সমগ্ৰ বিশ্বতে ক’ৰ’নাতংকই বিৰাজ কৰি থকাৰ সময়তে কিছুমান ভুৱা প্ৰচাৰৰ দ্বাৰা প্ৰলোভিত হৈ বহু মানুহে জীৱনৈ মৰণ মাতি আনিছে।
তেনে এক হৃদয়বিদাৰক ঘটনা সংঘটিত হৈছে মধ্য প্ৰাচ্য দেশ ইৰাণত।
ক’ৰ’নাতংকই কঁপাই থকা দেশখনত বিষাক্ত সুৰাপান কৰি মৃত্যু ঘটিছে ৪০০ ৰো আধিক লোকৰ।
কিছুমান সংবাদ প্ৰতিষ্ঠানৰ বাতৰিৰ মতে দেশখনত ক’ৰ’না ভাইৰাছৰ সংক্ৰমণৰ পৰা হাত সাৰিবলৈ সুৰাপান কৰি দেশখনৰ প্ৰায় ৩০০ লোকৰ মৃত্যু ঘটিছে। আন ১ হাজাৰৰো অধিক লোক সুৰাপান কৰি অসুস্থ হৈ পৰিছে।
আনহাতে ইৰাণৰ স্বাস্থ্য মন্ত্ৰালয়ৰ উদ্ধৃতি দি দ্য এচ’ছিয়েট প্ৰেছে কয় যে শুকুৰবাৰলৈকে এই বিষাক্ত সুৰাপান কৰি ৪৮০ ৰো অধিক লোকৰ মৃত্যু ঘটাৰ লগতে ২,৮৫০ লোক অসুস্থ হৈ চিকিৎসাধীন হৈ আছে।
দেশখনৰ বহু লোকে ক’ৰ’না ভাইৰাছৰ সংক্ৰমণৰ পৰা ৰক্ষা পৰিবলৈ উদ্যোগিক সুৰাৰ পান কৰাৰ ফলত এই হৃদয় বিদাৰক ঘটনা সংঘটিত হৈছে।
এই উদ্যোগিক সুৰাবিধ যথেষ্ট পৰিমাণে বিষাক্ত হোৱাৰ ফলতে বিষক্ৰিয়াহৈ লোকসকলৰ মৃত্যু ঘটা বুলি ইৰাণৰ স্বাস্থ্য মন্ত্ৰালয়ে সদৰী কৰিছে।
সুৰাপান কৰাৰ ফলত মাৰাত্মক ক’ৰ’না ভাইৰাছৰ সংক্ৰমণৰ পৰা ৰক্ষা পৰে বুলি প্ৰচাৰিত ভুৱা বাতৰিৰ প্ৰভাৱত এই ধৰণৰ হৃদয়বিদাৰক ঘটনা সংঘটিত হোৱা বুলি মন্তব্য কৰি ইৰাণৰ স্বাস্থ্য মন্ত্ৰী ডাঃ হোছেইন হাচ্ছানিয়ানে কয় যে ‘আন ৰাষ্ট্ৰবোৰে কেৱল ক’ৰ’না ভাইৰাছৰ বিৰুদ্ধে যুঁজ দি থকাৰ সময়ত আমি দুটা মাৰাত্মক ব্যাধিৰ লগত যুঁজিব লগীয়া হৈছে। আমাৰ দুই শত্ৰু হৈছে বিষাক্ত সুৰাপান আৰু ক’ৰ’না ভাইৰাছ।’
প্ৰণিধানযোগ্য যে সুৰাপান কৰি ক’ৰ’না ভাইৰাছৰ সংক্ৰমণৰ পৰা হাত সাৰিব পাৰি বুলি দেশখনৰ চ’ছিয়েল মিডিয়াত বহুল ভাৱে প্ৰচাৰ লাভ হোৱাৰ পিছতে এনে ধৰণৰ ঘটনাবোৰ সংঘটিত হৈছে বুলি চৰকাৰী সূত্ৰত প্ৰকাশ পাইছে।
আনহাতে ইছলামিক ৰিপাব্লিক ৰাষ্ট্ৰখনত বৰ্তমানলৈকে ২৯,০০০ ৰো অধিক লোক মাৰাত্মক ক’ৰ’না ভাইৰাছৰ দ্বাৰা আক্ৰান্ত হোৱাৰ বিপৰীতে ২,২০০ ৰো অধিক আক্ৰান্তৰ মৃত্যু ঘটিছে।
উল্লেখ্য যে, মধ্য প্ৰাচ্য দেশখনত ২০১৮ চনৰ ছেপ্তম্বৰৰ পৰা অক্টোবৰৰ ভিতৰত মিথানলযুক্ত সুৰাপান কৰি ৭৬ লোকৰ মৃত্যু হোৱাৰ লগতে ৭৬৮ জন লোক অসুস্থ হৈছিল।
