিৰ পিছতো একেটা সমস্যা বাৰে বাৰে পুনৰ ঘটিছিল। আয়োগৰ পৰ্যবেক্ষণ যে একাধিক মেৰামতিৰ পিছতো একেটা ত্ৰুটিৰ সৃষ্টি হোৱাটোৱে ইংগিত দিয়ে যে মূল সমস্যাটো সমাধান কৰিব পৰা নগ’ল। এই তথ্যই অভিযোগকাৰীৰ দাবীক আৰু অধিক শক্তিশালী কৰি তুলিছে।
আয়োগে ৰায়দানত আন এটা গুৰুত্বপূৰ্ণ কথা উল্লেখ কৰে। বৰ্তমান দেশৰ বেছিভাগ পেট্ৰ’ল পাম্পতে ই-২০ পেট্ৰ’ল মূল ইন্ধন হিচাপে বিক্ৰী কৰা হৈছে। ফলত সাধাৰণ গাড়ীৰ মালিকৰ বাবে অন্য প্ৰকাৰৰ পেট্ৰ’ল বাছি লোৱাৰ বাস্তৱ সুযোগ অতি সীমিত। আয়োগৰ মতে, বিকল্প ইন্ধন সহজে উপলব্ধ নহ’লে গ্ৰাহকে ই-২০ পেট্ৰ’ল ব্যৱহাৰ নকৰিব বুলি আশা কৰাটো যুক্তিসংগত নহয়।
সকলো দিশ বিবেচনা কৰি আয়োগে গাড়ীৰ মালিকৰ অভিযোগ মানি লৈছে। আয়োগে কয় যে গাড়ী নিৰ্মাতা আৰু ডিলাৰৰ সেৱাত ত্ৰুটি আছে। সেয়েহে তেওঁলোকে অভিযোগকাৰীৰ পৰা সংশ্লিষ্ট গাড়ীখন ঘূৰাই লৈ ৪৫ দিনৰ ভিতৰত এখন নতুন ই-২০-সঙ্গতিপূৰ্ণ গ্ৰেণ্ড ভিটাৰা ষ্ট্ৰং হাইব্ৰিড গাড়ী প্ৰদান কৰিব লাগে।
যদিহে নিৰ্ধাৰিত ৪৫ দিনৰ ভিতৰত নতুন গাড়ীৰ ব্যৱস্থা কৰা নহয়, তেন্তে অভিযোগকাৰীয়ে গাড়ীখন ক্ৰয় কৰাৰ খৰচ ২০,৫০,৪৯৪ টকা ঘূৰাই দিবলৈও নিৰ্দেশ দিছে আয়োগে। নিৰ্দিষ্ট সময়ৰ ভিতৰত ধন পৰিশোধ নকৰাৰ ক্ষেত্ৰত বছৰি ৭ শতাংশ হাৰত সুতও প্ৰযোজ্য হ’ব।
কেন্দ্ৰৰ ইথানল মিশ্ৰণ কাৰ্যসূচীৰ অধীনত দেশত পৰ্যায়ক্ৰমে ই-২০ পেট্ৰ’লৰ ব্যৱহাৰ বৃদ্ধি কৰা হৈছে। সেই সময়তে ভৱিষ্যতে ই-২০ ইন্ধনৰ সৈতে জড়িত অন্যান্য অভিযোগ বা আইনী বিবাদৰ ক্ষেত্ৰত এই ৰায়দান এক গুৰুত্বপূৰ্ণ দৃষ্টান্ত হৈ পৰিব পাৰে।
