ৰাজ্যৰ জলসম্পদ মন্ত্ৰীগৰাকীৰ অদূৰদৰ্শিতা তথা অকৰ্মণ্যৰ বাবেই মৰিগাঁও জিলাৰ ভূৰাগাঁৱত জলসম্পদ বিভাগৰ তত্বাৱধানত চলি থকা জিঅ’ বেগেৰে লুইতৰ গৰাখহনীয়া প্ৰতিৰোধ কাম বন্ধ কৰিবলৈ দাবী জনাইছে স্থানীয় ৰাইজে৷
আজি পুৱাৰে পৰা প্ৰতিৰোধৰ দাবীত ভূৰাগাঁৱৰ সহস্ৰাধিক ৰাইজে প্ৰতিবাদত সাৱ্যস্ত কৰে।
প্ৰতিবাদকাৰীসকলে জলসম্পদ মন্ত্ৰীৰ লগতে চৰকাৰ বিৰোধী শ্ল’গানেৰে তীব্ৰ প্ৰতিবাদ সাৱ্যস্ত কৰে।
অতিশীঘ্ৰে যদি নিম্নমানৰ জিঅ’ বেগৰ কাম বন্ধ নকৰে তেতিয়া হলে আত্মজাহ দিব বুলিও কয় ক্ষুব্ধ প্ৰতিবাদকাৰীসকলে৷
বিগত সময়ত বুঢ়া লুইতৰ গৰাখহনীয়াই বিধ্বংসী ৰূপ ধাৰণ কৰি ৭০ খনকৈ গাঁও নিশ্চিহ্ন কৰিছিল।
কৃষকৰ খেতি ভূমি, সা-সম্পতি আনকি থকা ঠাইকণো প্ৰলয়ংকৰী বান আৰু গৰাখহনীয়াই নিশ্চিহ্ন কৰিছিল।
ইমানৰ পিছতো বিয়াগোম জলসম্পদ বিভাগে গৰাখহনীয়া স্থায়ী সমাধান তথা প্ৰতিৰোধৰ কোনো ব্যৱস্থা গ্ৰহণ কৰা নাই।
চৰকাৰ আহে আৰু যায়। কিন্তু নৈপৰীয়া ৰাইজৰ দুখ-কষ্টৰ কথা আজিলৈ কোনো এখন চৰকাৰে ইতিবাচক তথা বাস্তৱসন্মত ব্যৱস্থা গ্ৰহণ কৰিবলৈ সক্ষম হোৱা নাই বুলিও চৰকাৰক প্ৰতিবাদকাৰীসকলে ক্ষোভ আৰু অসন্তুষ্টি প্ৰকাশ কৰে।
