বিজয় হাজাৰে ট্ৰফীত বেটেৰে একপ্ৰকাৰ ধুমুহাৰ সৃষ্টি কৰিলে ভাৰতৰ এগৰাকী তৰুণ উইকেটকীপাৰ-বেটছমেন ইশান কিষাণে। ৰাষ্ট্ৰীয় এদিনীয়া টুৰ্ণামেন্টত অভিলেখ গঢ়িলে ঝাৰখণ্ডৰ হৈ খেলা এই প্ৰতিভাৱান ক্ৰিকেটাৰগৰাকীয়ে।
বিজয় হাজাৰে ট্ৰফীৰ মধ্যপ্ৰদেশৰ বিৰুদ্ধে খেলা খেলখনত ইশানে তেওঁৰ ৯৪টা বলৰ ইনিংছটোত ১৯টা চাৰি আৰু ১১টা ছয় কোবায়।
টুৰ্মামেন্টৰ ইতিহাসত আটাইতকৈ অধিক ৰাণৰ ইনিংছ খেলা ভাৰতীয় উইকেটকীপাৰৰ ভিতৰত যুটীয়াভাৱে দ্বিতীয় স্থান লাভ কৰিছে ইশান কিষাণে। উইকেটকীপাৰ-কেপ্টেইন হিচাপে এইটো ৰাষ্ট্ৰীয় এদিনীয়া টুৰ্নামেন্টত যিকোনো ভাৰতীয়ৰ সৰ্বাধিক ব্যক্তিগত ইনিংছ।
ইশানে তেওঁৰ অৰ্ধশতৰাণ সম্পূৰ্ণ কৰে ৪০টা বলত। কিন্তু শতৰাণ পূৰ্ণ কৰে ৭৪টা বলত। সেইদৰে ৮৬টা বলত ১৫০ ৰাণৰ সীমা অতিক্ৰম কৰে। ইশানে ১০০ৰ পৰা ১৫০ ৰাণ কৰোতে মাত্ৰ ১২টা বল খেলিছে। তেওঁ অন্তিম ৭১ ৰাণ কৰিছে মাত্ৰ ২০টা বলত।
সামগ্ৰিকভাৱে ক্ৰিকেটত আটাইতকৈ বেছি ৰাণ কৰা উইকেটকীপাৰৰ তালিকাত ৩নম্বৰ স্থানত আছে ইশান। ২০১৪চনত নাইটছৰ বিৰুদ্ধে ডলফিনছৰ মৰ্নি ভেন উইকে ১৭১ টা বলত ১৭৫ ৰাণ কৰি অপৰাজিত আছিল।
সেইদৰে ২০০৩চনত লাহোৰৰ বিৰুদ্ধে পিআইএৰ মইন খানে ১৫২টা বলত ১৭৪ৰাণ কৰিছিল।
বিজয় হাজাৰে ট্ৰফীত সৰ্বাধিক ব্যক্তিগত ৰাণৰ অভিলেখ আছে সঞ্জু ছেমছনৰ নামত। ৰাষ্ট্ৰীয় এদিনীয়া টুৰ্নামেন্টত আটাইতকৈ বেছি ৰাণৰ ব্যক্তিগত ইনিংছৰ তালিকাত যুগ্মভাৱে পঞ্চম স্থানত আছে ইশান।
এইক্ষেত্ৰত যশস্বী জয়ছোৱালে ২০৩, কৌশলে ২০২, ৰাহানে ১৮৭, জাফৰ অপৰাজিত ১৭৮ আৰু অংকুশ বেইন্সে অপৰাজিত ১৭৩ৰাণ কৰিছিল। এতিয়া বেইন্সৰ সৈতে একে স্থান লাভ কৰিলে ইশানে।
ইপিনে, ঝাৰখণ্ডে নিৰ্দ্ধাৰিত ৫০ অভাৰত ৯টা উইকেটৰ বিনিময়ত ৪২২ৰাণ কৰে। দেশৰ মাটিত ৫০ অভাৰৰ ক্ৰিকেটত এইটোৱে হৈছে সৰ্বোচ্চ দলীয় ইনিংছ।
