দেশত প্ৰচলিত মহিলাৰ সাজ-পোছাকৰ কঠোৰ নীতি উলংঘনৰ অভিযোগত ‘মৰেলিটি পুলিচ’ বাহিনীৰ অত্যাচাৰৰ পৰিণতিত মাহছা আমিনী নামৰ যুৱতীগৰাকীৰ মৃত্যুৰ পাছতে প্ৰতিবাদমুখৰ হৈ পৰা ইৰানত প্ৰথমটো নৈতিক বিজয় লাভ কৰিছে প্ৰতিবাদী জনতাই।
যোৱা দুমাহ ধৰি প্ৰতিবাদত উত্তাল হৈ থকা দেশখনত অৱশেষত প্ৰতিবাদৰ সমুখত হাৰ মানি ‘মৰেলিটি পুলিচ’ বাহিনী ভংগ কৰা বুলি আজি ঘোষণা কৰিছে ইৰান প্ৰশাসনে। দেশখনৰ স্থানীয় সংবাদ মাধ্যমে আজি এই খবৰ প্ৰকাশ কৰিছে।
উল্লেখ্য যে, তেহৰাণত মৰেলিটি পুলিচে গ্ৰেপ্তাৰ কৰাৰ তিনিদিন পিছত যোৱা ১৬ ছেপ্টেম্বৰত ২২ বছৰীয়া ইৰানী যুৱতী মাহছা আমিনীৰ মৃত্যু হৈছিল। তাৰ পিছৰে পৰাই প্ৰতিবাদত নামি পৰিছিল দেশখনৰ যুৱতী-মহিলাসকল।
ক্ৰমাৎ এই প্ৰতিবাদে দেশখনৰ যুৱপ্ৰজন্মৰ পুৰুষসকলৰো সমৰ্থন লাভ কৰাৰ লগতে প্ৰতিবাদে দেশৰ সীমা অতিক্ৰম কৰি আন্ত:ৰাষ্ট্ৰীয় পৰ্যায়তো সমৰ্থন লাভ কৰে। ইফালে এই প্ৰতিবাদ দমনৰ নামৰ কঠোৰ হৈ পৰিছিল ইৰান প্ৰশাসন।
দেশখনৰ আগশাৰীৰ সংবাদ সংস্থা ‘ইছনা’- ত প্ৰৱেশ এটৰ্নী জেনেৰেল মহম্মদ জাফৰ মন্টাজেৰীৰ উদ্ধৃতি অনুসৰি মৰেলিটি পুলিচৰ সৈতে দেশৰ ন্যায়পালিকাৰ কোনো সম্পৰ্ক নাই আৰু সেয়ে এই বিভাগটো ভংগ কৰা হৈছে।
এক ধৰ্মীয় সন্মিলনত তেওঁ এই মন্তব্য আগবঢ়ায়। আনুষ্ঠানিকভাৱে ‘গষ্ট-ই-এৰছাদ’ তথা “গাইডেন্স পেট্ৰ’ল” নামেৰে পৰিচিত এই মৰেলিটি পুলিচ বাহিনী ইৰানৰ কঠোৰপন্থী ৰাষ্ট্ৰপতি মাহমুদ আহমদিনেজাদৰ কাৰ্যকালত গঠন কৰা হৈছিল। ২০০৬ চনত ইয়াৰ ইউনিটসমূহে টহল আৰম্ভ কৰিছিল।
মহিলাক মূৰ ঢাকিবলৈ বাধ্য কৰোৱা মৰেলিটি পুলিচ বাহিনীক ভংগ কৰিবলৈ ইৰান প্ৰশাসন বাধ্য হোৱাৰ পিছত এয়া প্ৰতিবাদকাৰী জনতাৰ প্ৰাথমিক বিজয়ৰ লগতে দেশখনৰ মহিলাসকলৰ স্বতন্ত্ৰতাৰ ক্ষেত্ৰত এক ঐতিহাসিক খোজ হিচাপে বিবেচিত হৈছে।