নতুন দিল্লীৰ ভাৰত মণ্ডপমত অতি ধুমধামেৰে আৰম্ভ হোৱা কৃত্ৰিম বুদ্ধিমত্তা সন্মিলনত যোৱা দুটা দিনত কেবাটাও অপ্ৰীতিকৰ পৰিস্থিতিৰ সৃষ্টি হৈছে। দেশত ডিজিটেল বিপ্লৱ আৰু কৃত্ৰিম বুদ্ধিমত্তাৰ বিকাশৰ লক্ষ্যৰে আয়োজন কৰা এই সন্মিলনৰ প্ৰথম দুটা দিনত ইণ্টাৰনেটৰ সংযোগহীনতা আৰু ভুল তথ্যৰ বাবে চৰকাৰ তথা একাংশ শিক্ষানুষ্ঠান যথেষ্ট লজ্জিত হ’বলগীয়া হৈছে। প্ৰথম দিনাই ডিজিটেল ইণ্ডিয়াৰ শ্লোগান দিয়াৰ মাজতে অনুষ্ঠানস্থলীত ৱাইফাই আৰু ইণ্টাৰনেট সেৱা বিকল হৈ পৰে। আনকি দৰ্শনাৰ্থীসকলে ডিজিটেল পেমেণ্ট কৰিবলৈ গৈও বিফল হয়। এই বিশৃংখলতাৰ বাবে কেন্দ্ৰীয় তথ্য প্ৰযুক্তি মন্ত্ৰী অশ্বিনী বৈষ্ণৱে মঙলবাৰে সকলোৰে ওচৰত ক্ষমা বিচাৰিবলৈ বাধ্য হয়।
সন্মিলনৰ আটাইতকৈ ডাঙৰ বিতৰ্কটোৰ সৃষ্টি হয় বুধবাৰে, যেতিয়া নয়ডাৰ গালগোটিয়া বিশ্ববিদ্যালয়ে চীনত নিৰ্মিত এটা ৰবট কুকুৰক নিজৰ উদ্ভাৱন বুলি দাবী কৰে। বিশ্ববিদ্যালয়খনৰ এগৰাকী অধ্যাপকে সংবাদ মাধ্যমৰ আগত কৈছিল যে তেওঁলোকে ৩৫০ কোটি টকা খৰচ কৰি গৱেষণাৰ জৰিয়তে এই চোৰাংচোৱাগিৰি কৰিব পৰা ৰবটটো সাজি উলিয়াইছে। কিন্তু আচলতে সেইটো আছিল চীনৰ এটা ব্যৱসায়িক ৰবট কুকুৰ, যাৰ বজাৰ মূল্য মাত্ৰ ২ লাখ ৩০ হাজাৰ টকাৰ ওচৰা-উচৰি। এই মিছা দাবী ধৰা পৰাৰ লগে লগে চৰ্চা আৰম্ভ হয় আৰু বিশ্ববিদ্যালয়খনৰ প্ৰতিনিধিক সন্মিলনৰ পৰা বাহিৰ কৰি দিয়া হয়। পাছত বিশ্ববিদ্যালয় কৰ্তৃপক্ষই ক্ষমা বিচাৰি কয় যে তেওঁলোকৰ প্ৰচাৰ বিভাগৰ এগৰাকী সদস্যই অতি উৎসাহত ভুল তথ্য দিছে।
এই ঘটনাক কেন্দ্ৰ কৰি ৰাজনৈতিক মহলতো ব্যাপক প্ৰতিক্ৰিয়াৰ সৃষ্টি হৈছে। বিৰোধী দলৰ নেতা ৰাহুল গান্ধীয়ে এই সমগ্ৰ অনুষ্ঠানটোক চৰকাৰৰ কেৱল এক প্ৰচাৰ অভিযান বুলি কটাক্ষ কৰিছে। তেওঁ অভিযোগ কৰে যে আন্তঃৰাষ্ট্ৰীয় পৰ্যায়ত ভাৰতৰ প্ৰতিভা দেখুওৱাৰ সলনি চীনৰ সামগ্ৰীক ভাৰতীয় বুলি চলাই দিবলৈ চেষ্টা কৰা হৈছে। পৰিস্থিতি উত্তপ্ত হোৱা দেখি কেন্দ্ৰীয় ইলেক্ট্ৰনিকছ আৰু তথ্য প্ৰযুক্তি মন্ত্ৰালয়েও কঠোৰ স্থিতি গ্ৰহণ কৰিছে। মন্ত্ৰালয়ৰ তৰফৰ পৰা জনোৱা হৈছে যে এনে মিছা তথ্য দিয়াটো কোনো কাৰণতে সহ্য কৰা নহ’ব। এই সকলো বিতৰ্কৰ মাজতে আজি প্ৰধানমন্ত্ৰী নৰেন্দ্ৰ মোদীয়ে সন্মিলনত ভাষণ দিব। আয়োজকসকলে এতিয়া আশা কৰিছে যে আজিৰ দিনটোত যাতে কোনো নতুন বিভ্ৰাট নোহোৱাকৈ অনুষ্ঠানটো সুকলমে পাৰ হৈ যায়।
