অবৈধ বাংলাদেশী অনুপ্ৰৱেশকাৰীৰ পৰা পৰিত্ৰাণ পাবলৈ ত্ৰিপুৰাতো হ’ব লাগে এন আৰ চি। কিয়নো বাংলাদেশীৰ আগ্ৰাসনত সৰ্বাধিক জুৰুলা হৈছে ত্ৰিপুৰাৰ খিলঞ্জীয়াসকল। সেয়ে তেওঁলোকৰ ভৱিষ্যত সুৰক্ষাৰ স্বাৰ্থত অসমৰ দৰে ত্ৰিপুৰাতো হওক এন আৰ চি। এই মন্তব্য অগপ সভাপতি তথা অসমৰ কেবিনেট মন্ত্ৰী অতুল বৰাৰ।
সুকীয়া তিপৰালেণ্ড ৰাজ্য গঠনৰ দাবীত ত্ৰিপুৰাৰ খুমলুং চহৰত বৃহস্পতিবাৰে ইণ্ডিজিনিয়াছ পিপলছ ফ্ৰণ্ট অব ত্ৰিপুৰা চমুকৈ আই পি এফ টিৰ আহ্বান ক্ৰমে অনুষ্ঠিত হোৱা বিশাল গণসমাৱেশৰ ভাষণ প্ৰসংগত ত্ৰিপুৰাৰ ভূমিপুত্ৰসকলৰ অস্তিত্ব ৰক্ষাৰ স্বাৰ্থত এন আৰ চিৰ দাবী উত্থাপন কৰে মন্ত্ৰী অতুল বৰাই।
উল্লেখযোগ্য যে ত্ৰিপুৰাৰ বিজেপি মিত্ৰজোঁট চৰকাৰৰ অংশীদাৰী আঞ্চলিক ৰাজনৈতিক দল আই পি এফ টিৰ আমন্ত্ৰণ মৰ্মেই সমাৱেশত অংশগ্ৰহণ কৰা অগপৰ সভাপতিগৰাকীয়ে তাৎপৰ্যমূলক মন্তব্য কৰি কয় যে ত্ৰিপুৰাত খিলঞ্জীয়াসকলৰ অস্তিত্ব সুৰক্ষা হ’লেহে অসমৰ খিলঞ্জীয়াসকল নিৰাপদে থাকিব পাৰিব।
অগপৰ সভাপতিগৰাকীয়ে দিনে দিনে ত্ৰিপুৰাত খিলঞ্জীয়া লোকৰ সংখ্যা হ্ৰাস পাই অহা ঘটনা সন্দৰ্ভতো যথেষ্ট উদ্বেগ প্ৰকাশ কৰি বাংলাদেশীৰ আগ্ৰাসন ৰোধ কৰাৰ বাবে কেন্দ্ৰীয় চৰকাৰে বাস্তৱসন্মত পদক্ষেপ গ্ৰহণ কৰিব লাগে বুলিও মত প্ৰকাশ কৰে।
আই পি এফ টিৰ সভাপতি এন চি দেৱবাৰ্মাৰ সভাপতিত্বত কালি অনুষ্ঠিত হোৱা এই বিশাল জনসভাত অগপৰ সভাপতি অতুল বৰাৰ উপৰি উপ-সভাপতি তথা কমলপুৰ বিধানসভা সমষ্টিৰ বিধায়ক সত্যব্ৰত কলিতাও উপস্থিত থাকে।
স্মৰ্তব্য যে বাংলাদেশৰ গাতে লাগি আছে ত্ৰিপুৰা। সেয়ে বাংলাদেশীৰ আগ্ৰাসনৰ দিশেৰে ৰাজ্যখন অধিক ক্ষতিগ্ৰস্ত হৈ পৰিছে। নিজ মাতৃভূমিতে সংখ্যালঘুত পৰিণত হৈছে ত্ৰিপুৰাৰ খিলঞ্জীয়াসকল। সেয়ে বিগত কেইবা দশক ধৰি ভূমিপুত্ৰসকলে নিজৰ অধিকাৰ তথা ভৱিষ্যত সুৰক্ষাৰ দাবীত চলাই গৈছে সংগ্ৰাম।