ভাৰতীয় গণনাট্য সংঘৰ ৰাজ্যিক অভিৱৰ্তনখন যোৱা ৩০ নৱেম্বৰত গুৱাহাটীৰ নিউ আৰ্ট প্লেয়াৰ্ছ প্ৰেক্ষাগৃহত দিনজোৰা কাৰ্যসূচীৰে সফলতাৰে সম্পন্ন হৈ যায়। সমগ্ৰ অসমৰ বিভিন্ন প্ৰান্তৰ পৰা অহা শতাধিক প্ৰতিনিধিয়ে এই গুৰুত্বপূৰ্ণ অভিৱৰ্তনত অংশগ্ৰহণ কৰে।
অভিৱৰ্তনখন সুচাৰুৰূপে পৰিচালনা কৰিবলৈ ঘন ডেকা, দেৱাশীষ চক্ৰৱৰ্তী, অপৰাজিতা চৌধুৰী আৰু নৃপেন নাথক লৈ এখন সমিতি গঠন কৰা হৈছিল। লগতে নৰেন পাটগিৰি, সোণেশ্বৰ নৰহ আৰু সুশোভন তালুকদাৰে পৰিচালনাৰ দায়িত্ব বহন কৰে।
সংঘ সংগীত “তোৰে মোৰে আলোকৰে যাত্ৰা”ৰে অভিৱৰ্তনৰ শুভাৰম্ভ কৰা হয়। আদৰণি ভাষণৰ পিছত কণ্ঠশিল্পী ঘন ডেকাই সম্পাদকীয় প্ৰতিবেদন পাঠ কৰে। ইয়াৰ পাছতে নাট্যকাৰ তথা পৰিচালক নৰেন পাটগিৰিয়ে “গণনাট্য সংঘৰ ঐতিহ্য আৰু সংস্কৃতিৰ চৰ্চাৰ সামূহিক বাট” শীৰ্ষক বিষয়ৰ ওপৰত বিস্তৃত বক্তব্য আগবঢ়ায়। সাংস্কৃতিক কৰ্মী সোণেশ্বৰ নৰহে গণনাট্য সংঘৰ ভৱিষ্যত কৰ্মপন্থাৰ দৃষ্টিভংগী সন্দৰ্ভত ব্যাখ্যা দাঙি ধৰে।
এই অভিৱৰ্তনত লিডুৰ বিশিষ্ট কণ্ঠশিল্পী লোহিত গগৈ, যোগেশ বিকাশ গগৈ, কাৰ্বি আংলং আৰু গোলাঘাটৰ লোক শিল্পী ক্ৰমে জয়মতী নাৰ্জাৰী আৰু ৰুমী শইকীয়া, তেজপুৰৰ যশস্বী কবি দিলীপ ফুকন, লখিমপুৰৰ লেখক অৰবিন্দ ৰাজখোৱা আৰু গোলাঘাটৰ প্ৰখ্যাত ঢুলীয়া ওজা ধনেশ্বৰ শইকীয়াই বক্তব্য প্ৰদান কৰে।
উপস্থিত গোৱালপাৰা, বৰপেটা, পাঠশালা, ৰঙিয়া, গোৰেশ্বৰ, মঙলদৈ, যোৰহাট, গুৱাহাটী, শিলচৰ আদি বিভিন্ন অঞ্চলৰ প্ৰতিনিধিসকলে গণনাট্যৰ ভৱিষ্যত কাৰ্যপন্থা সম্পৰ্কে নিজৰ মূল্যবান দিহা-পৰামৰ্শ আগবঢ়ায়।
অভিৱৰ্তনত ঘন ডেকাক সভাপতি আৰু নৰেন পাটগিৰিক সম্পাদক হিচাপে লৈ ২৫ জনীয়া এখন নতুন ৰাজ্যিক তদৰ্থ সমিতি গঠন কৰা হয়।
লগতে, ড॰ ভূপেন হাজৰিকা, কেশৱ মহন্ত, নৱকান্ত বৰুৱা আৰু ৰুদ্ৰ বৰুৱাৰ জন্ম শতবৰ্ষ উদযাপনৰ প্ৰস্তাৱ গ্ৰহণ কৰা হয়। অহা বছৰ ৮ ছেপ্টেম্বৰত (ড॰ ভূপেন হাজৰিকাৰ জন্মদিন) ৰাজ্যিক সন্মিলনৰ শুভাৰম্ভণি হ’ব, য’ত এই শতবৰ্ষ উদযাপনৰ সামৰণি অনুষ্ঠান অনুষ্ঠিত কৰা হ’ব। বিয়লি ৪ বজাত অভিৱৰ্তনখনৰ সফল সামৰণি পৰে।
