হাৰিয়ানা বিধানসভা নিৰ্বাচনৰ সময়ত বিজেপিয়ে ডাঙৰ বিপৰ্যয়ৰ সন্মুখীন হৈছে। যি সময়ত দলটো নিৰ্বাচনৰ প্ৰস্তুতিত ব্যস্ত হৈ পৰিছে, সেই সময়ত দেশৰ চতুৰ্থ ধনী মহিলা সাৱিত্ৰী জিন্দালে বিজেপিৰ বিৰুদ্ধে বিদ্ৰোহ কৰিছে। লগতে সাবিত্ৰী জিন্দালে নিৰ্দলীয় হিচাপে নিৰ্বাচনত অৱতীৰ্ণ হ’ব বুলি ঘোষণা কৰিছে।
বুধবাৰে সন্ধিয়া বিজেপিয়ে হাৰিয়ানা বিধানসভা নিৰ্বাচনৰ ৬৭ গৰাকী প্ৰাৰ্থীৰ তালিকা প্ৰকাশ কৰিছিল যদিও দলৰ তালিকা প্ৰকাশ পোৱাৰ লগে লগে বিজেপিত আলোড়নৰ সৃষ্টি হয়। টিকট নোপোৱাৰ পিছত বহু নেতাই ক্ষুব্ধ হৈ পৰে।
আনকি বহু ক্ষুব্ধ নেতাই ছ’চিয়েল মিডিয়াত দলক পদত্যাগ পত্ৰও দাখিল কৰে। একে সময়তে বৃহস্পতিবাৰে দেশৰ চতুৰ্থ ধনী মহিলা তথা প্ৰাক্তন মন্ত্ৰী সাৱিত্ৰী জিন্দালেও বিজেপিৰ বিৰুদ্ধে বিদ্ৰোহ কৰিছে। বিজেপিৰ পৰা টিকট নোপোৱাৰ পিছত তেওঁ হিছাৰৰ পৰা নিৰ্দলীয় প্ৰাৰ্থী হিচাপে নিৰ্বাচনত অৱতীৰ্ণ হোৱাৰ কথা ঘোষণা কৰিছে।
লগতে পঢ়কঃ সীতাৰাম য়েচুৰীৰ স্বাস্থ্যৰ অৱস্থাৰ অধিক অৱনতি, ভৰ্তি কৰা হ’ল ভেন্টিলেচনত
সাবিত্ৰী জিন্দালে সমৰ্থকসকলক কয় – মই বিজেপিৰ প্ৰাথমিক সদস্য নহয়, মই দিল্লীৰ পৰা উভতি আহিছিলোঁ নিৰ্বাচনত প্ৰতিদ্বন্দ্বিতা নকৰাৰ কথা ক’বলৈ, কিন্তু আপোনালোকৰ মৰম আৰু বিশ্বাস দেখি, এতিয়া মই সিদ্ধান্ত লৈছো যে মই নিৰ্বাচনত নামিম।
কুৰুক্ষেত্ৰৰ বিখ্যাত উদ্যোগপতি তথা বিজেপি সাংসদ নবীন জিন্দালৰ মাতৃ সাৱিত্ৰী জিন্দাল আৰু লোকসভা নিৰ্বাচনৰ সময়ত সাৱিত্ৰী জিন্দালক পুত্ৰৰ হৈ অহৰহ প্ৰচাৰ চলোৱা দেখা গৈছিল। অৱশ্যে এতিয়া হিছাৰ আসনত তেওঁ মুখামুখি হ’ব বিজেপিৰ মন্ত্ৰী ড০ কমল গুপ্তাৰ, যি বৰ্তমান হাৰিয়ানা চৰকাৰৰ স্বাস্থ্য মন্ত্ৰী হিচাপে কাৰ্যনিৰ্বাহ কৰি আছে। দুয়োজনে প্ৰতিদ্বন্দ্বিতাত মুখামুখি হ’ব।
উল্লেখ্য যে ১৯৫০ চনৰ ২০ মাৰ্চত জন্মগ্ৰহণ কৰা সাৱিত্ৰী জিন্দাল ডাঙৰ-দীঘল হৈছিল অসমৰ তিনিচুকীয়া চহৰত। তীখা আৰু শক্তিৰ সংঘবদ্ধ সংস্থা জিন্দাল গ্ৰুপ প্ৰতিষ্ঠা কৰা ওম প্ৰকাশ জিন্দালৰ সৈতে ১৯৭০ চনত বিবাহপাশত আবদ্ধ হয়।
লগতে পঢ়কঃ বেদান্তাৰ খননৰ ফলত অসমৰ অন্তিমটো গিবনৰ আশ্ৰয়স্থলীলৈ ভাবুকি; সতৰ্ক কৰিছে বিশেষজ্ঞই
অ’ পি জিন্দাল হাৰিয়ানা চৰকাৰৰ মন্ত্ৰী আৰু হিছাৰ সমষ্টিৰ পৰা হাৰিয়ানা বিধান সভাৰ সদস্য আছিল। তেওঁলোক পুত্ৰ নবীন জিন্দালো সাংসদ আছিল।
৯টা সন্তানৰ মাতৃ সাৱিত্ৰীয়ে ২০০৫ চনত হেলিকপ্টাৰ দুৰ্ঘটনাত পতিত হৈ স্বামীৰ মৃত্যুৰ পিছত সংস্থাৰ অধ্যক্ষৰ দায়িত্ব লয়। তেতিয়া তেওঁৰ বয়স আছিল ৫৫ বছৰ। যিসময়ত বেছিভাগ মহিলাৰ ঘৰৰ চাৰিবেৰৰ মাজতে জীৱনৰ শেষ বেলাৰ অপেক্ষা কৰে, সেই সময়তে তেওঁ এখন সম্পূৰ্ণ নতুন পৃথিৱী আৱিষ্কাৰ কৰে য’ত তেওঁ নিজকে ৰাজনীতিবিদ, সমাজ কৰ্মী আৰু কোটিপতি হিচাপে নিজকে বিচাৰি পালে।
সাৱিত্ৰী জিন্দালে কেতিয়াও কলেজলৈ যোৱা নাছিল আৰু ২০০৫ চনত স্বামীৰ মৃত্যুৰ পিছত তেওঁৰ ব্যৱসায়িক সাম্ৰাজ্যৰ দায়িত্ব হাতত লৈছিল। সেই সময়তে তেওঁ হিছাৰ আসনৰ পৰা জয়ী হৈ বিধানসভাত স্থান লাভ কৰে, তাৰ পিছত ২০০৯ চনত পুনৰবাৰ ভাগ্য পৰীক্ষা কৰি একেৰাহে দ্বিতীয়বাৰৰ বাবে জয়লাভ কৰে। ২০১৩ চনত তেওঁক হাৰিয়ানা চৰকাৰত কেবিনেট মন্ত্ৰীৰ দায়িত্ব দিয়া হৈছিল।
লগতে পঢ়কঃদহ হাজাৰ সন্তানৰ পিতৃ হেনৰী! বিশালাকায় শৰীৰ, বিশ্বৰ আটাইতকৈ পুৰণি কুম্ভীৰ
অহা ৫ অক্টোবৰত হাৰিয়ানাৰ ৯০খন আসনত ভোটগ্ৰহণ আৰু ৮ অক্টোবৰত ভোটগণনা কৰা হ’ব।
