আমেৰিকা যুক্তৰাষ্ট্ৰৰ ৰাষ্ট্ৰপতি ডনাল্ড ট্ৰাম্পে ইৰাণৰ ওপৰত চলাবলগীয়া সামৰিক আক্ৰমণৰ পৰিকল্পনা সাময়িকভাৱে বাতিল কৰাৰ কেইঘণ্টামানৰ পাছতেই তেহৰাণে ৱাশ্বিংটনক উদ্দেশ্যি তীব্ৰ সকীয়নি প্ৰদান কৰিছে। মঙলবাৰে ইৰাণে স্পষ্ট কৰি দিয়ে যে যিকোনো ধৰণৰ নতুন সামৰিক আগ্ৰাসনে আমেৰিকাৰ বাবে ভয়াৱহ পৰিণতি আৰু অপমান কঢ়িয়াই আনিব, লগতে কৌশলগতভাৱে গুৰুত্বপূৰ্ণ হৰমুজ প্ৰণালী কেতিয়াও ইয়াৰ পূৰ্বৰ অৱস্থালৈ ঘূৰি নাযায়। কাটাৰ, চৌদি আৰৱ আৰু সংযুক্ত আৰৱ আমিৰশ্বাহীৰ নেতৃত্বৰ অনুৰোধমৰ্মে ট্ৰাম্পে ইৰাণৰ ওপৰত হ’বলগীয়া সামৰিক অভিযান স্থগিত ৰখাৰ কথা ঘোষণা কৰাৰ পাছতেই উপসাগৰীয় অঞ্চলটোত এই নতুন উত্তেজনাৰ সৃষ্টি হৈছে।
ইৰাণৰ সংসদীয় ৰাষ্ট্ৰীয় নিৰাপত্তা আৰু বৈদেশিক নীতি সমিতিৰ মুখপাত্ৰ ইব্ৰাহিম ৰেজায়ে এক বিবৃতিযোগে দৃঢ়তাৰে প্ৰকাশ কৰে যে ইৰাণৰ সন্মতি অবিহনে কোনো শক্তিয়েই হৰমুজ জলদ্বীপ পুনৰ মুকলি কৰিব নোৱাৰিব। ৰাষ্ট্ৰীয় সম্প্ৰচাৰক আই আৰ আই বিৰ (IRIB) জৰিয়তে ৰেজায়ে লগতে কয় যে তেওঁলোক যিকোনো পৰিস্থিতিৰ বাবে সম্পূৰ্ণৰূপে সাজু হৈ আছে আৰু আক্ৰমণৰ প্ৰত্যুত্তৰ অধিক শক্তিশালী হ’ব। ইয়াৰ বিপৰীতে ৰাষ্ট্ৰপতি ডনাল্ড ট্ৰাম্পে নিজৰ সামৰিক বাহিনীক সতৰ্ক কৰি দিছে যে যদিহে মধ্যস্থতাকাৰীৰ সৈতে চলি থকা আলোচনা বিফল হয়, তেন্তে যিকোনো মুহূৰ্ততে ইৰাণৰ ওপৰত এক বৃহৎ পৰিসৰৰ আক্ৰমণ চলাবলৈ তেওঁলোক সাজু থাকিব লাগিব। আনহাতে, ইৰাণৰ ৰাষ্ট্ৰপতি মাছুদ পেজেশকিয়ানেও নিজৰ স্থিতি স্পষ্ট কৰি ঘোষণা কৰিছে যে তেওঁলোকে শত্ৰুৰ আগত কেতিয়াও মূৰ দোৱাই নিদিয়ে আৰু আলোচনাৰ অৰ্থ কোনো কাৰণতেই আত্মসমৰ্পণ বা পিছুৱাই যোৱা নহয়।
বিগত প্ৰায় তিনি মাহ ধৰি অব্যাহত থকা এই সংঘাতে এতিয়া ভয়ংকৰ ৰূপ ধাৰণ কৰিছে। ইৰাণে হৰমুজ জলদ্বীপ প্ৰায় সকলো জাহাজ পৰিবহণৰ বাবে বন্ধ কৰি দিছে, যাৰ ফলত বিশ্বৰ ২০ শতাংশ তেল আৰু গেছৰ যোগান ব্যাহত হৈ পৰিছে। এই অৱৰোধৰ পৰিপ্ৰেক্ষিতত বিশ্বৰ বজাৰত খাৰুৱা তেলৰ মূল্য প্ৰতি বেৰেলত ১০৭ ডলাৰৰ ঘৰ অতিক্ৰম কৰিছে। মুখপাত্ৰ ৰেজায়ে পূৰ্বেই সতৰ্ক কৰি দিছিল যে ইৰাণৰ সংযমৰ অন্ত পৰিছে আৰু তেওঁলোকৰ জাহাজৰ ওপৰত যিকোনো আক্ৰমণে আমেৰিকাৰ ঘাটি আৰু জাহাজসমূহৰ বিৰুদ্ধে নিৰ্ণায়ক সিদ্ধান্ত গ্ৰহণ কৰিব। পৰিস্থিতি শান্ত কৰাৰ স্বাৰ্থত ইৰাণে আমেৰিকাৰ সন্মুখত কেইবাটাও কঠোৰ চৰ্ত ৰাখিছে, যাৰ ভিতৰত ইৰাণৰ জাহাজ চলাচলৰ ওপৰত থকা অৱৰোধ প্ৰত্যাহাৰ কৰা, সকলো নিষেধাজ্ঞা বাতিল কৰা, ক্ষতিপূৰণ প্ৰদান, জব্দ কৰা সম্পত্তি মুকলি কৰা আৰু হৰমুজ জলদ্বীপৰ ওপৰত ইৰাণৰ সাৰ্বভৌমত্ব মানি লোৱা অন্যতম।
বৰ্তমান উপসাগৰীয় ৰাষ্ট্ৰসমূহ আৰু পাকিস্তানৰ মধ্যস্থতাত দুয়োপক্ষৰ মাজত কূটনৈতিক আলোচনা অব্যাহত আছে যদিও পৰিস্থিতি এতিয়াও অতি জটিল হৈয়ে আছে। ইৰাণৰ পাৰমাণৱিক কাৰ্যসূচী আৰু জলপথ পুনৰ মুকলি কৰাৰ চৰ্তসমূহক কেন্দ্ৰ কৰি দুয়োপক্ষৰ মাজত তীব্ৰ অচলাৱস্থা বিৰাজ কৰিছে, যাৰ ফলত সামৰিক উত্তেজনা সাময়িকভাৱে হ্ৰাস পালেও স্থায়ী সমাধানৰ পথ বৰ্তমানলৈকে মুকলি হোৱা নাই।
