অৱশেষত ১৫ মাহৰ ৰক্তাক্ত গাজা যুদ্ধৰ অৱসান ঘটিবলৈ আগবাঢ়িছে। ইজৰাইল আৰু হামাছে গাজাত যুদ্ধৰ অন্ত পেলাবলৈ চুক্তিত উপনীত হোৱা বুলি জানিব পৰা গৈছে। ইজৰাইলৰ যুদ্ধবন্দীক পেলেষ্টাইনী বন্দীৰ বিনিময়ত মুকলি কৰি দিয়াৰ সিদ্ধান্তও লোৱা হৈছে বুলিও বাতৰি প্ৰকাশ পাইছে।
আন্তঃৰাষ্ট্ৰীয় সংবাদ সংস্থাৰ বাতৰি অনুসৰি, বুধবাৰে গাজাত ইজৰাইল আৰু হামাছৰ মাজত হোৱা যুদ্ধৰ অন্ত পেলাবলৈ আলোচনাকাৰীসকলে এক পৰ্যায়ক্ৰমে চুক্তিত উপনীত হয়।
সংবাদ সংস্থা ৰয়টাৰক এজন বিষয়াই জনোৱা মতে, এই চুক্তিত ছয় সপ্তাহৰ প্ৰাৰম্ভিক যুদ্ধবিৰতি পৰ্যায়ৰ ৰূপৰেখা দাঙি ধৰা হৈছে আৰু ইয়াৰ ভিতৰত গাজা উপত্যকাৰ পৰা ইজৰাইলী বাহিনী ক্ৰমান্বয়ে প্ৰত্যাহাৰ কৰা আৰু ইজৰাইলৰ হাতত থকা পেলেষ্টাইনী বন্দীসকলৰ বিনিময়ত হামাছৰ হাতত থকা আনসকলক মুকলি কৰি দিয়াটো অন্তৰ্ভুক্ত কৰা হৈছে।
প্ৰথম পৰ্যায়ত ৩৩ জন ইজৰাইলীক মুকলি কৰি দিয়া হ’ব, যিসকলৰ আটাইকেইজনেই মহিলা, শিশু আৰু ৫০ বছৰৰ ওপৰৰ পুৰুষ।
দ্বিতীয় পৰ্যায় কাৰ্যকৰী কৰাৰ বাবে আলোচনা প্ৰথম পৰ্যায়ৰ ১৬তম দিনৰ পৰা আৰম্ভ হ’ব আৰু ইয়াৰ ভিতৰত বাকী থকা সকলো ইজৰাইলীক মুকলি কৰি দিয়া, স্থায়ী যুদ্ধবিৰতি আৰু গাজাৰ পৰা ইজৰাইলী বাহিনী সম্পূৰ্ণৰূপে প্ৰত্যাহাৰ কৰা আদি অন্তৰ্ভুক্ত হ’ব বুলি আশা কৰা হৈছে।
তৃতীয় পৰ্যায়ত বাকী থকা সকলো মৃতদেহ ঘূৰাই অনাৰ লগতে ইজিপ্ত, কাটাৰ আৰু ৰাষ্ট্ৰসংঘৰ তত্বাৱধানত গাজাৰ পুনৰ নিৰ্মাণৰ কাম আৰম্ভ হোৱাৰ সম্ভাৱনা আছে।
আমেৰিকাৰ সমৰ্থিত ইজিপ্ত আৰু কাটাৰৰ মধ্যস্থতাকাৰীৰ মাজত কেইবামাহো ধৰি চলি থকা আলোচনাৰ পিছতে আমেৰিকাৰ নৱ নিৰ্বাচিত ৰাষ্ট্ৰপতি ড’নাল্ড ট্ৰাম্পৰ কাৰ্যভাৰ গ্ৰহণৰ ঠিক পূৰ্বে এই চুক্তি কৰা হৈছে।
গাজাত প্ৰভাৱশালী পেলেষ্টাইনী সশস্ত্ৰ গোট হামাছে ৰয়টাৰক জনোৱা মতে, তেওঁলোকৰ প্ৰতিনিধি দলে যুদ্ধবিৰতি আৰু ইজৰাইলীসকলৰ উভতি অহাৰ ক্ষেত্ৰত মধ্যস্থতাকাৰীসকলৰ চুক্তিত অনুমোদন জনাইছে।
নাম প্ৰকাশ নকৰাকৈয়ে এজন বিষয়াই পূৰ্বে ৰয়টাৰক জনাইছিল যে হামাছে যুদ্ধবিৰতি আৰু ইজৰাইলীসকলৰ প্ৰত্যাৱৰ্তনৰ প্ৰস্তাৱত মৌখিক অনুমোদন দিছে আৰু চূড়ান্ত লিখিত অনুমোদনৰ বাবে অধিক তথ্যৰ বাবে অপেক্ষা কৰি আছে। যদি সফল হয় তেন্তে পৰিকল্পিত পৰ্যায়ক্ৰমিক যুদ্ধবিৰতিৰ ফলত যুদ্ধৰ অন্ত পৰিব পাৰে।
ইফালে এটা অমীমাংসিত প্ৰশ্ন হ’ল যুদ্ধৰ পিছত গাজা কোনে চলাব? ইজৰাইলৰ বৈদেশিক মন্ত্ৰী গিডিয়ান ছাৰে কয় যে তেওঁ ইউৰোপ ভ্ৰমণৰ সময় কৰ্তন কৰি নিশাটোৰ ভিতৰতে দেশলৈ উৰা মাৰিব আৰু নিৰাপত্তা মন্ত্ৰীসভা আৰু চুক্তিখনৰ ওপৰত চৰকাৰৰ ভোটদানত অংশগ্ৰহণ কৰিব।
২০২৩ চনৰ ৭ অক্টোবৰত হামাছৰ নেতৃত্বত বন্দুকধাৰীয়ে নিৰাপত্তাৰক্ষীৰ বেহু ভংগ কৰি ইজৰাইলৰ সীমান্ত অঞ্চলত প্ৰৱেশ কৰি ১২০০ জন সৈনিক আৰু সাধাৰণ নাগৰিকক হত্যা কৰাৰ লগতে ২৫০ জনতকৈ অধিক বিদেশী আৰু ইজৰাইলীক অপহৰণ কৰাৰ পিছত ইজৰাইলী বাহিনীয়ে গাজাত আক্ৰমণ আৰম্ভ কৰে।
গাজা স্বাস্থ্য মন্ত্ৰালয়ৰ তথ্য অনুসৰি গাজাত ইজৰাইলৰ আকাশ আৰু স্থল যুদ্ধত ৪৬ হাজাৰতকৈ অধিক লোকৰ মৃত্যু হৈছে আৰু উপকূলীয় অঞ্চলটো ধ্বংসাৱশেষৰ উচ্ছন্ন ভূমিলৈ পৰিণত হৈছে য’ত লাখ লাখ স্থানচ্যুত লোকে আৰু শীতকালৰ ঠাণ্ডাত অস্থায়ী আশ্ৰয় শিবিৰত তম্বুৰ তলত বহি জীয়াই থকাৰ সংগ্ৰাম কৰি আছে।
