উত্তৰ প্ৰদেশৰ চম্ভল এলেকাত দেওবাৰে সংঘটিত হোৱা ৰক্তাক্ত সংঘৰ্ষত ৪ জন লোকৰ মৃত্যু হয়। জামা মছজিদৰ জৰীপৰ কামৰ সময়ত সংঘটিত হয় এই ঘটনা। বহুকেইজন আৰক্ষী জোৱানো আহত হয়। ঘটনাৰ পিছতে স্তব্ধ হৈ পৰে অঞ্চলটো। বন্ধ কৰা হৈছে ইণ্টাৰনেট সেৱা। স্কুলবোৰো বন্ধ ৰখা হৈছে।
শ্বাহী জামা মছজিদৰ স্থানত পূৰ্বতে এটা মন্দিৰ আছিল বুলি দাবী কৰা হৈছে। ১৯ নৱেম্বৰত কেলা দেৱী মন্দিৰ কমিটীয়ে চন্দাউছি আদালতত এটা গোচৰ ৰুজু কৰিছিল। অভিযোগকাৰীসকলে দাবী কৰিছে যে চম্ভলৰ শ্বাহী জামা মছজিদটো আচলতে শ্ৰী হৰিনাথ মন্দিৰ। যিটো ১৫২৯ চনত সম্ৰাট বাবৰৰ দিনত মছজিদলৈ ৰূপান্তৰিত কৰা হৈছিল। এই গোচৰৰ ভিত্তিতে ন্যায়াধীশে মছজিদটোৰ ভিডিঅ’গ্ৰাফী জৰীপৰ নিৰ্দেশ দিয়ে।
মঙলবাৰে এটা দলে জৰীপ চলাই থকাৰ সময়তে বাধাৰ সন্মুখীন হৈছিল। দেওবাৰে পুনৰ আৰম্ভ হ’ল জৰীপ। পুৱা প্ৰায় ৭:৩০ বজাত অঞ্চলটোত উপস্থিত হয় জৰীপৰ দায়িত্বত থকা দলটো। জিলা দণ্ডাধীশ ৰাজেন্দ্ৰ পানচিয়া, আৰক্ষী অধীক্ষক কৃষ্ণ বিষ্ণয়, মহকুমা দণ্ডাধীশ বন্দনা মিশ্ৰ, চক্ৰ বিষয়া অনুজ চৌধুৰী আৰু তহচিলদাৰ ৰবি সোণকাৰ আদি উপস্থিত আছিল।
জৰীপৰ সময়ত যাতে কোনো ধৰণৰ অশান্তি নহয় তাৰ বাবে আগতীয়াকৈ অঞ্চলটোত আৰক্ষী আৰু ৰেপিড একচন ফৰ্চৰ সদস্যৰ বৃহৎ দল মোতায়েন কৰা হৈছিল। তথাপিও জৰীপ আৰম্ভ হোৱাৰ লগে লগে অঞ্চলটো অশান্ত হৈ পৰিল। ভিৰৰ এটা অংশই আৰক্ষীক ইটা-শিল নিক্ষেপ কৰিবলৈ আৰম্ভ কৰে। অভিযোগ অনুসৰি আক্ৰমণকাৰীৰ একাংশই গুলীচালনাও কৰে। আৰক্ষীৰ গাড়ীতো অগ্নিসংযোগ কৰা হয়।
পৰিস্থিতি নিয়ন্ত্ৰণ কৰিবলৈ আৰক্ষীয়ে লাঠী চাৰ্জৰ আশ্ৰয় লয়। আৰক্ষী-জনতাৰ সংঘৰ্ষত ৪ জন লোকৰ মৃত্যু হয়। আহত হৈছে কমেও ৩০ জন আৰক্ষী জোৱান। পৰিস্থিতি চম্ভালিবলৈ অঞ্চলটোত অতিৰিক্ত আৰক্ষী বাহিনী আহে। ২১ জন লোকক গ্ৰেপ্তাৰ কৰা হয়। সেই স্থানত উপস্থিত হয় মোৰাদাবাদৰ ডি আই জি।
তাৰ পিছত পুনৰ আৰম্ভ হয় জৰীপ। পুনৰ আৰক্ষীক শিলগুটি নিক্ষেপ কৰিবলৈ ধৰে। পুনৰ লাঠিচাৰ্জ আৰম্ভ কৰিলে আৰক্ষীয়ে। পৰিস্থিতি নিয়ন্ত্ৰণলৈ আহে। সূত্ৰ অনুসৰি আহতসকলৰ একাংশক চিকিৎসালয়ত ভৰ্তি কৰোৱা হৈছে।
