কৃত্ৰিম বুদ্ধিমত্তা বা এআই প্ৰযুক্তিৰ ভৱিষ্যতক লৈ সমগ্ৰ বিশ্বতে চৰ্চা চলি থকাৰ মাজতে ভাৰতক লৈ আশাবাদী হৈ পৰিছে বিশ্বৰ আগশাৰীৰ প্ৰযুক্তি প্ৰতিষ্ঠানসমূহৰ মুৰব্বীসকল। শেহতীয়াকৈ গুগলৰ মুখ্য কাৰ্যবাহী বিষয়া সুন্দৰ পিচাইয়ে ভাৰতৰ এআই যাত্ৰাক প্ৰশংসা কৰিছে। দিল্লীত অনুষ্ঠিত হোৱা ইণ্ডিয়া এ আই ইমপেক্ট ছামিটত অংশগ্ৰহণ কৰি তেওঁ কয় যে এআই হৈছে বৰ্তমান সময়ৰ আটাইতকৈ ডাঙৰ প্ৰযুক্তিগত পৰিৱৰ্তন যিয়ে মানুহৰ জীৱনৰ মানদণ্ড উন্নত কৰাত সহায় কৰিব। চিকিৎসা বিজ্ঞানৰ পৰা আৰম্ভ কৰি শিক্ষা খণ্ডৰ প্ৰসাৰলৈকে এই প্ৰযুক্তিয়ে এক নৱজাগৰণৰ সৃষ্টি কৰিব পাৰে বুলি তেওঁ মত পোষণ কৰে। ভাৰতত এই প্ৰযুক্তিৰ ব্যৱহাৰৰ হাৰ যথেষ্ট বেছি যদিও কিছুমান গাঁথনিগত সীমাবদ্ধতা এতিয়াও আছে বুলি তেওঁ সোঁৱৰাই দিয়ে।
গুগলে ভাৰতৰ এআই খণ্ডত বৃহৎ বিনিয়োগৰ পৰিকল্পনা কৰিছে। যোৱা বছৰ বিশাখাপট্টনমত এটা এআই হাব স্থাপনৰ বাবে ১৫ বিলিয়ন ডলাৰ ব্যয়ৰ কথা ঘোষণা কৰাৰ পিছত এতিয়া পিচাইয়ে আন এক নতুন পদক্ষেপৰ কথা সদৰী কৰিছে। ইণ্ডিয়া-আমেৰিকা কানেক্ট ইনিচিয়েটিভ নামৰ এক বিশেষ প্ৰকল্পৰ জৰিয়তে ভাৰত আৰু আমেৰিকাৰ মাজত প্ৰযুক্তিগত সংযোগ অধিক মজবুত কৰা হ’ব। ইয়াৰ উপৰিও বৈজ্ঞানিক গৱেষণাৰ স্বাৰ্থত ৩ কোটি ডলাৰৰ এটা নতুন প্ৰকল্পও মুকলি কৰা হৈছে। এইসমূহে ভাৰতীয় গৱেষক আৰু শিক্ষাৰ্থীসকলক বিশ্বমানৰ সুযোগ লাভত সহায় কৰিব।
কেৱল সুন্দৰ পিচাইয়ে নহয়, অ’পেনএআইৰ প্ৰতিষ্ঠাপক ছেম অল্টমেনেও ভাৰতৰ দক্ষতাক লৈ ইতিবাচক মন্তব্য কৰিছে। তেওঁৰ মতে ভাৰতৰ ওচৰত বিশ্বক এআইৰ দিশত নেতৃত্ব দিয়াৰ পূৰ্ণ ক্ষমতা আছে। তথ্য অনুসৰি অ’পেনএআইৰ ব্যৱহাৰকাৰীৰ সংখ্যাৰ ফালৰ পৰা আমেৰিকাৰ পিছতে ভাৰতৰ স্থান। বৰ্তমান দেশত প্ৰায় ১০ কোটি সক্ৰিয় ব্যৱহাৰকাৰী আছে। বিশেষকৈ ছাত্ৰ-ছাত্ৰীসকলৰ মাজত চেটজিপিটিৰ জনপ্ৰিয়তা ভাৰতত সকলোতকৈ বেছি। আনকি বৈজ্ঞানিক গৱেষণাত সহায় কৰা প্ৰিজম নামৰ এআই সঁজুলিটো ব্যৱহাৰ কৰাৰ ক্ষেত্ৰত ভাৰত বিশ্বৰ ভিতৰতে চতুৰ্থ স্থানত আছে।
ভাৰতত নিজৰ ভেটি শক্তিশালী কৰিবলৈ অ’পেনএআইয়ে ইতিমধ্যে দিল্লীত কাৰ্যালয় স্থাপন কৰিছে। ইয়াৰ উপৰিও দেশৰ চাৰিখন গুৰুত্বপূৰ্ণ চহৰৰ বিভিন্ন সংস্থাৰ বিষয়াসকলক এআই প্ৰযুক্তিৰ ব্যৱহাৰ সম্পৰ্কে প্ৰশিক্ষণ দিয়া হৈছে। আগন্তুক দিনত ভাৰত চৰকাৰৰ সৈতে পোনপটীয়াকৈ কাম কৰাৰ সম্ভাৱনাৰ কথাও অল্টমেনে ইংগিত দিছে। এনেদৰে গোলকীয় প্ৰযুক্তি প্ৰতিষ্ঠানসমূহৰ আগ্ৰহ আৰু বিনিয়োগে অনাগত দিনত ভাৰতক এআই প্ৰযুক্তিৰ এক অন্যতম কেন্দ্ৰবিন্দু হিচাপে গঢ়ি তোলাটো প্ৰায় নিশ্চিত হৈ পৰিছে।
