আই আৰ চি টি চিৰ পাকঘৰত এতিয়া হাহাকাৰ পৰিস্থিতিৰ সৃষ্টি হৈছে। এল পি জি চিলিণ্ডাৰৰ তীব্ৰ নাটনিৰ বাবে ভাৰতীয় ৰেলৱে কেটাৰিং এণ্ড টুৰিজিম নিগমে এক ডাঙৰ সিদ্ধান্ত গ্ৰহণ কৰিবলগীয়া হৈছে। জানিব পৰা মতে, এই নাটনিৰ বাবে দীৰ্ঘ দূৰত্বৰ ৰেলসমূহত এতিয়াৰে পৰা গৰম তথা ৰন্ধা খাদ্য উপলব্ধ হোৱাৰ সম্ভাৱনা অতি কম। যিসকল যাত্ৰীয়ে আগতীয়াকৈ টিকটৰ সৈতে খাদ্যৰ বাবে ধন দি থৈছিল, তেওঁলোকক সেই ধন ঘূৰাই দিয়াৰ কথাও বৰ্তমান চিন্তা-চৰ্চা কৰা হৈছে। অৱশ্যে যাত্ৰীসকল একেবাৰে লঘোণে থাকিব নালাগে, কাৰণ বিকল্প হিচাপে শুকান খাদ্য যোগান ধৰাৰ ব্যৱস্থা কৰা হ’ব পাৰে।
সাধাৰণতে দীঘলীয়া যাত্ৰাৰ সময়ত যাত্ৰীসকলে ৰেলৰ খাদ্যৰ ওপৰতে নিৰ্ভৰ কৰে। আই আৰ চি টি চিয়ে যাত্ৰীৰ আসনলৈকে খাদ্য যোগান ধৰে যদিও বৰ্তমান যুদ্ধ সদৃশ পৰিৱেশৰ বাবে সকলোতে গেছৰ নাটনিয়ে দেখা দিছে। গেছ বুকিং কৰাৰ পিছতো সময়মতে যোগান নোপোৱাৰ বাবে আই আৰ চি টি চিৰ পাকঘৰসমূহৰ কাম-কাজ চলোৱাত বাধাৰ সৃষ্টি হৈছে। পেণ্ট্ৰি কাৰত খাদ্য গৰম কৰি পৰিবেশন কৰা হয় যদিও আচল ৰন্ধা-বঢ়াৰ কাম আই আৰ চি টি চিৰ মূল পাকঘৰতহে কৰা হয়। এল পি জিৰ যোগান সঠিকভাৱে নোহোৱাৰ ফলত এই পাকঘৰবোৰত খাদ্য প্ৰস্তুত কৰিব পৰা হোৱা নাই। যাত্ৰীৰ সুবিধাৰ বাবে ৰেলৱে কৰ্তৃপক্ষই জনাইছে যে ৰেল ষ্টেচনত থকা ফুড প্লাজা আৰু বিপণীসমূহত বিকল্প পদ্ধতিৰে ৰন্ধা-বঢ়া কৰাৰ চেষ্টা কৰা হ’ব। লগতে পেকেটত থকা ৰেডি টু ইট খাদ্যৰ মজুত বৃদ্ধি কৰা হ’ব।
এই সমস্যাৰ মূলতে আছে আন্তঃৰাষ্ট্ৰীয় পৰ্যায়ত চলি থকা যুদ্ধৰ পৰিৱেশ। কেন্দ্ৰীয় চৰকাৰে ইতিমধ্যে জনাইছে যে মধ্যপ্ৰাচ্যৰ যুদ্ধৰ বাবে গেছৰ যোগানত প্ৰভাৱ পৰিছে। আগতে ২১ দিনৰ অন্তৰে অন্তৰে গেছ বুকিং কৰিব পৰা গৈছিল যদিও এতিয়া সেই নিয়ম সলনি কৰি ২৫ দিন কৰা হৈছে। গেছৰ ব্লেক মাৰ্কেটিং ৰোধ কৰিবলৈ আৰু জনসাধাৰণক সঠিকভাৱে বিতৰণ কৰিবলৈ চৰকাৰে এই কঠোৰ পদক্ষেপ গ্ৰহণ কৰিছে। ঘৰুৱা বজাৰত যোগান স্বাভাৱিক কৰিবলৈ তেল কোম্পানীসমূহক উৎপাদন বৃদ্ধি কৰিবলৈ নিৰ্দেশ দিয়া হৈছে যদিও ৰেলৰ যাত্ৰীসকলৰ বাবে বৰ্তমানৰ এই সময়ছোৱা যথেষ্ট প্ৰত্যাহ্বানমূলক হ’ব বুলি ধাৰণা কৰা হৈছে।
