গোটেই দেশতে ‘জয় শ্ৰী ৰাম’ ধ্বনি দিয়াক লৈ অগণতান্ত্ৰিক, অভূতপূৰ্ব ধৰণৰ অপ্ৰীতিকৰ পৰিস্থিতি সৃষ্টি হৈ থকাৰ সময়তে অসম বিজেপিৰ এজন মুখপাত্ৰ তথা সংখ্যালঘু উন্নয়ন ব’ৰ্ডৰ অধ্যক্ষ মমিনুল আৱালে সংবাদ মাধ্যমলৈ প্ৰেৰণ কৰা এটা বিবৃতিত জনাইছে যে ইছলাম ধৰ্মত ‘জয় শ্ৰীৰাম’ কোৱাত বাধা নাই।
অৱশ্যে জয় শ্ৰীৰাম কোৱাত বাধা নাই বুলি কয় যদিও বিজেপিৰ নেতাজনে জয় শ্ৰীৰাম ধ্বনি দিবলৈ জোৰজুলুম আৰু মাৰপিট কৰি বিজেপিৰ সমৰ্থক আৰু সহযোগী দল-সংগঠনবোৰৰ কৰ্মীসকলে মানুহৰ গণতান্ত্ৰিক আৰু মানৱিক অধিকাৰ খৰ্ব কৰা সন্দৰ্ভত বিবৃতিটোত একো কোৱা নাই।
বিবৃতিটোত ইচলামধৰ্মী আৱালে কয়- “মুছলমান লোকে ‘জয় শ্ৰীৰাম’ ক’ব পাৰে। ৰামচন্দ্ৰ ৰজা আছিল। যাৰ বাবে ৰামৰাজ্যৰ কথা কোৱা হয়। ৰাম যুগস্ৰষ্টা মহান ব্যক্তি। তেওঁৰ জয় কোৱাত বাধা থাকিব নোৱাৰে।“
তেওঁ লগতে কয়, ইচলামধৰ্মী লোকসকলে হনুমান¸ যীচু খ্ৰীষ্ট¸ শংকৰদেৱৰ নামতো জয়ধ্বনি দিব পাৰে। কিয়নো তেওঁলোক মহাপুৰুষ আৰু যুগস্ৰষ্টা। মহাপুৰুষৰ জয় কোৱাটো ধৰ্মীয় অপৰাধ হ’ব নোৱাৰে।
বিবৃতিটোত তেওঁ কৰা দাবী মতে, ধৰ্মীয় উত্তেজনা সৃষ্টিৰ বাবেই একাংশই ৰাইজৰ কাম কৰি থকা চৰকাৰখনক শ’লঠেকত পেলাবলৈ আৰু অসমত অশান্তিৰ পৰিৱেশ সৃষ্টি কৰাৰ উদ্দেশ্যে ‘জয় শ্ৰীৰাম’ ধ্বনিত সাম্প্ৰদায়িক ৰহণ সানিব বিচাৰিছে।
আৱালে এনেকুৱা মানসিকতাৰ লোকসকলক প্ৰথমে বিজেপি সম্পৰ্কে জ্ঞান আহৰণ কৰিবলৈ আহ্বান জনায়।
উল্লেখ কৰিব পাৰি যে অলপতে দেশৰ ৪৯গৰাকী বিশিষ্ট লোকে দেশৰ ক্ৰমবৰ্ধিত অসহিষ্ণু পৰিৱেশত উদ্বেগ প্ৰকাশ কৰি প্ৰধান মন্ত্ৰীলৈ এখন পত্ৰ লিখিছিল, য’ত “জয় শ্ৰীৰাম” এতিয়া যুদ্ধৰ আস্ফালনত পৰিণত হোৱা বুলি দাবী কৰিছিল।
মোদী চৰকাৰ অহাৰ পিছত দেশৰ বিভিন্ন ঠাইত হিন্দুত্ববাদী, ধৰ্মোন্মাদ লোকে মুছলমান লোকক ‘জয় শ্ৰীৰাম’ ধ্বনি দিবলৈ জোৰজুলুম কৰাৰ লগতে মাৰপিট কৰাৰ কেইবাটাও ঘটনা ঘটিছে। অসমতো তেনেকুৱা ঘটনাৰ বাবে গোচৰ পৰ্য্যন্ত ৰুজু হৈছে।